ރަސްމާލޭގައި ޔޫއޭއީ ކުންފުނިން ހިންގާނެ ކަމަށް ލަފާ ކުރެވޭ މަޝްރޫއުގެ އެޑްވާންސްގެ ގޮތުގައި ލިބޭ އަދަދަކީ ރާއްޖޭގައި މީގެ ކުރިން ބޭރުގެ ފަރާތްތަކާ ހަވާލުކޮށްގެން ކުރިއަށް ގެންދިޔަ ބޮޑެތި މަޝްރޫއުތަކުން ލިބުނު ފައިސާއަށްވުރެ އެތައް ގުނައެއް ބޮޑު އަދަދެއް ކަމަށް ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުއްﷲ މުއްތަލިބު ވިދާޅުވެއްޖެއެވެ.
ވަޒީރު މިހެން ވިދާޅުވީ، ރަސްމާލެ މަޝްރޫއުގެ ދަށުން އެޑްވާންސް ފައިސާއެއް ނުލިބޭތީއާއި މާލެ ކައިރީގައި އެ މަޝްރޫއު ކުރިއަށް ގެންދާތީ ކަންބޮޑުވުން ފާޅުކުރައްވައި ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅުތަކަށް ރައްދު ދެއްވަމުންނެވެ.
މުއްތަލިބު މައުލޫމާތު ދެއްވި ގޮތުގައި، މި މަޝްރޫއުގެ ދަށުން އެޑްވާންސް ފައިސާގެ ގޮތުގައި ސީދާ ނަގުދު ފައިސާ ނުލިބުނު ނަމަވެސް، އެޑްވާންސްގެ ގޮތުގައި 5،000 ހައުސިން ޔުނިޓް އަޅައިދިނުމަށް ވަނީ ހަމަޖެހިފައެވެ. މިއީ ގާތްގަނޑަކަށް 500 މިލިއަން އެމެރިކާ ޑޮލަރު (7.7 ބިލިއަން ދިވެހި ރުފިޔާ) ގެ އިންވެސްޓްމަންޓެކެވެ.
"ރައީސް ނަޝީދު ފާހަގަކުރައްވާފައިވާ މައްސަލަތަކަށް ބަލާއިރު، ހަގީގަތުގައި މި މަޝްރޫއުގެ އެޑްވާންސްގެ ގޮތުގައި މި ލިބެނީ 5،000 ހައުސިން ޔުނިޓް. 5،000 ހައުސިން ޔުނިޓަކީ ގާތްގަނޑަކަށް 500 މިލިއަން ޑޮލަރު. އެއީ ދިވެހި ރުފިޔާއިން ބަލާކަމަށްވަންޏާ 7.7 ބިލިއަން ރުފިޔާ،" ވަޒީރު ވިދާޅުވިއެވެ.
މުއްތަލިބި މިވާހަކަ މިގޮތަށް ވިދާޅުވާއިރު ބަންޑާރަ ނާއިބް ވިދާޅުވީ ޔޫއޭއީ ކުންފުންޏާއެކު އަދި ބަދަލު ކުރެވިފައިވަނީ އެކުންފުނިން ރަސްމާލޭގައި އިންވެސްޓް ކުރަން ގަސްކުރާ ކަމަށް ސޮއިކޮށްފައިވާ ލެޓަރ އޮފް އިންޓެންޓްގެ ސިޓީއެއް ކަމަށެވެ.
މީގެ ކުރިން ހިންގި ބޮޑެތި މަޝްރޫއުތަކުގެ ތަފްސީލަށް އަލިއަޅުވާލައްވަމުން މުއްތަލިބު ވަޒީރު ފާހަގަކުރެއްވީ:
- އެކުއިޒިޝަން ކޮސްޓުގެ ގޮތުގައި ޖީއެމްއާރަށް ވެލާނާ އިންޓަނޭޝަނަލް އެއާޕޯޓް ދީގެން ސަރުކާރަށް ލިބުނީ 78 މިލިއަން ޑޮލަރު ކަމަށެވެ.
- އެނބޫދޫ ފަޅު ތަރައްގީކުރުމަށް ދީގެން އެކުއިޒިޝަން ކޮސްޓުގެ ގޮތުގައި ލިބުނީ 40 މިލިއަން ޑޮލަރުކަކަމަށެވެ.
- އެހެންކަމުން، ރަސްމާލެ މަޝްރޫއުގެ ތެރެއިން ބޯހިޔާވަހިކަމުގެ ބޭނުމަށް ދިވެހި ރައްޔިތުންނަށް ލިބޭ މަންފާ މާ ބޮޑުކަމަށް އޭނާ ވިދާޅުވިއެވެ.
މާލެ ސަރަހައްދުގައި މިފަދަ މަޝްރޫއެއް ހިންގާތީ އަމާޒުކުރާ ފާޑުކިއުންތަކަށް ޖަވާބު ދެއްވަމުން ވަޒީރު ވިދާޅުވީ، މިވަރުގެ ބޮޑު އިންވެސްޓްމަންޓެއް އަންނައިރު އިންވެސްޓް ކުރާ ފަރާތުންވެސް އެންމެ އެކަށީގެންވާ ސަރަހައްދަކީ ކޮބައިތޯ ބަލާނެ ކަމަށެވެ. އަދި ސަރުކާރުގެ ސްޓްރެޓެޖީއަކީވެސް އެކަމުން އުފެދޭ ވަޒީފާތަކާއި އިގުތިސޯދީ ހަރަކާތްތަކުގެ އެންމެ ބޮޑު މަންފާއެއް ރައްޔިތުންނަށް ލިބޭނެ ގޮތަކަށް ކަންކަން ރޭވުން ކަމަށް ވިދާޅުވިއެވެ.
"ސަރުކާރަށްވެސް މުހިންމު ކަމަކަށްވީ ރަސްމާލެ އާބާދުވެގެންދާއިރު ރައްޔިތުންނަށް އިގުތިސޯދީ މަންފާތަކާއި، އަދި ވަޒީފާގެ ފުރުސަތު ލިބިގެންދިއުން،" މުއްތަލިބު ވިދާޅުވިއެވެ.
