ދުނިޔޭގެ ހަކަތައިގެ މާހައުލު ބަދަލުކުރުމަށް އިންޑިއާއިން ކުރަމުންދާ މަސައްކަތްތަކަށް މި އަހަރުގެ ޖޫން މަހު ވޯލްޑް އިކޮނޮމިކް ފޯރަމުން ނެރުނު ރިޕޯޓެއްގައި، ތައުރީފް ކޮށްފިއެވެ. މި ގޮތުން، ތިމާވެށްޓަށް ކުރާ ނޭދެވޭ އަސަރު ކުޑަކުރުމަށްޓަކައި، އިންޑިއާއިން އިޔާދަކުރަނިވި ހަކަތައިގެ ވަސީލަތްތަކަށް، ޚާއްޞަކޮށް އަވިން އަދި ވައިން އުފައްދާ ހަކަތައަށް ހަލުއި ދުވެއްޔެއްގައި ބަދަލުވަމުންދާކަން ފާހަގަ ކޮށްފައިވެއެވެ. އިންޑިއާގެ އަމާޒަކީ 2030 ވަނަ އަހަރާ ހަމައަށް 500 ގިގަވޮޓުގެ އިޔާދަކުރަނިވި ހަކަތަ އުފެއްދުމެވެ.
މި ރިޕޯޓުގައި، އިންޑިއާގެ ސިޔާސަތުތަކުގެ ތެރެއިން، އިރުގެ އަލިން ހަކަތަ އުފައްދާ ޕެނަލްތަކަށާއި ކަރަންޓުން ދުއްވާ އުޅަނދުފަހަރަށް ދެމުންދާ ސަބްސިޑީތައް އެއް ވަރެއްގައި އިތުރު ވަމުންދާކަން ފާހަގަކޮށްފައި ވެއެވެ. މި ފިޔަވަޅުތަކުގެ ސަބަބުން އިންޑިއާގައި ހަކަތަ އުފެއްދުމަށް، ކޯލާ ދެލި ބޭނުންކުރުމާއި ތެލަށް ބަރޯސާވުން ވަނީ މަދުވެފައެވެ.
އިންޑިއާގެ މި މަސައްކަތްތަކުގެ ސަބަބުން ތިމާވެށްޓާ ރައްޓެހި ޞިނާޢަތްތަކުގައި ވަޒީފާގެ ފުރުޞަތުތައް އިތުރުވެގެން ގޮސްފައި ވެއެވެ. އަދި އިޤްތިޞާދު ކުރިއަރަމުންދާކަންވެސް އެ ރިޕޯޓްގައި ފާހަގަކޮށްފައިވެއެވެ.
މީގެ އިތުރުން، އިންޑިއާއިން ހަކަތަ ރައްކާކުރުމާއި ސްމާޓް ގްރިޑްތަކުގައި އިންވެސްޓްކުރަމުންދާ ކަމަށްވެސް ރިޕޯޓްގައި އަލިއަޅުވާފައި ވެއެވެ.
މިކަމުގެ ސަބަބުން ހަކަތައިގެ ޚިދުމަތް މެދުނުކެނޑި ފޯރުކޮށްދިނުމަށް މަގުފަހިވެގެންދާކަން ބުނެފައި ވެއެވެ.
އިންޑިއާގެ ރަށްފުށުގެ ހިސާބުތަކުގައި މިހާރު ކަރަންޓުގެ ޚިދުމަތް ލިބުން ފަސޭހަވެފައި ވެއެވެ. އަދި އާންމު ރައްޔިތުންގެ ދިރިއުޅުމުގެ ފެންވަރު އެކަމާ ގުޅިގެން މަތިވެފައިވާކަންވެސް ރިޕޯޓުގައި ފާހަގަކޮށްފައިވެއެވެ. އަދި އިންޑިއާއިން ސާފު ހަކަތައާ ގުޅޭ އެ ޤައުމުގެ ތަޖުރިބާ އެހެން ޤައުމުތަކާ ޙިއްޞާކުރަމުންދާކަމާއި، މިކަމުގައި ދުނިޔޭގެ ފެންވަރުގައި އިސްދައުރެއް އަދާކުރަމުންދާކަންވެސް ފާހަގަކޮށްފައިވެއެވެ. އިންޑިއާގައި ކަރަންޓުގެ އަގުބޮޑުވުންފަދަ ގޮންޖެހުންތަކާ ކުރިމަތިލާންޖެހުނު ނަމަވެސް، އިންޑިއާގެ ކުރިއެރުން ވަރަށް ފާހަގަކޮށްލެވޭ ކަމަށް ރިޕޯޓުގައި ބުނެފައިވެއެވެ.
މި ރިޕޯޓުގައި ބަޔާންކޮށްފައިވާ ގޮތުގައި، އިންޑިއާގެ މި މަސައްކަތްތަކުން މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމަށް އެހެން ޤައުމުތަކަށްވެސް ވަނީ ހިތްވަރަކަށް ވެފައެވެ.
