ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވާފައިވާ 20 އަހަރުގެ ޤައުމީ ތަރައްޤީގެ ޕްލޭން އެކުލަވާލުމުގެ މަސައްކަތް ނެކްސިއާ މޯލްޑިވްސްއާ ހަވާލު ކޮށްފިއެވެ. މި ޕްލޭނަކީ ދިވެހިރާއްޖޭގެ ދުރުރާސްތާގެ ތަރައްޤީއަށް އަމާޒުކޮށް އެކުލަވާލެވޭ މިފަދަ ފުރަތަމަ ތަފްސީލީ ޕްލޭނެވެ.
މި ޕްލޭންގެ މައިގަނޑު މަޤްޞަދަކީ ދެމެހެއްޓެނިވި ތަރައްޤީގެ އުސޫލުތަކަށް ރިޢާޔަތްކޮށް، އިޤްތިޞާދީ، އިޖްތިމާޢީ، ތިމާވެށި އަދި ޢުމްރާނީ ދާއިރާތަކުގެ ބޭނުންތަކަށް އަމާޒުކޮށް، ދުރުރާސްތާގެ ތަރައްޤީގެ މަގުޗާޓެއް އެކުލަވާލުމެވެ. މި ޕްލޭން އެކުލަވާލުމުގެ މަސައްކަތް ހަވާލު ކޮށްފައި ވަނީ ނެކްސިއާ މޯލްޑިވްސްއާއެވެ. އެއީ 18 އަހަރަށްވުރެ ގިނަ ދުވަހު މިފަދަ މަސައްކަތް ކުރުމުގެ ތަޖުރިބާ ލިބިފައިވާ ކޮންސަލްޓެންސީ ފާމެކެވެ.
ޕްލޭން އެކުލަވާލުމުގެ މަސައްކަތުގެ ތެރެއިން، ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންގެ ޚިޔާލާއި މަޝްވަރާ ހޯދުމަށްޓަކައި މުޅި ރާއްޖޭގެ އެކި ހިސާބުގައި މަޝްވަރާ ބައްދަލުވުންތަކެއް ބޭއްވުމަށް ހަމަޖެހިފައި ވެއެވެ. މި ބައްދަލުވުންތަކުގައި އެކި ސަރަޙައްދުތަކުގެ ތަރައްޤީއާ ގުޅޭ ޚާއްޞަ ބޭނުންތަކާއި އިސްކަންދޭ ކަންކަން ދަނެގަތުން ހިމެނެއެވެ.
މި މަޝްރޫޢުގެ މަސައްކަތްތައް އަވަސް މުއްދަތެއްގެ ތެރޭގައި ނިންމުމަށް ވަނީ ރާވާފައެވެ. އެގޮތުން، ސްޓޭކްހޯލްޑަރުންނާއެކު ބާއްވާ ބައްދަލުވުންތައް 4 މަސްދުވަހުގެ ތެރޭގައި ނިންމައި، މުޅި މަޝްރޫޢު 2024 ވަނަ އަހަރުގެ ޖެނުއަރީ މަހުގެ މެދާ ހަމައަށް ނިންމުމަށް ވަނީ ކަނޑައެޅިފައެވެ.
މި ޤައުމީ ތަރައްޤީގެ ޕްލޭނަކީ ކުރިއަށް އޮތް 20 އަހަރު ދުވަހުގެ ތެރޭގައި ދިވެހިރާއްޖޭގެ ތަރައްޤީގެ މިސްރާބު ކަނޑައެޅުމުގައި މުހިންމު ދައުރެއް އަދާކުރާނެ ޑޮކިއުމެންޓެކެވެ. އަދި މިއީ ގާނޫނީ ބާރު ލިބޭ ގޮތަށް ތަްއްޔާރުކުރާ ޕްލޭނެކެވެ.
