ދެކުނު އެފްރިކާގެ އެންމެ ބޮޑު ސިޓީ ކަމަށްވާ ޖޮހަންސްބާގްގެ އިރުމަތީ ބިތުގައި ހުންނަ ތޮއްޖެހިފައިވާ ނުރަސްމީ ހިޔާވައްސަކަށް، ހަތިޔާރުއެޅި ގްރޫޕަކުން ވަދެ ދިން ބަޑީގެ ނުރައްކާތެރި ހަމަލާތަކެއްގައި 12 މީހުން މަރުވެ، އެތައް ބަޔަކު ޒަޚަމްވެއްޖެ ކަމަށް އެޤައުމުގެ ފުލުހުން ހާމަކޮށްފިއެވެ. މިއީ އެޤައުމުގައި ކޮންޓްރޯލެއް ނެތްގޮތަށް އިތުރުވަމުންދާ ކުށްތަކުގެ ސިލްސިލާއަށް އިތުރުވި އަނެއްކާވެސް ކަޅު ސަފުހާއެކެވެ.
އަންގާރަ ދުވަހުގެ ރޭގަނޑުގެ ވަގުތެއްގައި ހިނގި މި ލޭއޮހޮރުވުމުގައި އިތުރު 9 މީހަކު ވަނީ ބޮޑެތި ޒަޚަމްތަކަކާއެކު ހޮސްޕިޓަލަށް ބަދަލުކުރެވިފައެވެ.
ފުލުހުން ނެރުނު ރަސްމީ ބަޔާނެއްގައި ބުނެފައިވާ ގޮތުގައި، މި ހާދިސާ ހިނގާފައިވަނީ ކްލީވްލޭންޑް ސަރަޙައްދުގައި ހުންނަ "ޖަމްޕާސް" ނަމަކަށް ކިޔާ ވަގުތީ ބޯހިޔާވައްސެއްގައެވެ. ހަމަލާދިން މީހުން އެ ސަރަޙައްދަށް އައީ ހުދު ކުލައިގެ ޓޮޔޯޓާ ކުއަންޓަމް މާކްގެ ވޭނެއްގައެވެ.
އެމީހުން ވަނީ ރާވައިގެން، އެ ހިޔާވަހީގެ ދެ ދިމާލަކުން އެއްފަހަރާ އެތެރެއަށް ވަދެފައެވެ. އަދި އެކި ސަރަޙައްދުތަކަށް ބެހިގެން، އެއްވެސް ބެލުމެއްނެތް ގޮތަށް މީހުންގެ ގަޔަށް ބަޑީގެ ހަމަލާތައް ދިނުމަށްފަހު، އައި އުޅަނދުގައި އެ ސަރަޙައްދު ދޫކޮށް ފިލާފައެވެ.
"މި ރަހުމެއްނެތް ހަމަލާގެ ފަހަތުގައިވާ އަސްލު މަޤްޞަދެއް އަދިވެސް ދެނެގަނެވިފައެއް ނުވޭ،" ފުލުހުންގެ ތަރުޖަމާނު ވިދާޅުވިއެވެ. "މި ހަމަލާގައި ބައިވެރިވި ކަމަށް ތުހުމަތުކުރެވޭ 10 އަށްވުރެ ގިނަ ހަތިޔާރުއެޅި މީހުން ހޯދުމަށް ފުލުހުން މިހާރު ވަނީ ވަރަށް ފުޅާދާއިރާއެއްގައި ސަރޗް އޮޕަރޭޝަނެއް ފަށާފައި." ފުލުހުން
މި ހާދިސާއާއެކު، ދެކުނު އެފްރިކާގެ ފަގީރު ސަރަޙައްދުތަކާއި ވަގުތީ ހިޔާގައި ދިރިއުޅޭ ރައްޔިތުންގެ ސަލާމަތީ ރައްކާތެރިކަމާ މެދު ވަނީ އަނެއްކާވެސް ސުވާލު އުފެދިފައެވެ. މިފަދަ ނުރަސްމީ ހިޔާތަކަކީ އެޤައުމުގެ ފުލުހުންނަށް ޗެކް ކުރަން އުނދަގޫ، އަދި ހަތިޔާރުގެ ވަގުފާރި ފުޅާދާއިރާއެއްގައި ހިނގާ ސަރަޙައްދުތަކެކެވެ.
ދެކުނު އެފްރިކާއަކީ މުޅި ދުނިޔޭގައިވެސް މީހުން މެރުމުގެ ކުށްތައް އެންމެ ގިނައިން ހިނގާ އެއް ޤައުމެވެ. ރަސްމީ ތަފާސްހިސާބުތަކަށް ބަލާއިރު، އެޤައުމުގައި ކޮންމެ ދުވަހަކު އެވްރެޖްކޮށް 60 މީހުން ބަޑީގެ އަނިޔާވެރިކަމާއި އެކި ހަމަލާތަކުގައި މަރާލެވެއެވެ. ސަރުކާރުން ކުށްކުރުން ހުއްޓުވުމަށް އެކި ފިޔަވަޅުތައް އަޅަމުންދާ ކަމަށް ބުނި ނަމަވެސް، އާންމު ރައްޔިތުންގެ މެދުގައި ބިރުވެރިކަން ވަނީ އިންތިހާއަށް ބޮޑުވެފައެވެ.
