ޑޮކްޓަރެއްގެ ވާޖިބަކީ ފުރާނަ ސަލާމަތްކުރުމެވެ. ނަމަވެސް ޖަރުމަނުގެ ބާލިންގައި ހިނގި ބިރުވެރި ހާދިސާއަކުން ފެނިގެން މިދިޔައީ، އިތުބާރުކުރެވޭ "ފަރުވާދޭ މީހާ" ސިއްރުން ބައެއްގެ ފުރާނަ ނަގާލުމުގެ ސަބަބަކަށް ބަދަލުވި މަންޒަރެވެ. އުމުރުން 41 އަހަރުގެ މި ޑޮކްޓަރު، 15 ބަލިމީހެއްގެ ފުރާނަ ނަގާލިކަން ސާބިތުވެ، އޭނާއަށް އުމުރު ދުވަހުގެ ޖަލު ހުކުމެއް ކޯޓުން ވަނީ އިއްވާފައެވެ.
ބާލިންގެ ކޯޓަގައި "ޔޮހާނަސް އެމް." ގެ ނަމުން ނަންދެވިފައިވާ މި ޑޮކްޓަރުގެ މައްޗަށް ކުށް ސާބިތުވީ، 2021 އިން 2024 އަށް އޭނާ ފަރުވާ ދިން ބަލިމީހުންގެ ތެރެއިން 12 އަންހެނަކާއި 3 ފިރިހެނަކަށް، ނިދާ ބޭހާއި މަސްތުވާތަކެތީގެ ނުރައްކާތެރި މިންވަރެއް ދީގެން މަރާލި މައްސަލައިގައެވެ.
މި މައްސަލަ ބެއްލެވި ފަނޑިޔާރު ސިލްވިއާ ބުޝް ވިދާޅުވި ގޮތުގައި، މިއީ އެއްވެސް ހާލެއްގައި ބަލިމީހުންގެ ވޭން ކުޑަކުރަން ޑޮކްޓަރު ކުރި ކަމެއް ނޫނެވެ. މިއީ މީހުން އޭނާގެ ބާރުގެ ދަށަށް ގެނެސް، މަރުގެ ނިންމުން ނިންމުމަށް ބާރު ލިބިގެންވާ ކަމަށް ހީކޮށް އަމިއްލަ ނަފްސަށް ދިން ބާރެކެވެ.
ތަހުގީގުތަކުން ދައްކާ ގޮތުގައި، އޭނާ ބޭނުންކުރީ ނޭވާލާ ނިޒާމު ހުއްޓޭފަދަ ވަރުގަދަ މަސްލްސް ރިލަކްސަންޓް ބޭސްތަކެކެވެ. އެ ބޭސްތަކުގެ ސަބަބުން ބަލިމީހުންނަށް ނޭވާ ނުލެވި، ވަރަށް ކުޑަ ވަގުތުކޮޅެއްގެ ތެރޭގައި ފުރާނަ ދޫކޮށް ދެއެވެ. 25 އަހަރާއި 94 އަހަރާ ދެމެދުގެ އުމުރުފުރައިގެ މީހުން އޭނާގެ ޝިކާރައަކަށް ވިއެވެ.
މި މައްސަލައިގެ ތެރެއަށް ފީނަމުންދިޔަ ވަރަކަށް، މި ޑޮކްޓަރުގެ ޖަރީމާތައް އެއަށްވުރެ މާ ބޮޑުކަން ފާހަގަވިއެވެ. ޝަރީއަތުގެ މަޖިލީހުގައި އޭނާ ވަނީ ފާޅުގައި ކުށަށް އިއުތިރާފުވެފައެވެ. އޭނާގެ އަމަލުތަކާ މެދު ހިތާމަކުރާ ކަމަށް ބުނި ނަމަވެސް، އޭނާގެ މައްޗަށް ތުހުމަތުކުރެވޭ މަރުގެ އިތުރު 70 މައްސަލައެއް ފުލުހުން މިހާރު ދަނީ ތަހުގީގު ކުރަމުންނެވެ.
އެންމެ ބިރުވެރި ކަމަކީ، އޭނާގެ ޖަރީމާތައް ފޮރުވުމަށްޓަކައި، ބަލިމީހުންގެ ގެތަކުގައި ގަސްތުގައި އަލިފާން ރޯކުރަންވެސް މަސައްކަތްކޮށްފައިވުމެވެ.
ޖަރުމަނުގެ ގާނޫނުގައި ލިބެން އޮތް އެންމެ ހަރުކަށި އަދަބު އޭނާއަށް ދިނުމަށް ކޯޓުން ވަނީ ނިންމާފައެވެ. މީގެ މާނައަކީ އޭނާ ޖަލުން މިނިވަންވުމުގެ ފުރުސަތު ކުޑަކަމެވެ. އަދި އޭނާގެ ޑޮކްޓަރުކަމުގެ ލައިސަންސް ދާއިމީކޮށް ވަނީ ބާތިލްކޮށްފައެވެ.
"މިއީ ހިތަށް އަރުވަންވެސް ދަތި ބިރުވެރިކަމެއް،" މި ހާދިސާ ސިފަކުރަމުން ތަހުގީގީ އޮފިޝަލަކު ވިދާޅުވިއެވެ. ފަރުވާދޭން ހުރި މީހާ، އެންމެ ފަހު ވަގުތު ފުރާނަ ދުއްވާލި މަންޒަރު މިއަދު މުޅި ޖަރުމަނު ސިއްސުވާލައިފިއެވެ.
