ނޫސްވެރިންނާ ދެކޮޅަށް ހިނގާ އަނިޔާވެރިކަން އިތުރުވަމުންދާއިރު، ޕާކިސްތާނުގައި 2024 ވަނަ އަހަރުގެ ފުރަތަމަ އަށް މަސް ދުވަހުގެ ތެރޭގައި 11 ނޫސްވެރިން މަރާލާފައިވާ ކަމަށް ރިޕޯޓު ކޮށްފައި ވެއެވެ. މިއީ އެގައުމުގެ ނޫސްވެރިކަމުގެ ތާރީޚުގައި އައު ވެއްޓުމެކެވެ.
މީޑިއާގެ މަސައްކަތްތެރިން ބުނާ ގޮތުގައި އެމީހުންނަށް ކުރިން ނުފެންނަފަދަ އިންޒާރުތަކާއި ބިރުދެއްކުމާއި މަރުގެ އަނިޔާވެރިކަމާ މިހާރު ކުރިމަތިލާން ޖެހިފައި ވެއެވެ. އަދި މިނިވަންކަމުގެ މާހައުލު ގޯސްވަމުންދާ ކަމަށް ބުނެއެވެ.
ދާދި ފަހުން ބަލޫޗިސްތާނުގެ އުމުރުން 50 އަހަރުގެ ތަހުގީގީ ނޫސްވެރިއެއް ކަމަށްވާ ނިސާރު ލެހްރީ މަރާލުމުން މީޑިއާއަށް އޮތް ނުރައްކާ ބޮޑުކަމަށް ބުނެ ޕްރޮފެޝަނަލް ގިންތީގެ މީހުން ވާހަކަ ދައްކާފައި ވެއެވެ. ލެހްރީގެ މަރަކީ، ކޮރަޕްޝަނާއި ޖަރީމާތަކާ ގުޅޭ ގޮތުން އޭނާ ކުރަމުން ދިޔަ ތަހުގީގެއްގެ ނަތީޖާއެވެ.
މީޑިއާ މީހުންނާ ދެކޮޅަށް ދޭ ހަމަލަތައް ހުއްޓުވުމަށް ސަރުކާރުން މަސައްކަތެއް ނުކުރެއެވެ. އަދި ކުށްވެރިން ފަސްޖެހުމެއް ނެތި ބިރު ދައްކައި ނޫސްވެރިންނާ ދެކޮޅަށް ޖަރީމާތައް ހިންގަމުން ދެއެވެ.
ޕާކިސްތާނުގެ ނޫސްވެރިކަމުގެ މިނިވަންކަމުގެ މާހައުލު ގޯސްވެފައިވަނީ ސަރުކާރުގެ ފަރާތްތަކާއި، ބާރުގަދަ ސަރަހައްދީ ލީޑަރުންނާއި ގުންޑާއިންނާއި ސަރުކާރުގެ ތާއީދު އޮންނަ ހަނގުރާމަވެރިންގެ ފަރާތުން ދިމާވަމުންދާ ބިރުވެރިކަންތައްތަކުންނެވެ. އެމީހުންގެ އަމަލުތައް ކޮންޓްރޯލް ނުކުރެވޭެނީ ސަރުކާރުގެ ނިވަލުގައި ފިލައި ތިބުމުންނެވެ.
ފްރީޑަމް ނެޓްވޯކުން ބުނަނީ ނޫސްވެރިންނާ ދެކޮޅަށް މިއަހަރު އެކަނިވެސް 50 އަށް ވުރެ ގިނަ އުދުވާނީ އަމަލުތައް ފާހަގަ ވެފައިވާ ކަމަށެވެ.
