އދގެ އާންމު މަޖިލީހުގެ ޖަލްސާތައް ހިނގަމުންދާއިރު، އިޒްރޭލުން ވަނީ ބިރަކާ ނުލައި ލުބުނާންގެ މަދަނީންނަށާއި މަދަނީން ދިރިއުޅޭ ސަރަހައްދުތަކަށް ހަމަލަ ދީފައެވެ. އެމެރިކާއާއި ދުނިޔޭގެ ބޮޑެތި ބާރުތަކާއި ދުނިޔޭގެ ދެކުނު ބިތުގެ ހައްޤަށް ވާހަކަ ދައްކާ އިންޑިއާ ފަދަ ބޮޑެތި ޑިމޮކްރެސީތަކުންވެސް ވަނީ އިޒްރޭލު ކުށްވެރިކުރުމާ ދެކޮޅު ހަދާފައެވެ.
އިސްރާއީލުން ދެކުނު ބެއިރޫތުގައި މީހުން ދިރިއުޅޭ އެޕާޓްމަންޓް ބްލޮކަކަށް އަމާޒުކޮށްގެން ދިން އެތައް ވައިގެ ހަމަލާތަކަކީ “ކުރިން ނުފެންނަ” ފަދަ ހަމަލާތަކެވެ. ޒަޔަނިސްޓުން ދިން ޙަމަލާތަކުގައި ލުބުނާނުގައި 700 އަށް ވުރެ ގިނަ މީހުން އެއް ދުވަހު މަރުވެފައިވެއެވެ.
އިޒްރޭލުން ދިން ހަމަލާތަކުގައި ދަހިއްޔާ އަވަށުގެ މުޅި ބްލޮކެއް އެއްކޮށް ބިމާ ހަމަކޮށްފައި ވެއެވެ. މި ޙަމަލާތަކާ ގުޅިގެން އާންމުން ވަނީ ރަމްލަތުލްބައިޟާ ބީޗަށާއި މައިދާން ޝުހަދާގައި އަމާންކަން ހޯދާފައެވެ.
އިޒްރޭލުން ދިން ޙަމަލާގައި އުސް ހަތް އިމާރާތެއް ގޮއްވާލާފައި ވެއެވެ. ޙިޒުބުޑގެ ކޮމާންޑް ސެންޓަރުތަކެއް ކަމަށް ޒަޔަނިސްޓުން ބުނިނަމަވެސް އެ ތަންތަނަކީ، މަދަނީން ދިރިއުޅެމުންދާ ތަންތަން ކަމަށާއި އިޒްރޭލުން ބުޏާ ވާހަކަކައިގައި އެއްވެސް ބުރަދަނެއް ނެތް ކަމަށް މީޑިއާއިން ބުނެއެވެ.
ފަލަސްޠީނަށް ދީފައިވާ ޢުދުވާނުގައިވެސް އިޒްރޭލުން ވަނީ 41،534 މީހުން ޝަހީދުކޮށްލާފައެވެ. އަދި 96،092 މީހުން ޒަހަމްކޮށްލާފައެވެ.
