އިންޓަނޭޝަނަލް އެއަރ ޓްރާންސްޕޯޓް އެސޯސިއޭޝަން (އައިއޭޓީއޭ) އިން ހާމަކޮށްފައިވާ ގޮތުގައި 2025 ވަނަ އަހަރު އިންޑިއާގެ އެވިއޭޝަން ދާއިރާގެ އާމްދަނީ 979 ބިލިއަން ޑޮލަރަށް އަރާނެކަމަށް ލަފާކުރެވެއެވެ. މިއީ އެ ޤައުމުގެ އެވިއޭޝަން ދާއިރާގެ ތާރީޚުގައި އެންމެ މަތިން އާމްދަނީ ލިބޭނެ އަހަރެވެ. މިއާއެކު، އިންޑިއާ ދުނިޔޭގެ ތިންވަނައަށް އެންމެ ބޮޑު އެވިއޭޝަން މާކެޓްގެ މަޤާމު ހޯދާނެއެވެ.
އިއާޓާގެ އަމީތާބް ކޯސްލާ ވިދާޅުވި ގޮތުގައި މި ކުރިއެރުމުގެ މައިގަނޑު ސަބަބުތަކުގެ ތެރޭގައި ހިމެނެނީ ދުނިޔޭގެ ބޮޑެތި އެއަރލައިންތަކާއި ގުޅުން ރަނގަޅު ކުރުމާއި، އަދި އިންޑިއާގައި ތަރައްގީކޮށް ފުޅާކުރާ އެއަރޕޯޓް އިންފްރާސްޓްރަކްޗަރ އެވެ. މި ދާއިރާއިން އިންޑިއާގެ ޖީޑީޕީއަށް 53.6 ބިލިއަން ޑޮލަރުގެ ހިއްސާއެއް ކުރާނެއެވެ. އަދި، 7.7 މިލިއަން ވަޒީފާ އުފައްދާފައިވެއެވެ.
2023 ވަނަ އަހަރު އިންޑިއާގެ ދަތުރުފަތުރާއި ފަތުރުވެރިކަމުގެ ދާއިރާއިން ޖީޑީޕީގެ 6.5 އިންސައްތަ ހިއްސާކޮށްފައި ވެއެވެ. އަދި ވަޒީފާގެ 8.9 އިންސައްތަ ހިއްސާކޮށްފައިވެއެވެ. އަދި މުޅި އަހަރު ތެރޭގައި 4.99 ބިލިއަން ފަސިންޖަރުން އުފުލައި ދަތުރުފަތުރުގައި އުޅެފައި ވެއެވެ. އޭގެ އިތުރުން، 69 މިލިއަން ޓަނުގެ ކާގޯ އުފުލާފައިވެއެވެ.
ދުނިޔޭގެ އިޤްތިޞާދީ ދުވެލި 2.5 އިންސައްތައަށް ދަށްވެފައިވީ ނަމަވެސް، ތެލުގެ އަގު ދަށްވުމާއި، 84 އިންސައްތައިގެ މަތީ ޕެސެންޖަރ ލޯޑް ފެކްޓަރަކާއެކު، އިންޑިއާގެ އެވިއޭޝަން ދާއިރާގެ ފައިދާ އިތުރުވާނެކަމަށް ބެލެވެއެވެ. 2025 ވަނަ އަހަރު މި ދާއިރާގެ ސާފު ފައިދާ 36 ބިލިއަން ޑޮލަރަށް އަރާނެއެވެ.
