މިފަހަރުގެ ޖީ20 ލީޑަރުންގެ މަހާސިންތާއަކީ، އެފްރިކާގައި ބޭއްވި ފުރަތަމަ ޖީ20 މަހާސިންތާ އެވެ. މި ތާރީޚި މަހާސިންތާގައި ދުނިޔެއަށް ދިމާވެފައިވާ ގޮންޖެހުންތަކަށް ހައްލު ހޯދުމަށް ބައިވެރި ޤައުމުތަކުގެ ލީޑަރުން ވަނީ ގުޅިފައިވާ ބަޔާނަކަށް އެއްބަސްވެ އެކަމަށް އާންމު ހޭލުންތެރިކަން އިތުރުކުރުމަށް ގޮވާލާފައެވެ.
މި ބަޔާނުގައި ވަނީ ޤައުމުގެ ސަރަހައްދު ފުޅާކުރުމަށް ބިރުދެއްކުން ނުވަތަ ބާރުގެ ބޭނުންކުރުން ހަރުކަށިކޮށް ކުއްވެރި ކުރާކަމަށް ބުނެފައެވެ. އަދި، ޤައުމުތަކުގެ ސިޔާދަތީ މިނިވަންކަމަށް އިޙްތިރާމްކުރުން އަލުން ކަށަވަރުކޮށްދީފައި ވެއެވެ. އަދި، ހުރިހާ ބާވަތެއްގެ ޓެރަރިޒަމް ކުއްވެރިކޮށްފައި ވެއެވެ. ކާނާގެ ސަލާމަތާއި، ހަކަތައިގެ ރައްކާތެރިކަމާއި، މޫސުމަށް އަންނަ ބަދަލުތަކާ ގުޅިގެން އަޅަންޖެހޭ ފިޔަވަޅުތަކާއި، ޑިޖިޓަލް އީޖާދުތަކާ މެދު ބަދަހި ގުޅުމެއް ބިނާކުރުމަށް ވައުދުވެފައިވެއެވެ. އަދި ކުދި ޖަޒީރާ ޤައުމުތަކާއި އެންމެ ފަގީރު ޤައުމުތަކުގެ ބޭނުންތަކަށް ޚާއްސަ ސަމާލުކަމެއް ދީފައި ވެއެވެ.
މި މަހާސިންތާގައި އިންޑިއާގެ ބޮޑުވަޒީރު ނަރެންދުރަ މޯދީ ވަނީ މުހިންމު ހަ އިސްނެގުމެއް ހުށަހަޅުއްވާފައެވެ. އެއީ:
- ދުނިޔޭގެ އިންސާނުންގެ ޢިލްމު ރައްކާކުރާނެ މަރުކަޒެއް ބިނާކުރުން
- އެފްރިކާގެ ހުނަރު އިތުރުކުރުމުގެ ޕްރޮގްރާމެއް ހިންގުން
- ދުނިޔޭގައި ދިމާވާ ޞިއްޙީ ހާލަތަށް ރައްދުދިނުމަށް ޓީމެއް އެކުލަވާލުން
- ތަރައްޤީވަމުން އަންނަ ޤައުމުތަކަށް ސެޓެލައިޓް މައުލޫމާތުގައި ބައިވެރިކުރުމުގެ ޕާޓްނަރޝިޕެއް ބިނާކުރުން
- މުހިންމު މަޢުދަންތައް އަލުން ބޭނުންކުރުން
- މަސްތުވާތަކެއްޗާއި ޓެރަރިޒަމްގެ ގުޅުން ހުއްޓުވުމަށް މަސައްކަތް ކުރުން
މި މަހާސިންތާ އެފްރިކާގައި ބޭއްވުމުގެ ސަބަބުން، ދުނިޔޭގެ ގޮންޖެހުންތަކަށް ހައްލު ހޯދުމުގައި ހުރިހާ ފަރާތްތަކެއް ބައިވެރިކުރުމުގެ މުހިންމުކަމާއި އަވަސް ފިޔަވަޅު އެޅުމަށް އަލިއަޅުވާލާފައިވެއެވެ. އަދި ދުނިޔޭގެ މައްސަލަތަކަށް ގުޅިގެން މަސައްކަތްކުރުމަށް އިސްކަން ދިނުމަށް ގޮވާލާފައި ވެއެވެ.
މަހާސިންތާގެ ނިންމުމުގެ މައިގަނޑު ނުކުތާތައް – ޖީ20 ސަމިޓްގެ އިއުލާން
- ސަރަޙައްދު ފުޅާކުރުމަށް ބާރުގެ ބޭނުންކޮށްގެން ނުވާނެ: އދގެ ޗާޓަރާ އެއްގޮތަށް އިސްތިޤްލާލާއި ސަރަޙައްދީ އެއްބައިވަންތަކަން އަލުން ކަށަވަރުކޮށްދީ، ބައިނަލްއަޤްވާމީ ގޮތުން ބަލައިގެންފައިވާ ބޯޑަރުތަކަށް ބަދަލު ގެނައުމަށް އެއްވެސް ޤައުމަކުން އިންޒާރުދީ ނުވަތަ ބާރުގެ ބޭނުން ނުކުރުމަށް ލީޑަރުން އެއްބަސްވިއެވެ.
