ފެބްރުއަރީ މަހުގެ 12 ވަނަ ދުވަހު ބޭއްވި ޢާންމު އިންތިޚާބަށްފަހު ވެރިކަމާ ހަވާލުވި އައު ސަރުކާރާ ދެކޮޅަށް ބަންގްލަދޭޝްގެ 11 ޕާޓީގެ އިދިކޮޅު އިއްތިހާދަކުން 246 ކިލޯމީޓަރުގެ ދިގު ފުޅަނދު ރެލީއެއް ފަށައިފިއެވެ.
ވެރިރަށް ޑާކާއިން ފެށި މި ދަތުރުގައި 1,000 ކާރު ހިމެނެއެވެ. އަދި މި ކޮންވޯއި ނިންމާލުމަށް ހަމަޖެހިފައިވަނީ ޗިޓަގޮންގްގެ ތާރީޚީ ލާލްދީޣީ މައިދާނަށެވެ.
މި ބޮޑު މުޒާހަރާއަކީ ފަހުގެ ތާރީޚެއްގައި އެ ޤައުމުގައި ހިންގާ އެންމެ ބޮޑު އެއް ސިޔާސީ ހަރަކާތް ކަމަށް ފާހަގަކުރެއެވެ.
އިދިކޮޅު މީހުންގެ މި ފުޅަނދު ދަތުރު ރަސްމީކޮށް ފައްޓަވައިދެއްވީ ޖަމާޢަތޭ އިސްލާމީގެ އަމީރު ޝަފީޤުއްރަޙްމާނާއި، އެން.ސީ.ޕީ އަދި އަބަރު ބަންގްލަދޭޝް ޕާޓީ އާއެކު ހިމެނޭ 11 ޕާޓީގެ އިދިކޮޅު އިއްތިހާދުގެ އިސް ވެރިންނެވެ.
އޭ.ބީ ޕާޓީގެ ޗެއާމަން މުޖީބުއްރަޙްމާން ބުއިޔަން މޮންޖޫ މީޑިއާއަށް މައުލޫމާތު ދެއްވަމުން ވިދާޅުވީ، މި ހަރަކާތުގެ މަޤުޞަދަކީ ސަރުކާރު ވައްޓާލުމެއް ނޫނެވެ، ނަމަވެސް ޤައުމަށް ދިމާވެފައިވާ އަސާސީ މައްސަލަތަކަށް އަވަހަށް ޙައްލު ހޯދައިދިނުމަށް ގޮވާލުން ކަމަށް އޭނާ ވިދާޅުވިއެވެ.
މުޒާހަރާ އިންތިޒާމު ކުރާ ފަރާތްތަކުން ވަނީ ޤާނޫނީ އަދި ސިޔާސީ އިސްލާޙުތައް ގެނައުމަށް ފެންނަ ނުފެންނަ ވޯޓަކަށް ދިއުމަށާއި، ޖުލައި މަހުގެ ޗާޓަރުގެ ދަށުން އިންސާފު ޤާއިމުކުރުމަށް ގޮވާލާފައެވެ. މީގެ އިތުރުން، ކަރަންޓާއި ގޭހުގެ ދަތިކަމަށް ޙައްލު ހޯދުމާއި، ޤައުމުގެ ޤާނޫނު ތަންފީޒު ކުރުމުގެ ނިޒާމު ހަރުދަނާކުރުމަށް ވެސް ވަނީ ގޮވާލާފެވެ.
މިދަތުރަކީ އޮގަސްޓު މަހުގެ 6 ވަނަ ދުވަހު ޑާކާގައި ބޭއްވި އިށީނދެ ތިބުމުގެ ހަރަކާތެއްގައި އިޢުލާންކުރި ޕްރޮގްރާމެއްގެ ދަށުން ކުރިއަށްދާ ކަމެކެވެ.
އިދިކޮޅު ފަރާތްތަކުން ރާވާފައިވާ ގޮތުގެ މަތިން ކުރިއަށް އޮތް ތަނުގައި ރަންގްޕޫރަށާއި، ޚުލްނާއަށާއި އަދި ސިލްހެޓަށް ވެސް މިފަދަ ދަތުރުތައް ކުރުމަށް ވަނީ ހަމަޖެހިފައެވެ.
