ދުނިޔޭގެ ޖިއޮޕޮލިޓިކްސްގެ މަސްރަޙު ބަދަލުވަމުންދާ މި ދަނޑިވަޅުގައި، މައްކާ ޑިފެންސް އެގްރީމެންޓްގެ ދަށުން އުފެދުނު އާ ޢަސްކަރީ އިއްތިހާދަކީ ހަމައެކަނި ދިފާޢީ އިއްތިހާދެއް ނޫނެވެ. މިއީ އިސްލާމީ ދުނިޔޭގެ ނުފޫޒުގަދަ ތިން ބާރު ކަމުގައިވާ ޕާކިސްތާނާއި، ސަޢޫދީ ޢަރަބިއްޔާ އަދި ތުރުކީ ގުޅިގެން ސަރަހައްދީ އަދި ދުނިޔޭގެ ފެންވަރުގައި ޢަސްކަރީ ބާރުވެރިކަން ދެމެހެއްޓުމަށް އެޅި މުހިންމު ފިޔަވަޅެކެވެ. ގްލޯބަލް ފަޔަރ ޕަވަރ އިންޑެކްސްގެ ތަފާސްހިސާބުތަކުން ދައްކާ ގޮތުގައި، މި ތިން ޤައުމުގެ ޢަސްކަރީ ގާބިލުކަން އެއްކޮށްލުމުން އުފެދޭ ބާރަކީ ދުނިޔޭގެ ޢަސްކަރީ ހަމަތައް ބަދަލުކޮށްލެވޭ ފަދަ ބޮޑު ބާރެކެވެ.
މި އިއްތިޙާދުގެ ޢަސްކަރީ ބާރުތަކަށް ބަލާއިރު:
- ޖުމްލަ 1.4 މިލިއަން ސިފައިން
- 3،415 ޢަސްކަރީ އުޅަނދު
- 6،046 ޓޭންކް
- 344 މަނަވަރު މި ތިން ޤައުމުގެ އަތުގައި އެބަހުއްޓެވެ.
މީގެ ތެރެއިން ޕާކިސްތާނަކީ ގާތްގަނޑަކަށް 6 ލައްކަ 60 ހާސް ސިފައިންނާއި އެކު ނިއުކްލިއަރ ހަތިޔާރުގެ ގާބިލުކަން ލިބިފައިވާ މުހިންމު ބައިވެރިއެކެވެ. ހަމައެހެންމެ، ތުރުކީން އެ ޤައުމުގެ ކުރިއަރާފައިވާ ޑްރޯން ޓެކްނޮލޮޖީއާއި، މިސައިލް އަދި އިލެކްޓްރޯނިކް ވޯފެއާގެ ދާއިރާއިން 192 މަނަވަރު މި އިއްތިޙާދަށް ބޮޑު ބާރެއް ގެނެސްދެއެވެ.
މި އިއްތިޙާދުގެ މާލީ ބާރަކީވެސް ފާހަގަކޮށްލެވޭ ކަމެކެވެ. ސަޢޫދީ ޢަރަބިއްޔާއިން އަހަރަކު 63 ބިލިއަން 900 މިލިއަން ޑޮލަރު ޢަސްކަރީ ބަޖެޓަށް ޚަރަދުކުރާއިރު، ޖުމްލަ ގޮތެއްގައި މި ތިން ޤައުމުން އަހަރަކު 124 ބިލިއަން 400 މިލިއަން ޑޮލަރު ޢަސްކަރީ ދާއިރާއަށް ޚަރަދުކުރެއެވެ.
ސަޢޫދީ ޢަރަބިއްޔާގެ ޖިއޮގްރަފީގެ މުހިންމުކަމާއި، ޕާކިސްތާނާއި ތުރުކީގެ ޢަސްކަރީ ތަޖުރިބާ އެއްކޮށްލުމުން މި ޤައުމުތަކުގެ ދިފާޢީ ބާރު ވަރަށް ބޮޑަށް ވަރުގަދަވެގެންދާނެކަމަށް ތަޖުރިބާކާރުން ދެކެއެވެ.
މި ފަދަ ބޮޑު ޢަސްކަރީ ބާރެއްގެ އުފެދުމަކީ ހުރުމުޒު ކަނޑުއޮޅި ފަދަ މުހިންމު ސަރަހައްދުތަކުގެ ސަލާމަތާއި ރައްކާތެރިކަމަށް ދޭ ބޮޑު ކަށަވަރުކަމެކެވެ. އިސްލާމީ ދުނިޔޭގެ މި ތިން ބާރު އެކަތިގަނޑަކަށް ވެގެން ދިއުމަކީ، ސަރަހައްދީ ހަމަނުޖެހުންތަކާއި ޢަސްކަރީ ނުފޫޒުތައް ހުއްޓުވުމަށް އެޅޭ ވަރުގަދަ ފިޔަވަޅެއް ކަމަށް ބައިނަލްއަޤްވާމީ މަސްރަޙު ދިރާސާކުރާ ފަރާތްތަކުން ބުނެއެވެ.