- ޓެރަރިޒަމް ކުށްވެރިކުރުން: ބަޔާނުގައި ޓެރަރިޒަމް "ހުރިހާ ގޮތަކާއި ހުރިހައި ސިފައެއްގައި" ކުށްވެރިކޮށް، ނަސްލާއި ޖިންސާއި ބަހާއި ދީނުގެ ތަރަހައިގެ ތެރެއިން އިންސާނީ ހައްގުތަކާއި މިނިވަންކަމަށް އިހުތިރާމް ކުރުމަށް ގޮވާލާފައިވެ އެވެ.
- މަލްޓިލެޓަރަލިޒަމް އަށް ބާރުއެޅި: ލީޑަރުން ވަނީ ދުނިޔޭގެ ގައުމުތަކުން އެއްބަޔަކު އަނެއްބަޔަކާ ގުޅުން ބަދަހިކޮށް، މެކްރޯ ޕޮލިސީތައް ވިލަރެސްކޮށް، ދެމެހެއްޓެނިވި ތަރައްގީގެ ބައިވެރިވުމާއި، އެއްބައިވަންތަކަމުގެ ތެރެއިން އެންމެންގެ ޝާމިލުވުމާއި ބައިވެރިވުން ކަށަވަރު ކުރުމަށް ވައުދުވެފަ އެވެ.
- ނާޒުކު ދައުލަތްތަކަށް އެހީ ވެދިނުން: ދަރަނީގެ ބުރަތަކާއި ކާރިސާތަކާ ކުރިމަތިލާން ޖެހޭ ގޮންޖެހުންތަކަށް އަލިއަޅުވާލަމުން، ކުދި ޖަޒީރާތަކުގެ ތަރައްގީއާއި އަދި އެންމެ ކުޑަކޮށް ތަރައްގީވެފައިވާ ގައުމުތަކަށް ޚާއްސަ ސަމާލުކަމެއް ދިނުމަށް ގޮވާލާފައި ވެއެވެ.
- ހަކަތައިގެ ރައްކާތެރިކަން: ހަކަތައިގެ ހަމަޖެހުމާ މިނިވަންކަމާއި ގުޅުވައިދީ، ގައުމުތަކަށް ދެމެހެއްޓެނިވި ގޮތަކަށް ހަކަތަ ލިބޭ ނިޒާމުތައް ބިނާކުރުމަށް އެހީތެރިވުން ކަށަވަރުކޮށްދިނުމަށް ގޮވާލަމުން ދެކުނު އެފްރިކާގެ ހިލޭސާބަހަށް އެކުލަވާލާފައިވާ ހަކަތައިގެ ރައްކާތެރިކަމާ ބެހޭ ޓޫލްކިޓަށް ތައުރީފުކޮށްފައިވެ އެވެ.
- ކާބޯތަކެތީގެ ރައްކާތެރިކަން: ހައިހޫނުކަމުން މިނިވަންވުމުގެ ހައްގު އަލުން ކަށަވަރުކޮށްދެމުން، ރައްކާތެރި އަދި ސިއްޙީ މާއްދާތައް ގިނަ ކާނާ ލިބޭނެ ގޮތް ފުޅާކުރުމަށް ސިޔާސީ ފުރުސަތުތައް ހަރުދަނާ ކުރުމަށް އިލްތިމާސްކޮށްފައިވެއެވެ.
- ޑިޖިޓަލް އިނޮވޭޝަން: ލީޑަރުން ވަނީ އާންމުންގެ ހެވާއި ލާބައަށް ހަމަހަމަ ގޮތެއްގައި ދުނިޔޭގެ ސުމޭކު ދާއިރާގެ އީޖާދީ ފިކުރު ބޭނުންކުރުމަށް ބާރުއަޅާފައެވެ. އަދި މަބްއާއި އެހެނިހެން އީޖާދީ ޓެކްނޮލޮޖީތަކުގައި ހުރި ފުރުސަތުތައް ހަމަހަމަކަމާއެކު ލިއްބައި ދިނުމަށް ގޮވާލާފައެވެ.
- މޫސުމާއި ވެރިކަން ހިންގުން: މޫސުމީ ކާރިސާތަކުން ސަލާމަތްވުމާއި، ކޮރަޕްޝަނާ ދެކޮޅަށް މަސައްކަތް ކުރުމަށާއި، އެކަންކަން ބޭޒާރުކޮށްލާ ވިސްލްބްލޯވަރުންނަށް ރައްކާތެރިކަން ދިނުމަށާއި، މުހާޖިރު މަސައްކަތްތެރިންނާއި ރެފިއުޖީންނަށް އެހީތެރިވުމަށް ގޮވާލާފައި ވެއެވެ.
