އިޒްރޭލާއި ޔޫއޭއީގެ އޮފިޝަލުން ފާއިތުވި ހަފްތާތަކުގައި ތިންވަނަ ގައުމެއްގައި ސިއްރު ބައްދަލުވުންތަކެއްގެ ސިލްސިލާއެއް ބާއްވައިފިއެވެ. މި ބައްދަލުވުންތަކުގެ މަގްސަދަކީ އީރާނާ ގުޅޭގޮތުން ދެ ގައުމުގެ ވިސްނުން އެއްގޮތް ކުރުމާއި، ބައިނަލްއަގްވާމީ މަސްރަހުގައި ގުޅިގެން އީރާނާ ދެކޮޅަށް ފިޔަވަޅުތައް އެޅުމާ މެދު މަޝްވަރާ ކުރުމެވެ. އަދި ކޮންމެ ހަރަކާތެއް ވެސް ކުރިއަށް ގެންދާނީ އެމެރިކާއާ މަޝްވަރާކުރުމަށްފަހު ކަމަށް ދެ ފަރާތުން ވަނީ އެއްބަސްވެފައެވެ.
އިޒްރޭލުގެ 12 ވަނަ ޗެނަލުން ރޭ ރިޕޯޓްކޮށްފައިވާ ގޮތުގައި، މި ބައްދަލުވުންތައް ބާއްވާފައިވަނީ އިޒްރޭލުގައި ނުވަތަ ޔޫއޭއީގައި ނޫން ކަމަށާއި، އެބައްދަލުވުން އޮތީ ނަން ހާމަނުކުރާ ތިންވަނަ ގައުމެއްގައި ކަމަށެވެ.
އެ ރިޕޯޓްގައި ބުނެފައިވާ ގޮތުގައި، ޔޫއޭއީގެ އޮފިޝަލުން ވަނީ އެ ބައްދަލުވުންތަކުގައި ވޮޝިންގްޓަނާއި ތެހެރާނާ ދެމެދު ވެވިފައިވާ އިސްލާމްއާބާދު ފަހުމުނާމާއާ ދެކޮޅަށް ވާހަކަ ދައްކަވާފައެވެ. އެފަރާތްތަކުން ދެކޭ ގޮތުގައި އެ އެއްބަސްވުމުގެ ސަބަބުން އީރާނަށް އިގްތިސާދީ ގޮތުން ފައިދާ ލިބުމަށާއި، ދޫދިނުންތަކަކާ ނުލައި ވަގުތު ހޯދުމަށް ފުރުސަތު ލިބެއެވެ.
އަދި ދެ ފަރާތުން ވެސް ވަނީ އީރާނާ ދެކޮޅަށް ބައިނަލްއަގްވާމީ ފޯރަމްތަކުގައި ހަރަކާތްތައް ރޭވުމާ ގުޅޭގޮތުން މަޝްވަރާކޮށްފައެވެ. ނަމަވެސް، އެފަދަ އެއްވެސް ފިޔަވަޅެއް އެމެރިކާގެ ރައީސް ޑޮނަލްޑް ޓްރަމްޕްގެ އިދާރާއާ ކުރިން މަޝްވަރާ ނުކޮށް ނޭޅުމަށް ދެ ފަރާތުން ވަނީ އެއްބަސްވެފައެވެ.
ހުޅަނގުގެ ޑިޕްލޮމެޓުންނާ ހަވާލާދީ އެ ޗެނަލުން ބުނެފައިވަނީ، ޔޫއޭއީން އީރާނާ މެދު އަމަލުކުރަނީ ޚަލީޖުގެ އެހެން ގައުމުތަކަށް ވުރެ މާ ހަރުކަށިކޮށް ކަމަށެވެ. އަދި އީރާނުގެ މިހާރުގެ ސިޔާސަތުތަކަކީ އެ ގައުމާއެކު އޮތް ޚިޔާލު ތަފާތުވުންތަކެއް ކަމަށާއި އެއީ ނައްތާލެވޭނެ ފަދަ ސިޔާސަތުތަކެއް ނޫން ކަމަށް ޔޫއޭއީން ދެކޭ ކަމަށް ވެސް ރިޕޯޓްކޮށްފައިވެއެވެ.
ޑިޕްލޮމެޓުން ބުނާ ގޮތުގައި، އީރާނުން ވަގުތު ހޯދުމަށް ކުރާ މަސައްކަތްތަކުން އަބޫދާބީއަށް އަސަރެއް ނުކުރެއެވެ. ހުރުމުޒް ކަނޑުއޮޅި ނޫން އެހެން މަގުތަކުން ތެލާއި ގޭސް އެކްސްޕޯޓް ކުރުމުގެ ގާބިލުކަން ޔޫއޭއީއަށް ލިބިފައިވުމަކީ، އީރާނާ ދެކޮޅަށް އިޒްރޭލާއި ޔޫއޭއީގެ މަސްލަހަތުތައް އެއްގޮތްވާ ކަމެއް ކަމަށް އެމީހުން ދެކެއެވެ.
2020 ވަނަ އަހަރު އިޒްރޭލާއި ޔޫއޭއީއާ ދެމެދު ގުޅުން އާންމުކުރުމުގެ އެއްބަސްވުމުގައި ސޮއިކުރި ފަހުން، ދެ ގައުމުގެ ގުޅުން ޑިޕްލޮމެޓިކް އަދި އިގްތިސާދީ ދާއިރާގެ އިތުރުން ސަލާމަތީ އަދި އަސްކަރީ ދާއިރާތަކަށް ފުޅާވެފައިވެއެވެ. މި ގުޅުންތައް އިތުރަށް ބަދަހިވެފައިވަނީ އީރާނާ ދެކޮޅަށް އިޒްރޭލާއި އެމެރިކާއިން ދާދި ފަހުން ހިންގި ހަނގުރާމައިގެ ސަބަބުންނެވެ.
