ސީރިއާގެ ކުރީގެ ރައީސް ބައްޝާރުލް އަސަދަށް ވަނީ މޮސްކޯގެ ހޮސްޕިޓަލަކުން ފަރުވާ ދީފައެވެ. މިހާރު އޭނާ ހޮސްޕިޓަލުން ނެރެފައިވާކަމަށް ސީރިއަން އޮބްޒަވޭޓަރީ ފޯ ހިއުމަން ރައިޓްސްއިން ބުނެއެވެ. އެ ފަރާތުން ބުނިގޮތުގައި އަސަދުގެ ހާލަތު މިހާރު އަންނަނީ ރަނގަޅުވަމުން ނެވެ.
އޮބްޒަވޭޓަރީގެ ޚާއްސަ މަސްދަރަކާ ހަވާލާދީ ހާމަކުރި ގޮތުގައި، ހޮސްޕިޓަލުގައި އޭނާއަށް ފަރުވާ ދެމުންދިޔައިރު، އޭނާގެ އަޚް އަދި ކުރީގެ ރިޔާސީ ކަންކަމާ ބެހޭ ސެކްރެޓަރީ ޖެނެރަލް މަންސޫރު އައްޒާމް ފިޔަވައި އެހެން އެއްވެސް ފަރާތަކަށް އޭނާ ބައްދަލުކުރުމުގެ ހުއްދައެއް ދީފައެއް ނުވެއެވެ.
އެ މަސްދަރުން އިތުރަށް ހާމަކުރި ގޮތުގައި، އަސަދަށް ވަނީ ވިހަ ލުމުގެ ހާދިސާއަކާ ކުރިމަތިލާން ޖެހިފައެވެ. މިކަން ކޮށްފައިވަނީ ރަޝިއާގެ ސަރުކާރު ބަދުނާމު ކުރުމަށް ކަމަށް ބެލެވެއެވެ.
2024 ވަނަ އަހަރުގެ ޑިސެމްބަރު 8 ވަނަ ދުވަހު ސީރިއާގެ ވެރިކަން ވެއްޓުނު ފަހުން، އަސަދު ވަނީ މީޑިއާއިން އެކަހެރި ވެފައެވެ. ރަޝިއާގެ ސަރުކާރުން ވަނީ އޭނާއާއި އޭނާގެ އާއިލާއަށް ސިޔާސީ ހިމާޔަތް ދިނުމަށް ހުށަހެޅި ހުށަހެޅުން ޤަބޫލުކޮށްފައެވެ. ރަޝިއާގެ ސަރުކާރުން ވެސް މިކަމާ ގުޅޭގޮތުން އެއްވެސް ބަޔާނެއް އަދި ދީފައެއް ނުވެއެވެ.
