ދިވެހިރާއްޖެއާއި ބަންގްލަދޭޝްއާ ދެމެދު އޮތް ވިޔަފާރީގެ ގުޅުން ބަދަހިކޮށް، މުދާ އުފުލުމުގެ ހަރަދު ކުޑަކުރުމުގެ މަގުސަދުގައި، ސީދާ ކޮމާޝަލް ޝިޕިން ލައިނެއް ގާއިމުކުރުމާ ގުޅޭގޮތުން ދެ ގައުމުގެ ޚާރިޖީ ވަޒީރުން މާލޭގައި ރަސްމީކޮށް މަޝްވަރާކުރައްވައިފިއެވެ.
ޚާރިޖީ ވަޒީރު ޑރ. އިރުތިޝާމް އާދަމް އަދި ބަންގްލަދޭޝްގެ ޚާރިޖީ ވަޒީރު ޑރ. ޚަލީލުއްރަޙްމާންގެ މެދުގައި ބޭއްވުނު މި ބައްދަލުވުމަކީ، ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބަންގްލަދޭޝްގެ ޚާރިޖީ ވަޒީރު ކުރައްވަމުންދަވާ ރަސްމީ ދަތުރުފުޅުގެ ތެރެއިން ބޭއްވުނު ބައްދަލުވުމެކެވެ. ބަންގްލަދޭޝްގެ ފޮރިން މިނިސްޓްރީން މަޢުލޫމާތު ދެއްވާގޮތުގައި، މި މަޝްވަރާތަކުގައި ވިޔަފާރީގެ އިތުރުން ބިދޭސީ މަސައްކަތްތެރިންގެ ހައްގުތަކާއި، ހިޖުރަކުރުމާއި، ސިއްހީ ދާއިރާއާއި، ތައުލީމާއި، ފަތުރުވެރިކަން އަދި ނޫ އިގުތިސާދުގެ ދާއިރާއިން އެއްބާރުލުން ދިނުމާ ގުޅޭގޮތުން ވަނީ ވާހަކަދައްކަވާފައެވެ.
މި މަޝްވަރާތަކުގެ މައިގަނޑު އަމާޒަކީ ދެ ގައުމުގެ މެދުގައި މުދާ ބަދަލުކުރުމަށްޓަކައި ސީދާ ކަނޑުމަގުގެ ގުޅުމެއް ގާއިމުކުރުމެވެ. މިހާރު ބަންގްލަދޭޝްއިން ރާއްޖެއަށް މައިގަނޑު ގޮތެއްގައި ބޭހުގެ ބާވަތްތަކާއި އަންނައުނު އެތެރެކުރާއިރު، ރާއްޖެއިން އެ ގައުމަށް އެކްސްޕޯޓުކުރަނީ ކަނޑުމަހުގެ ބާވަތްތަކެވެ. ދެ ގައުމުގެ މެދުގައި ސީދާ ޝިޕިން ލައިނެއް ގާއިމުކުރުމަށް 2021 ވަނަ އަހަރު އިސްވެރިންގެ ފެންވަރުގައި އެއްބަސްވި ނަމަވެސް، އެކަން އަމަލީ ގޮތުން ފުރިހަމައަށް ތަންފީޒުވެފައެއް ނުވެއެވެ. މިހާރު ގިނައިން ބޭނުންކުރަނީ ކަނޑުމަގުން މާލެއަށް މުދާ ގެނައުމަށްފަހު ވައިގެ މަގުން އެހެން ގައުމުތަކަށް ފޮނުވާ ސީ-ޓޫ-އެއާ ކާގޯގެ ޚިދުމަތެވެ.
ޑރ. ޚަލީލުއްރަޙްމާން ފާހަގަކުރެއްވި ގޮތުގައި، ދެ ގައުމުގެ މެދުގައި ގުޅުން ބަދަހިކުރުމަކީ ބަންގްލަދޭޝްގެ ރައްޔިތުންނަށް ސީދާ ފައިދާކުރާނެ ފަދަ ޚާރިޖީ ސިޔާސަތެއްގެ ދަށުން ކުރެވޭ މުހިންމު މަސައްކަތެކެވެ. ރާއްޖެއަކީ ގިނަ އަދަދެއްގެ ބަންގްލަދޭޝް މަސައްކަތްތެރިން އުޅޭ ގައުމަކަށްވާތީ، އެ މީހުންގެ ހައްގުތަކާއި ރައްކާތެރިކަން ކަށަވަރުކުރުމަކީވެސް މި ބައްދަލުވުމުގެ މުހިންމު ބައެކެވެ.
މި ސީދާ ޝިޕިން ލައިން ގާއިމުކުރެވިއްޖެނަމަ، މުދާ އުފުލުމުގެ ވަގުތު ސަލާމަތްވެ، ރާއްޖޭގެ ބާޒާރަށް މުދާ އެތެރެކުރާ ހަރަދު ކުޑަވެ، އިންޑިއާ ކަނޑުގެ ސަރަހައްދުގައި ޓްރާންސްޝިޕްމަންޓް ފުރުސަތުތައް އިތުރަށް ފުޅާވެގެންދާނެއެވެ.
