އިދިކޮޅު މައި ޕާޓީ، އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ތައްޔާރުވެވަޑައިގަންނަވާ ކުރީގެ ފޮރިން މިނިސްޓަރު އަދި އެ ޕާޓީގެ ކުރީގެ ރައީސް އަބްދުﷲ ޝާހިދު އައްޑޫ ސިޓީއަށް ކުރެއްވި ކެމްޕޭން ދަތުރުފުޅު ނިންމަވާލެއްވުމަށްފަހު، އެ ސިޓީގެ ރައްޔިތުންނަށް ޝުކުރު އަދާކުރައްވައި ދެން އަންނާނެ އެމްޑީޕީގެ ސަރުކާރެއްގެ ގާބިލުކަމާ މެދު ޔަގީންކަން ދެއްވައިފިއެވެ.
އައްޑޫގެ އެކި ރަށްތަކަށް ކުރެއްވި ދަތުރުފުޅަށްފަހު އެކްސްގައި އާންމުކުރެއްވި މެސެޖެއްގައި ޝާހިދު ވަނީ، އެ ސިޓީގެ ރައްޔިތުންގެ ފަރާތުން އޭނާއަށާއި ކެމްޕޭން ޓީމަށް ލިބުނު ހޫނު މަރުހަބާއާއި ދެއްވި އެއްބާރުލުމަށް އިޚްލާސްތެރިކަމާއެކު ތައުރީފްގެ ބަސްފުޅުތައް ވިދާޅުވެފައެވެ.
އައްޑޫ ސިޓީއާއި މުޅި ދެކުނުގެ އިގްތިސާދީ އަދި އިޖުތިމާއީ މުސްތަގުބަލާ މެދު އަލިއަޅުވާލައްވަމުން ޝާހިދު ފާހަގަކުރެއްވީ، ކުރީގެ ސަރުކާރުތަކުންނާއި މިހާރުގެ ސަރުކާރުންވެސް އައްޑޫގެ ތަރައްގީ ސުރުޚީތަކަކަށް އެކަނި މަހާލާފައިވާ ކަމަށެވެ. އަދި އޭނާގެ ސިޔާސީ ތަޞައްވުރަކީ ހަމައެކަނި ވައުދުތަކެއްގެ ސުރުޚީއެއް ނޫން ކަމަށާއި، ރައްޔިތުންގެ މަޝްވަރާއާއި ފަންނީ ލަފާގެ މައްޗަށް ބިނާކޮށް އަމަލީ ގޮތުން ދެކުނުގެ ތަރައްގީ ބަދަލުކޮށްލުން ކަމަށް ވިދާޅުވިއެވެ.
"ކުރިއަށް އޮތް ތަނުގައި އަޅުގަނޑުމެން ދައްކުވައިދޭނީ އަމަލީ ނަތީޖާ. ރައްޔިތުންނަށް ކުރިމަތިވެފައިވާ ގޮންޖެހުންތަކާއި މައްސަލަތަކަށް އަވަސް ހައްލު ހޯދައިދިނުމުގެ ގާބިލުކަމާއި ތަޖުރިބާ ހުރި ވެރިކަމެއް ކަށަވަރުކޮށްދޭނަން،" ޝާހިދު ވިދާޅުވިއެވެ.
އެމްޑީޕީގެ ރިޔާސީ ޓިކެޓަށް ވާދަކުރެއްވުމުގެ ތައްޔާރީތައް ކުރިއަށްގެންދަވާއިރު، އައްޑޫ ސިޓީއަކީ އެމްޑީޕީގެ ސިޔާސީ ތާރީޚުގައި އެންމެ ބޮޑު ތާއީދެއް އޮންނަ އަދި އިންތިޚާބުތަކުގެ ނަތީޖާ ބަދަލުކޮށްލުމުގައި މުހިންމު ދައުރެއް އަދާކުރާ ސަރަހައްދެކެވެ. ޝާހިދު އައްޑޫއަށް ކުރެއްވި މި ދަތުރުފުޅަކީ ރިޔާސީ ޕްރައިމަރީގެ ކެމްޕޭން ރަސްމީކޮށް ވަރުގަދަކުރުމުގެ ގޮތުން ހިންގެވި މުހިންމު ސިޔާސީ ހަރަކާތެކެވެ.
