ޠޫފާން ދިތުވާގެ ސަބަބުން ސްރީލަންކާއަށް ލިބުނު ގެއްލުންތަކާ ގުޅިގެން، އިންޑިއާއިން ވަނީ 'އޮޕަރޭޝަން ސާގަރު ބަންދޫ’ގެ ދަށުން 53 ޓަނަށް ވުރެ ގިނަ އެހީގެ ސާމާނު ފޯރުކޮށްދީފައެވެ. މި ސައިކްލޯނުގެ ސަބަބުން މަރުވި މީހުންގެ އަދަދު 200 އިން މައްޗަށް ގޮސްފައިވާއިރު، 10 ލައްކައަށް ވުރެ ގިނަ މީހުންނަށް ވަނީ ނޭދެވޭ އަސަރުކޮށްފައެވެ.
ސްރީލަންކާގެ ކާރިސާ މެނޭޖްމަންޓް ސެންޓަރުން ރިޕޯޓުކުރާ ގޮތުގައި، މިހާތަނަށް 212 މީހުން މަރުވެ، 218 މީހުން ގެއްލިފައިވެއެވެ. އޭގެ އިތުރުން، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން ގާތްގަނޑަކަށް 1 މިލިއަން މީހުނަށް ވަނީ އަސަރުކޮށްފައެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވަނީ ސްރީލަންކާގެ ރައީސް އަނޫރާ ކޭ. ދިއްސަނާޔަކާއަށް، އިންޑިއާގެ 'ނެއިބަރހުޑް ފަސްޓް' އަދި 'ވިޝަން މަހާސާގަރު' ޕޮލިސީގެ ދަށުން، 'ފަސްޓް ރެސްޕޮންޑަރު' ގެ ދައުރު އަދާކުރަމުންދާނެ ކަމުގެ ޔަގީންކަން ދެއްވާފައެވެ. މި ކާރިސާއަށް އިންޑިއާއިން އަވަހަށް އިޖާބަދިނުމަކީ، އިންޑިއާ ކަނޑުގެ ސަރަހައްދުގައި އިންޑިއާއިން އަދާކުރާ އިންސާނީ އެހީގެ ސްޓްރެޓީޖިކް ދައުރުގެ މުހިންމުކަން ހާމަކޮށްދޭ ކަމެކެވެ.
އިންޑިއާއިން ވަނީ އަވަސް އެހީގެ ގޮތުގައި ނޭޝަނަލް ޑިޒާސްޓަރ ރެސްޕޮންސް ފޯސް 80 ގެ މީހުން ހިމެނޭ ދެ ޓީމެއް ސްރީލަންކާއަށް ފޮނުވާފައެވެ. އިންޑިއާގެ އެއާ ފޯސްގެ ހެލިކޮޕްޓަރުތަކާއި ޓްރާންސްޕޯޓް މަތިންދާބޯޓުތައް ބޭނުންކޮށްގެން މީހުން ސަލާމަތްކުރުމުގެ މަސައްކަތް ވަނީ ކުރިއަށް ގެންގޮސްފައެވެ. މި މަސައްކަތުގެ ތެރެއިން، އިންޑިއާގެ ނޭވީގެ އައިއެންއެސް ސުކަންޔާ އިތުރު އެހީގެ ސާމާނާއެކު ދަތުރު ފަށާފައި ވެއެވެ. އަދި އައިއެންއެސް ވިކްރާންތުގެ ޗެތަކް ހެލިކޮޕްޓަރުތަކުން ވެސް ވަނީ މީހުން ސަލާމަތްކުރުމުގެ މަސައްކަތް ކުރިއަށް ގެންގޮސްފައެވެ.
މިހާތަނަށް ފޯރުކޮށްދިން 53 ޓަނުގެ އެހީގެ ތެރޭގައި، އިންޑިއާގެ ނޭވީގެ އުޅަނދުތަކުން ފޯރުކޮށްދިން 9.5 ޓަނުގެ ކާބޯތަކެއްޗާއި، އެއާފޯސްއިން ވައިގެ މަގުން ގެންދިޔަ 31.5 ޓަނުގެ އެހީގެ ސާމާނު ހިމެނެއެވެ. އޭގައި ޓެންޓު، ބްލެންކެޓް، ހައިޖީން ކިޓް، ބޭސްފަރުވާއަށް ބޭނުންވާ ތަކެތި އަދި ސަރޖިކަލް އިކުއިޕްމަންޓް ހިމެނެއެވެ. މީގެ އިތުރުން، އައިއެންއެސް ސުކަންޔާގައި އަދި 12 ޓަނުގެ އިތުރު ސާމާނު ގެންދެވޭނެއެވެ.
އިންޑިއާގެ މި އޮޕަރޭޝަންގައި ސްރީލަންކާ، އިންޑިއާ، ޖަރުމަނު، ޔޫކޭ، ދެކުނު އެފްރިކާ، ޕޮލެންޑް، އީރާން، އޮސްޓްރޭލިއާ، ޕާކިސްތާން، އަދި ބަންގްލަދޭޝްގެ ރައްޔިތުން ވެސް ހިމެނޭ ގޮތަށް 150 އަށް ވުރެ ގިނަ މީހުން ވަނީ ސަލާމަތްކޮށްފައެވެ. އަދި 2,000 އަށް ވުރެ ގިނަ އިންޑިއާ ރައްޔިތުން ވަނީ އިންޑިއަން އެއާފޯސްއާއި ކޮމާޝަލް ފްލައިޓްތަކުގައި އެނބުރި ޤައުމަށް ގެންގޮސްފައެވެ.
