ޖަޕާނުގެ ވެރިކަން ކުރާ ޕާޓީ އެލްޑީޕީ އާއި އެކު 26 އަހަރު ވަންދެން ގުޅިގެން މަސައްކަތް ކުރަމުން އައި ކޯމެއިޓޯ ޕާޓީން ވަނީ ކޮރަޕްޝަންގެ މައްސަލަތަކާ ގުޅިގެން އެލްޑީޕީއާ އެކުގައި އޮތް ގުޅުން ނިމުމަކަށް ގެނެސްފައެވެ. މި ނިންމުން ކޯމެއިޓޯގެ ލީޑަރު ޓެޓްސުއޯ ސައިޓޯ ވަނީ އެލްޑީޕީގެ އަލަށް އިންތިހާބުވި ރައީސާ ސަނާއޭ ޓަކައިޗީއަށް އަންގާފައެވެ.
މި ބަދަލާ ގުޅިގެން، ޕާލިމެންޓުގެ ދެ މަޖިލީހުގައިވެސް އެލްޑީޕީއަށް އަޣުލަބިއްޔަތު ގެއްލޭނެއެވެ. އަދި ޖަޕާނުގެ ފުރަތަމަ އަންހެން ބޮޑުވަޒީރުގެ ގޮތުގައި ޓަކައިޗީ ހޮވުމަށް ވޯޓު ހަމަކުރުމަށް، ޑިމޮކްރެޓިކް ޕާޓީ ފޯރ ދަ ޕީޕަލް (ޑީޕީޕީ) ނުވަތަ ނިޕޯން އިޝިން ނޯ ކައި ފަދަ އާ ބައިވެރިންގެ އެހީތެރިކަން ހޯދަން ޖެހޭނެއެވެ.
ކޯމެއިޓޯގެ ލީޑަރު ސައިޓޯ ވިދާޅުވި ގޮތުގައި، އެ ޕާޓީއަކީ މިހާރު އަމިއްލަ ސިޔާސަތުތައް ހުށަހަޅައި، މެދުމިނުގެ އިސްލާހީ ހަރަކާތެއްގެ މައި މަރުކަޒަކެވެ. އަދި، އެހެން ޕާޓީތަކާއެކު އެ ފިކުރުގައި ސިޔާސީ މަސައްކަތުގައި ކުރިއަށް ދާނެއެވެ. އަދި އެލްޑީޕީގެ ކެންޑިޑޭޓުންނަށް އިންތިހާބީ ކެމްޕޭނުގައި ދެމުން އައި އެހީތެރިކަންވެސް ހުއްޓާލާނެ ކަމަށް އެ ޕާޓީން ބުނެފައިވެއެވެ.
