ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކޮޕް 29ގައި ބައިވެރިވެ ވަޑައިގަތުމަށް އަޒަރްބައިޖާންގެ ވެރިރަށް ބާކޫއަށް ވަޑައިގެންފިއެވެ.
29 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް29) ގައި ދިވެހިރާއްޖޭގެ ފަރާތުން އިއްވަވާ ޚާއްޞަ ޤައުމީ ބަޔާން ރައީސުލްޖުމްހޫރިއްޔާ އިއްވަވާނެއެވެ. އަދި ސަމިޓްގައި ބައިވެރިވެ ވަޑައިގަތުމުގެ އިތުރުން، ޤައުމުތަކުގެ ވެރިންނާ ވެސް ރައީސް ބައްދަލު ކުރައްވާނެއެވެ.
ކޮޕް 29ގައި ކްލައިމެޓް ފައިނޭންސިންއާ ބެހޭ ގޮތުންވެސް މުހިންމު މަޝްވަރާތަކެއް އޮންނާނެއެވެ.
ރައީސުލްޖުމްހުރިއްޔާ ވަނީ ތިމާވެށީގެ ރޮނގުން މުހިންމު ސިޔާސަތުތަކެއްވެސް އިޢުލާން ކުރައްވާފައެވެ، އެގޮތުން، ރައީސުލްޖުމްހޫރިއްޔާ އިއުލާން ކުރައްވާފައިވާ ސިޔާސަތަކީ، ރާއްޖޭގައި ބޭނުންކުރާ ޖުމުލަ ހަކަތައިގެ ތެރެއިން، ތިމާވެއްޓާ ރައްޓެހި، ސާފު ހަކަތައިގެ ނިސްބަތް، 33 އިންސައްތައަށް މަތި ކުރުމެވެ.
އެ ސިޔާސަތު ތަންފިޒު ކުރުމަށް މިދިޔަ އަހަރު ދުވަސްތެރޭގައި، 15 މެގަވޮޓްގެ ސޯލާޕަވަރ އިތުރަށް އުފައްދަން ފެށިފައިވެއެވެ. އަދި 164 މެގަވޮޓްގެ ސޯލާޕަވަރ އުފެއްދުމުގެ މަޝްރޫޢު މިހާރުވެސް ހިނގަމުންދާ ކަން ޖުމްހޫރީ ދުވަހުގެ ޖަލްސާގައި ރައީސް ވިދާޅުވިއެވެ.
ގަސް އިންދުމުގެ ޚާއްސަ ޕްރޮގްރާމެއްވެސް ރައީސުލްޖުމްހޫރިއްޔާ ވަނީ ތަޢާރަފް ކޮށްދެއްވާފައެވެ. 5 މިލިއަން ގަސް އިންދުމުގެ ޕްރޮގްރާމުގެ ތެރޭން މިހާތަނަށް 4 ލައްކަ ގަސް ވަނީ އިންދިފައެވެ.
މިހާރު ބަޔޮސްފިޔަރ ރިޒާވް ގާއިމްކޮށްފައިވާ ބ. އަތޮޅުގެ އިތުރުން، އިތުރު 3 ރަށެއްގައި ބަޔޮސްފިޔަރ ރިޒަރވް ހެދުމަކީ ރައީސްގެ ސިޔާސަތެކެވެ.
އަދި ކުނި މެނޭޖުކުރުމަށްވެސް ޚާއްސަ ސިޔާސަތުތަކެއް ރައީސް ވަނީ ތަޢާރަފް ކޮށްދެއްވާފައެވެ.
