ޕާކިސްތާންގެ ލާހޫރު ޕޮލިސް ސްޓޭޝަނެއްގެ ބަންދުގައި ތިއްބައި، ޢާއިލާގެ ދެ މީހަކު މަރުވުމާ ގުޅިގެން ހިއުމަން ރައިޓްސް ވޮޗް އިން ވަނީ އެ މައްސަލަ އަވަސް އަދި މިނިވަންކަމާއެކު ތަޙުޤީޤުކުރުމަށް ޕާކިސްތާންގެ ކަމާބެހޭ ފަރާތްތަކަށް ގޮވާލާފައެވެ.
އަންމޯލް އަދި އާމިނާ ނަމަކަށް ކިޔާ މި ދެ އަންހެނުންނަކީ ފުލުހުންގެ ބަންދުގައި ތިއްބައި މަރުވި ދެ މީހުން ކަމަށް ރިޕޯޓުތައް ބުނެއެވެ. މި ޙާދިސާއާ ގުޅިގެން ފުލުހުންގެ ބަންދުގައި ހިންގާ އަނިޔާވެރިކަމާއި ލާއިންސާނީ ޢަމަލުތަކުގެ މައްސަލަތައް އަނެއްކާވެސް ވަނީ ފެންމަތިވެފައެވެ.
ލާހޯރުގެ ފުލުހުން ބުނެފައިވާ ގޮތުގައި، އެ ދެ މީހުން ހައްޔަރުކޮށްފައިވަނީ ފޭރުނު ކަމަށް ތުހުމަތުކުރެވޭ މައްސަލައަކާ ގުޅިގެންނެވެ. ނަމަވެސް މަރުވި މީހުންގެ ޢާއިލާއިން ވަނީ ފުލުހުންގެ މި ވާހަކަތައް މުޅިން ދޮގުކޮށްފައެވެ.
ޢާއިލާއިން ތުހުމަތުކުރާ ގޮތުގައި، ބަންދުގައި ތިބިއިރު އެ މީހުންނަށް ވަނީ އަނިޔާކޮށްފައެވެ. އަދި ހަށިގަނޑުގައި އަނިޔާގެ ނިޝާނާއި ހެދުން ވީދިފައި ހުރިކަމަށާއި، އެ މައްސަލަ ސިއްރުކުރުމަށް ފުލުހުން ފައިސާ ހުށަހެޅި ކަމަށްވެސް ޢާއިލާއިން ބުނެފައިވެއެވެ.
މި ޙާދިސާއާ ގުޅިގެން ބައިނަލްއަޤްވާމީ ޖަމުޢިއްޔާތަކުންނާއި އިންސާނީ ޙައްޤުތަކަށް މަސައްކަތްކުރާ ފަރާތްތަކުން ކަންބޮޑުވުން ފާޅުކުރަމުންދާއިރު، ޤާނޫނީ ފަރާތްތަކުން ލާޒިމުކުރާ އުޞޫލުތަކާ އެއްގޮތަށް މިނިވަން ތަޙުޤީޤެއް ހިންގުމަށް ވަނީ ގޮވާލާފައެވެ.
ޕާކިސްތާނުގައި އަމަލުކުރަމުންދާ 2022 ވަނަ އަހަރުގެ ޤާނޫނުގެ ދަށުން، ފުލުހުންގެ ބަންދުގައި ހިނގާ މިފަދަ މަރުތަކާއި އަނިޔާގެ މައްސަލަތައް ވަކިން ޚާއްޞަ އިދާރާތަކުން ބަލަންޖެހޭނެ ކަމަށް ހިއުމަން ރައިޓްސް ވޮޗުން ފާހަގަކޮށްފައިވެއެވެ.
މިފަދަ މައްސަލަތައް ތަކުރާރުވަމުންދިއުމަކީ ޤައުމުގެ ޤާނޫނީ ނިޒާމާއި ފުލުހުންގެ މުއައްސަސާގެ އިތުބާރަށް އޮތް ބޮޑު ގޮންޖެހުމެއް ކަމަށް ބުނެއެވެ. މި މައްސަލައިގައި ޒިންމާވާ ފަރާތްތައް ޤާނޫނުގެ ކުރިމައްޗަށް ގެނައުމަށާއި، ބަންދުކުރާ މަރުކަޒުތަކުގައި އިންސާނީ ކަރާމާތް ޙިމާޔަތްކުރުމަށް އަވަސް ފިޔަވަޅުތަކެއް އެޅުމަށް ވަނީ ގޮވާލާފައެވެ.
