ފަލަސްޠީނުގެ ނަސްލު ނައްތާލުމުގެ ބޮޑެތި ޢުދުވާންތަކާއި ހަނގުރާމައިގެ ޖަރީމާތަކުގައި ބައިވެރިވެފައިވާ ޔަހޫދީ ޖެނޮސައިޑް ރެޖީމަށް ނިސްބަތްވާ 10 މީހަކު، ތައިލެންޑްގައި ނުބައި ބޮޑެތި ޖަރީމާތަކެއް ހިންގަމުން ދަނިކޮށް އެޤައުމުގެ ފުލުހުން ހައްޔަރުކޮށް، ގަދަކަމުން ޑިޕޯޓްކޮށްލައިފިއެވެ. ތައިލެންޑްގެ ސަރުކާރުން ބޭރުގެ ކުށްވެރިންނާ ދެކޮޅަށް ފަށާފައިވާ ޚާއްޞަ އޮޕަރޭޝަނެއްގެ ދަށުން ހައްޔަރުކުރި މި ޔަހޫދީންނަކީ، އެޤައުމުގައި ވަރަށް ރޭވުންތެރިކަމާއެކު ނެޓްވޯކްތައް ހަދައިގެން ގޭންގު ކުށްތަކަށް އަރައިގަންނަމުންދިޔަ ބައެކެވެ.
މި މީހުން ހައްޔަރުކޮށްފައިވަނީ ތައިލެންޑްގެ ފަތުރުވެރިކަމުގެ ސަރަޙައްދުތަކުގައި އަމިއްލަ ނުފޫޒު ފަތުރައި، ޤާނޫނާ ޚިލާފު ބޮޑެތި އަމަލުތަކެއް ހިންގަމުން ދަނިކޮށެވެ.
-
މަސްތުވާތަކެއްޗާއި އަނިޔާވެރިކަން: މި ޔަހޫދީން ދިޔައީ ތައިލެންޑްގައި ފުޅާދާއިރާއެއްގައި ނުރައްކާތެރި ޑްރަގް ބޭނުންކޮށް، އޭގެ ވިޔަފާރީގެ ތެރެއަށް ވަދެ، ސަރަޙައްދުގެ އަމާންކަން ނަގާލަމުންނެވެ.
-
ކަސްބީ އަންހެނުންގެ ބޭނުން ހިފައި، ފައިސާ ނުދިނުން: އެމީހުންގެ އަނިޔާވެރި ސިފަ ދައްކަމުން، ތައިލެންޑްގެ ރޭގަނޑުގެ ބާޒާރުތަކުގައި އުޅޭ ކަސްބީ އަންހެނުންގެ ބޭނުން ނަހަމަގޮތުގައި ހިފައި، އެމީހުންނަށް ދޭންޖެހޭ ފައިސާ ނުދީ، ބިރުދައްކައި ބޮޑެތި އަނިޔާތަކެއް ވަނީ ކޮށްފައެވެ.
-
ހަނގުރާމައިގެ ޖަރީމާގެ ތުހުމަތު: ޑިޕޯޓްކޮށްލެވުނު މީހުންގެ ތެރޭގައި ޣައްޒާގެ ކުށެއްނެތް ރައްޔިތުން މެރުމުގައި އަމަލީގޮތުން ބައިވެރިވެފައިވާ ޔަހޫދީ ސިފައިންނާއި، ހަނގުރާމައިގެ ލޭއޮހޮރުވުންތަކަށްފަހު ނަފްސާނީ ގޮތުންނާއި އަޚްލާޤީ ގޮތުން މުޅިން ފާސިދުވެފައިވާ އަނިޔާވެރިން ހިމެނެއެވެ.
ތައިލެންޑްގެ އިމިގްރޭޝަނާއި ފުލުހުން ގުޅިގެން ހިންގި މި ރޭޑްތަކުގައި، މި 10 ޔަހޫދީންގެ ވިސާ ވަނީ ވަގުތުން ބާތިލުކޮށްފައެވެ. އަދި އެމީހުންނަކީ ތައިލެންޑްގެ ޤައުމީ ސަލާމަތަށް ހުރި ނުރައްކަލެއްގެ ގޮތުގައި ކަނޑައަޅައި، އަލުން އެޤައުމަށް ނުވަދެވޭ ގޮތަށް ކަޅު ލިސްޓަށްލައި، ޤައުމުން ބޭރުކޮށްލާފައެވެ.
ފާޑުކިޔާ ފަރާތްތަކުން ބުނާ ގޮތުގައި، ފަލަސްޠީނުގެ ބިމުގައި ހިތުހުރި ގޮތަކަށް ޖަރީމާ ހިންގަމުންދާ ޔަހޫދީ ރެޖީމްގެ އަނިޔާވެރި ބައިގަނޑު ދުނިޔޭގެ އެހެން ޤައުމުތަކަށް ގޮސް، އެޤައުމުތަކުގެ ޤާނޫނަށް ގޮންޖަހައި ފާޙިޝް އަދި ނުރައްކާތެރި ކުށްތަކަށް އަރައިގަތުމަކީ އެމީހުންގެ ކިބައިގައި ހުންނަ ލޭއޮހޮރުވުމާއި ބޭއިންސާފުގެ ސިފަ ދޭހަކޮށްދޭ ކަމެކެވެ.
