ސައޫދީ އަރަބިއްޔާގެ ވެރިރަށް ރިޔާޟުގެ ކިންގް ޚާލިދު އިންޓަނޭޝަނަލް އެއާޕޯޓަށް ޔަމަންގެ ހޫޘީން ދިން ނުރައްކާތެރި މިސައިލް ހަމަލާ ޕާކިސްތާނުން ހަރުކަށި އިބާރާތުން ކުށްވެރިކޮށް، "މައްކާ ޖޮއިންޓް ޑިފެންސް އެގްރީމަންޓް" ގެ ދަށުން ސައޫދީގެ އިސްތިގްލާލާއި ރައްކާތެރިކަން ދިފާއުކުރުމަށްޓަކައި ސިފައިންނާއި އަސްކަރީ ވަސީލަތްތައް ފޮނުވަން ތައްޔާރަށް އޮތްކަން އިއުލާނުކޮށްފިއެވެ.
އާންމުންގެ 12 މީހުން މަރުވެ 309 މީހުން ޒަޚަމްވި މި ހަމަލާއާ ގުޅިގެން ޕާކިސްތާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، އާންމު އެއާޕޯޓަކަށް އަމާޒުކޮށް ދިން މި ހަމަލާއަކީ ބައިނަލްއަގުވާމީ ގާނޫނުތަކާ ޚިލާފު، އަދި ސަރަހައްދީ ސުލްހައަށް އޮތް ބޮޑު ނުރައްކަލެއް ކަމަށެވެ. އަދި އޮކްޓޯބަރު 5 ވީ ދުވަހު ބޭއްވި މައްކާ އެއްބަސްވުމުގެ ސްޓްރެޓެޖިކް، ސިޔާސީ އަދި ދިފާއީ ކޮމިޓީގެ ޚާއްސަ ނިންމުމާ އެއްގޮތަށް، ސައޫދީ އަރަބިއްޔާގެ ސަލާމަތަށްޓަކައި އަވަސް މުއްދަތެއްގެ ތެރޭގައި ސިފައިންނާއި ހަތިޔާރު އެ ގައުމުގައި ގާއިމުކުރުމަށް ފުރިހަމައަށް ތާއީދުކުރާ ކަމަށްވެސް އެ ބަޔާނުގައިވެއެވެ.
ޕާކިސްތާނުގެ ބޮޑުވަޒީރު ޝެހެބާޒް ޝަރީފް މީސް މީޑިއާ ގައި ހިއްސާކުރެއްވި މެސެޖެއްގައި ވިދާޅުވީ، އާންމުންނާއި އިންފްރާސްޓްރަކްޗާއަށް އަމާޒުކޮށް ދޭ މިފަދަ އަނިޔާވެރި ހަމަލާތައް އެއްގޮތަކަށްވެސް ބަލައިނުގަނެވޭނެ ކަމަށެވެ. އަދި ދެ ގައުމުގެ މެދުގައި އޮތް އުޚުއްވަތްތެރި ގުޅުމާއި މައްކާ އެއްބަސްވުމުގެ ދަށުން ސައޫދީގެ ސަރަހައްދީ ނަޒާހަތްތެރިކަން ދިފާއުކުރުމުގައި ޕާކިސްތާނު ސާބިތުކަމާއެކު ދެމިއޮންނާނެ ކަމަށް އޭނާ ވިދާޅުވިއެވެ.
އޮގަސްޓް 7 ގައި ސައޫދީ އަރަބިއްޔާ، ޕާކިސްތާނު އަދި ތުރުކީ ގުޅިގެން ސޮއިކުރި މައްކާ ދިފާއީ އެއްބަސްވުމަކީ، އެއް ގައުމަކަށް ދެވޭ ހަމަލާއަކީ މުޅި އިއްތިހާދަށް ދެވޭ ހަމަލާއެއްގެ ގޮތުގައި ބަލައިގަތުމަށް އެކުލަވާލާފައިވާ އެއްބަސްވުމެކެވެ. ޕާކިސްތާނުގެ ދިފާއީ ވަޒީރު ޚަވާޖާ އާސިފް ވިދާޅުވި ގޮތުގައި، ޕާކިސްތާނާއި ތުރުކީގެ ސިފައިން އެ ސަރަހައްދުގައި ހަރަކާތްތެރިވި ނަމަވެސް، މިވަގުތު އަމަލީ ގޮތުން ހަނގުރާމައިގެ އޮޕަރޭޝަންތަކުގައި ބައިވެރިވަނީ ސައޫދީ ސިފައިން އެކަންޏެވެ. ނަމަވެސް މަސްރަހު އިތުރަށް ގޯސްވެއްޖެނަމަ، ޕާކިސްތާނުން އަމަލީ ގޮތުންނާއި ޑިޕްލޮމެޓިކް މައިދާން ގައި ސައޫދީގެ ދިފާއު ގައި ހަރަކާތްތެރިވާނެއެވެ.
ޔަމަންގެ ހޫޘީން ވަނީ ޖޫން މަހު ސުލްހައިގެ އެއްބަސްވުން އުވިގެން ދިއުމަށްފަހު، ސައޫދީގެ އެއާޕޯޓްތަކަށާއި، ތެޔޮ ސާފުކުރާ ކާރުޚާނާތަކަށާއި، އަދި ހުރުމުޒު ކަނޑުއޮޅި ކައިރިން ދަތުރުކުރާ ތެޔޮ ބޯޓުތަކަށް ދޭ ހަމަލާތައް ވަރުގަދަކޮށްފައެވެ. ސައޫދީ އިސްވެއޮންނަ އަސްކަރީ ކޯލިޝަނުން މި ހަމަލާ ސިފަކޮށްފައިވަނީ "ހަނގުރާމައިގެ ކުށެއް" ގޮތުގައެވެ.
