މައްކާގެ މަސްޖިދުލް ހަރާމްގެ ތެރޭގައި އަމިއްލައަށް ޖާނު ގޮއްވާލައިގެން މަރުވެގަނެގެން ހަމަލާއެއް ދޭން އުޅުނު ކަމަށް ބުނެ މީސް މީޑިއާ ގައި ފެތުރެމުންދާ ވީޑިއޯއާއި ރިޕޯޓުތަކީ ދޮގު ޚަބަރެއް ކަމަށް ސައުދީ އަރަބިއްޔާގެ ކަމާބެހޭ އިދާރާތަކުން ބުނެފިއެވެ. ސައުދީ ސަރުކާރުން ހާމަކުރި ގޮތުގައި، އެ ހާދިސާއިން ފެންނަ ވީޑިއޯއަކީ ޙަރަމްފުޅަށް ޒިޔާރަތްކުރި އުމުރާވެރިންނަށް އުނދަގޫކޮށް، ބިރުވެރިކަންު އުފެއްދުމަށް މަސައްކަތްކުރި އާންމު ފަރުދަކު ހުއްޓުވައި ހައްޔަރުކުރުމަށް ސެކިއުރިޓީ ސިފައިން ހިންގި ހަރަކާތެކެވެ.
މީސް މީޑިއާގެ ތަފާތު މަންސަތަކުގައި އާންމުވި ވީޑިއޯއިން ފެންނަނީ، ކަޅުކުލައިގެ ދަބަހެއް ހިފައިގެން ހުރި މީހަކު ސަލާމަތީ ކަންކަން ބަލަހައްޓާ އޮފިޝަލުންތަކެއް ވެގެން ބިންމައްޗަށް ވައްޓާލައި، ކޮންޓްރޯލްކުރަން މަސައްކަތްކުރާ މަންޒަރެވެ.
މި ވީޑިއޯއާ ގުޅުވައިގެން ރަޝިޔާގެ އާރްޓީ ފަދަ ބައެއް ބައިނަލްއަގުވާމީ މީޑިއާއިން ރިޕޯޓުކޮށްފައިވަނީ، އެ މީހާއަކީ ގެފުޅު ކައިރީގައި ޖާނު ގޮއްވާލުމަށް އުނަގަނޑުގައި ގޮވާތަކެތި ބަނދެގެން ހުރި "ސުއިސައިޑް ބޮމަރެއް" ކަމަށާއި، ނަމަވެސް އެ ގޮވާތަކެތި ނުގޮވައި ފެއިލްވީ ކަމަށެވެ.
ނަމަވެސް ސައުދީ އަރަބިއްޔާގެ ޖެނެރަލް ޑައިރެކްޓްރޭޓް އޮފް ޕަބްލިކް ސެކިއުރިޓީން އެކްސްގައި ނެރުނު ބަޔާނެއްގައި ވަނީ، މި ހާދިސާއާ ގުޅުވައިގެން ފެތުރެމުންދާ ވާހަކަތަކުގައި އެއްވެސް ހަގީގަތެއް ނެތް ކަމަށް ބުނެފައެވެ. ސައުދީ ސިފައިން ބުނެފައިވަނީ، "މައްކާގެ ސަލާމަތީ އިދާރާތަކުން ވަނީ، މަގުމަތިން ދިޔަ އާންމުންނަށް އުނދަގޫކޮށް، އެމީހުންގެ މެދުގައި ބިރުވެރިކަން އުފެއްދި މީހަކު ހައްޔަރުކޮށް، ވަގުތުން ފިޔަވަޅު އަޅާފައި" ކަމަށެވެ. އަދި މި ހާދިސާއާ ގުޅިގެން އިތުރަށް ބަލަންޖެހޭ ކަންކަން ތަހުގީގުކުރަމުންދާ ކަމަށްވެސް އެ އިދާރާއިން ބުނެއެވެ.
މި ހާދިސާ ހިނގާފައިވާ އިރު، ޔަމަނުގެ ހޫޘީން މަދީނާއަށް އަމާޒުކޮށް ޑްރޯން ހަމަލާއެއް ދީފައިވާ ކަމަށް ސައުދީ އިސްވެއޮންނަ އިއްތިހާދުން ވަނީ ބުނެފައެވެ. މަދީނާގައި ހުންނަ ކަރަންޓު އުފައްދާ މަރުކަޒަކަށް ދިން މި ހަމަލާއާ ގުޅިގެން އިސްލާމީ ދުނިޔޭގެ ބޮޑު ކަންބޮޑުވުމެއް އުފެދިފައިވާއިރު، ހޫޘީން ވަނީ މި ހަމަލާގައި އެމީހުންގެ ބައިވެރިވުމެއް ނެތް ކަމަށް ބުނެފައެވެ.
ސައުދީ އަރަބިއްޔާގެ ދެ ހަރަމްފުޅުގެ ސަލާމަތީ ކަންކަން ވަރުގަދަކޮށްފައިވާ މި ދަނޑިވަޅުގައި، ދޮގު ޚަބަރު ފެތުރުން ހުއްޓުވުމަށާއި، އާންމުންގެ މެދުގައި ނުބައި މައުލޫމާތު ފެތުރުނަނުދިނުމަށް ސައުދީ ސަރުކާރުން ދަނީ ޚާއްސަ ފިޔަވަޅުތަކެއް އަޅަމުންނެވެ.
