ސައުދީ އަރަބިއްޔާގެ ވެރިރަށް ރިޔާޟުގެ ބައިނަލްއަގުވާމީ އެއާޕޯޓުގައި ބާރުގަދަ ގޮވުމެއްގެ އަޑު އިވުމާއެކު އެއާޕޯޓުގެ ބައެއް ސަރަހައްދުތަކުން މީހުން ހުސްކޮށް، ފްލައިޓްތައް އެހެން އެއާޕޯޓުތަކަށް ބަދަލުކުރަން ފަށައިފިއެވެ. މަންޒަރު ދުށް މީޙުންނާއި މަސްއޫލު މަސްދަރުތަކުން ހާމަކުރި ގޮތުގައި، ގޮވުމުގެ ހާދިސާއަށްފަހު ގިނަ އަދަދެއްގެ އެމްބިއުލަންސްތައް ވަނީ އެއާޕޯޓު ސަރަހައްދަށް ގޮސްފައެވެ. މި ހާދިސާ ހިނގާފައިވަނީ ޔަމަނުގެ ހޫޘީން ސައުދީ އަރަބިއްޔާއަށް އަމާޒުކޮށް ދޭ މިސައިލް ހަމަލާތައް އިތުރަށް ވަރުގަދަކޮށްފައިވާ ދަނޑިވަޅެއްގައެވެ. މި ހަފުތާގެ ތެރޭގައިވެސް އެއާޕޯޓަށް ދެފަހަރެއްގެ މަތިން ހަމަލާދީފައިވާއިރު، އެ ހަމަލާތަކުގައި ހަތަރު މީހުން މަރުވެ، އެތައް ބަޔަކު ޒަޚަމްވެ، ބޯޓަކަށް ބޮޑެތި ގެއްލުންތަކެއް ވަނީ ލިބިފައެވެ.
މި ގޮވުމުގެ ހާދިސާއާ ގުޅިގެން ސައުދީ ސަރުކާރުގެ މީޑިއާ އޮފީހުންނާއި އެ ގައުމުގެ ސިވިލް އޭވިއޭޝަން އޮތޯރިޓީން އަދި ވަގުތުން އެއްޗެއް ބުނެފައެއް ނުވެއެވެ. ނަމަވެސް، އެއާޕޯޓުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަކޮށް، ބައެއް ޓާމިނަލްތަކުން ފުރަން ގޮސް ތިބި މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
މި ހާދިސާ ހިނގާފައިވަނީ ރިޔާޟުގައި ހަކަތައާއި އިންވެސްޓްމަންޓާ ބެހޭ ބައިނަލްއަގުވާމީ ބޮޑެތި ސަމިޓްތަކެއް ބޭއްވުމަށް ކުޑަދުވަސްކޮޅަކަށް ވެފައިވަނިކޮށެވެ. ހަމަލަތަކާ ހެދި މަސްރަހު ނުކުރައްކާތެރި ހާލަތަކަށް ގޮސްފައިވާއިރު، އިގްތިސާދީ އަދި ސަލާމަތީ ގޮތުން މުހިންމު މަރުކަޒުތަކަށް އަމާޒުކޮށް ދޭ ހަމަލާތަކުގެ ސަބަބުން ސައުދީގެ ވައިގެ ދަތުރުފަތުރަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ހޫޘީންގެ ހަމަލާތައް ސައުދީގެ މައި އެއާޕޯޓަށް އަމާޒުވަމުންދިއުމަކީ މުޅި ސަރަހައްދުގެ ސަލާމަތީ ސްޓްރެޓެޖީއަށް ކުރިމަތިވާ ބޮޑު ގޮންޖެހުމެކެވެ. މިއާއެކު ސައުދީ ސިފައިން ދަނީ އެއާޕޯޓާއި ވަށައިގެންވާ ސަރަހައްދުތަކުގެ ސަލާމަތީ ފިޔަވަޅުތައް އިތުރަށް ވަރުގަދަކުރަމުންނެވެ.
