ރިއާސީ އިންތިޚާބު އެއްބުރުން ނިންމާލުމަށާއި މަޖިލިސް އިންތިޚާބާއި ރިއާސީ އިންތިޚާބު އެއްކޮށް ބޭއްވުމަށް ރައްޔިތުންގެ ފެންނަ ނުފެންނަ ވޯޓަކަށް އައްސަވާނެ ކަމަށް ރައީސުލްޖުމްހޫރިއްޔާ ވިދާޅުވެއެވެ.
ރައީސުލްޖުމްހޫރިއްޔާ ޑރ. މުޢިއްޒު މިކަން އިއުލާން ކުރެއްވީ، މޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ބޭއްވި ރަސްމީ ޖަލްސާގައި ވާހަކަ ދައްކަވަމުންނެވެ.
އެއް ބުރުން ރިއާސީ އިންތިޚާޞު ނިންމާލުމަށް ބޭނުންވާ ބަދަލުތަކުގެ ދިރާސާތައް މިހާރު ވެސް ބަންޑާރަ ނާއިބް އޮފީހުން ކުރަމުން އަންނަކަމަށް ރައީސް ވިދާޅުވިއެވެ. އަދި ނިމުނުހައި އަވަހަކަށް، އެކަމަށް ރައްޔިތުންގެ ވޯޓަކަށް އަހާނެ ކަމަށެވެ.
އަދި ރިއާސީ އިންތިޚާބާއި މަޖިލިސް އިންތިޚާބު ވަކިވަކިން ބޭއްވުމަކީ އެކަމަށް ގިނަ ޚަރަދުތަކެއް ހިނގާނެކަމެއްކަން ފާހަގަކޮށް ރައީސް ވިދާޅުވީ، އެ ދެ އިންތިޚާބު އެއްކޮށްލެވިއްޖެ ނަމަ އެކަމަށް ބޮޑު ޚަރަދެއް ސަލާމަތް ކުރެވިގެން ދާނެ ކަމަށެވެ.
އެ ދެ އިންތިޚާބު އެއްކޮށްލުމުގެ ވިސްނުންފުޅު ގެންގުޅުއްވާކަން ފާހަގަކުރައްވައި ރައީސް ވިދާޅުވީ، އެކަމަށްވެސް ރައްޔިތުންގެ ވޯޓަކަށް އައްސަވާނެކަމަށެވެ.
އަދި 3 ވަނަ ކަމެއްގެ ގޮތުގައި ރައީސް ވަނީ، ދައުރު ނިމޭދުވަސް ނުވެމްބަރު 18 އިން 11 އަށް ބަދަލުކުރުމަށްވެސް ރައްޔިތުންގެ ޚިޔާލު ހޯއްދަވާނެ ކަމުގައި ވިދާޅުވެފައެވެ.
އެކަންކަމަށް ރައްޔިތުން އެއްބަސްވާނަމަ، އެކަން މަޖިލީހަށް ހުށަހަޅުއްވާނެ ކަމަށް ރައީސް ވިދާޅުވިއެވެ.
