ސައޫދީ އަރަބިއްޔާގެ ފެނާއި ނަރުދަމާގެ ހިދުމަތްދޭ މުހިންމު ވަސީލަތްތަކުގެ ނެޓްވޯކްތަކަށް ސައިބާ ހަމަލާތަކެއް ދީ، އެ ނިޒާމުތައް ކޮންޓްރޯލްކޮށްފައިވާ ކަމަށް ޔަމަނަށް ނިސްބަތްވާ ހެކަރުންގެ ގްރޫޕަކުން ބުނެފިއެވެ. މި ހަމަލާގެ މަސްއޫލިއްޔަތު އުފުލައި، އެ ގްރޫޕުން މީސް މީޑިއާގައި އާންމުކުރި ބަޔާނެއްގައި ބުނެފައިވަނީ، ސައޫދީގެ އަސާސީ ހިދުމަތްތަކާ ގުޅުންހުރި ޑިޖިޓަލް ނިޒާމުތަކުގެ ތެރެއަށް ވަދެ، އެތަންތަނުގެ ސާވާތަކަށް ބުރޫއަރުވާލާފައިވާ ކަމަށެވެ.
މި ހަމަލާގެ ސަބަބުން ސައޫދީ އަރަބިއްޔާގެ ބައެއް ސަރަހައްދުތަކުގެ ފެނުގެ ހިދުމަތަށް ނުވަތަ ނަރުދަމާ ނިޒާމުގެ އޮޕަރޭޝަންތަކަށް އެއްވެސް ބުރޫއެއް އަރާފައިވާ ކަން ސައޫދީ ސަރުކާރުގެ ކަމާބެހޭ އިދާރާތަކުން ރަސްމީކޮށް އަދި ހާމަކޮށްފައެއް ނުވެއެވެ.
ޔަމަނުގެ ހެކަރުންގެ ގްރޫޕުން ހާމަކުރި މައުލޫމާތުގައިވާ ގޮތުން، މި ސައިބާ ހަމަލާ އަމާޒުކޮށްފައިވަނީ ސައޫދީގެ ސިނާއީ ނިޒާމުތައް ބަލަހައްޓާ ކޮންޓްރޯލް ސޮފްޓްވެއާތަކަށެވެ. އެ ގްރޫޕުން ވަނީ އެ ނެޓްވޯކްތަކުގެ އެކްސެސް ސިސްޓަމްތަކުގެ ސްކްރީންޝޯޓްތަކާއި ޑޭޓާގެ ބައެއް ބައިތައް މީސް މީޑިއާގައި އާންމުކޮށްފައެވެ. ސައިބާ ރައްކާތެރިކަމާ ބެހޭ މާހިރުން ބުނާ ގޮތުގައި، މިފަދަ ހަމަލާތަކަކީ ސީދާ ފެނުގެ ސަޕްލައި ކަނޑާލުމުގެ މަގުސަދުގައި ދޭ ހަމަލާތަކަކަށް ނުވި ނަމަވެސް، ގައުމެއްގެ އަސާސީ ހިދުމަތްތަކަށް ވަދެގަނެވޭނެ ގާބިލުކަން ހުރިކަން ދެއްކުމުގެ ގޮތުން ދޭ "ނަފްސާނީ" ހަމަލާތަކެކެވެ.
މި ސައިބާ ހަމަލާގެ ހަގީގަތް ދެނެގަތުމަށާއި، ނެޓްވޯކްތަކަށް ދީފައިވާ ގެއްލުންތައް ވަޒަންކުރުމަށް ސައޫދީ އަރަބިއްޔާގެ ސައިބާ ސެކިއުރިޓީ އޮތޯރިޓީން ވަނީ ޚާއްސަ ތަހުގީގެއް ފަށާފައެވެ.
