އެމެރިކާގެ ރައީސް އިއުލާން ކޮށްފައިވާ ޔަހޫދީ ސުލްހައިގެ ޕްލޭންގެ މަޝްވަރާތަކަށް ފަލަސްޠީނުގެ މިނިވަންކަމަށް މަސައްކަތް ކުރާ އިސްލާމީ ހަމާސް ޖަމާއަތުގެ ލީޑަރު ޚަލީލުލްހައްޔާ ވަނީ މިސްރަށް ވަޑައިގެންފައެވެ. ޓްރަމްޕް އިއުލާން ކޮށްފައިވާ ސުލްހައިގެ ޕްލޭނަށް ޔަހޫދީން އަދި އަމަލެއް ނުކުރެއެވެ. ނަމަވެސް ހަމާސްއިން ވަނީ އަމަލު ކުރަން ފަށާފައެވެ. އެކަމކު ޓްރަމްޕް ވަނީ ހަމާސއަށް އިންޒާރުދީ ވެރިކަމުގައި ތިބެން ދިމާ ކޮށްފިނަމަ އެޖަމާއަތް އެއްކޮށް ނައްތާލާނެ ކަމަށް ބުނެ ބޮޑު ބަސް ބުނެފައެވެ. ނަތަންޔާހޫއާއި ޓްރަމްޕްގެ މާލީ ރަހުމަތްތެރި ފަރާތްތައް ރުއްސަން ޓްރަމްޕް އިއުލާން ކޮށްފައިޥާ ޕްލޭނަށް ހަމާސްއިން އާނ ބަސް ބުނެފައި ވާއިރުވެސް ޔަހޫދީ ޓެރަރިސްޓުން ދަނީ ޣައްޒާގެ އަވަށްތައް އެއްކޮށް ނައްތާލައި އިމާރާތްތައް ސުންނާފަތި ކުރަމުންނެވެ. ނަސްލު ނައްތާލައި ބިމުގައި ފަސާދަ ކުރުމުގެ ދިގު މާޒީއެއް އޮތް ޔަހޫދީން ދަނީ ޣައްޒާއަކީ އިންސާނުންނަށް ދިރި ނޫޅެވޭ ވަރުގެ ތަނެއް ކަމަށް ހަދަމުންނެވެ. އެމެރިކާއާއި އަރަބިން ތިބެނީ މަންޒަރު ބަލާށެވެެ.
ޔަހޫދީންގެ އިސްފަރާތްތައް ވެސް ވަނީ މިސްރުގެ ޝަރަމުއްޝައިޚް ސިޓީއަށް ގޮސްފައެވެ. ޓްރަމްޕްގެ ސަރުކާރު ތަމްސީލު ކުރުމަށް ފޮނުވާފައި ވަނީ ޔަހޫދީއެއް ކަމަށްވާ އޭނާގެ ދަނބިދަރި ޖާރޑް ކޫޝްނަރ އާއި ޓްރަމްޕްގެ ރަހުމަތްތެރިޔާ އަދި ބިމުގެ ވިޔަފާރިވެރިޔާ ޔަހޫދީ ސްޓީވް ވިޓްކޯފް އެވެ،
ހަމާސްގެ ވަފުދުގެ ލީޑަރަކަށް ހުންނެވީ ޚަލީލް އަލްހައްޔާ އެވެ. ހަމާސްއިން އިސްރާއީލާއެކު މަޝްވަރާ ކުރާނީ މިސްރާއި ޤަތަރު މެދުވެރިކޮށް ނުސީދާކޮށެވެ. މި މަޝްވަރާތަކުގައި ހިމެނެނީ ޔަހޫދީންގެ ހޮލޮކޯސްޓް ހަނގުރާމަ ހުއްޓުވުމާއި، އިސްރާއީލީ ޓެރަރިސްޓް ސިފައިން ޣައްޒާއިން ބޭލުމާއި ޔަހޫދީން ވަގަށް ނަގާފައިޥާ ފަލަސްޠީނު މީހުން ދޫކޮށްލުމާއި ހަމާސްގެ މެހުމާނުންގެ ގޮތުގައި ތިބި ޔަހޫދީ ހަނގުރާމައިގެ އަސީރުން ދޫކޮށްލުމުގެ މައްސަލަތަކެވެ. ޔަހޫދީންގެ މުޖުރިމު ނަތަންޔާހޫގެ އޮފީހުން ވަނީ ޔަހޫދީންގެ ވަފުދެއް މިއަދު ހޯމަ ދުވަހު މިސްރަށް ފޮނުވާނެކަމަށް ބުނެފައެވެ.
ހަމާސްއާ ގުޅުންހުރި މަސްދަރަކާ ހަވާލާދީ ރިޕޯޓު ކޮށްފައިވާ ގޮތުގައި އެ ޖަމާއަތުން ބޭނުންވަނީ ޓްރަމްޕްގެ ބޭއިންސާފު، ސުލްހައިގެ ޕްލޭންގެ ބައެއް ކަންކަން ބަދަލުކުރާށެވެ. އޭގެ ތެރޭގައި ހަތިޔާރު ބެހެއްޓުމާއި ހަމާސްގެ ހަނގުރާމަވެރިން ޣައްޒާއިން އަރުވާލުމުގެ މާއްދާތައް ބަދަލު ކުރުން ހިމެނެއެވެ.
ޓްރަމްޕްގެ 20 ނުކުތާގެ ޔަހޫދީ ޕްލޭން ހާމަކޮށްފައި ވަނީ ސެޕްޓެމްބަރު 29 ވަނަ ދުވަހު އެވެ. މި ޕްލޭންގައި ޣައްޒާގެ އިންތިޤާލީ މަރުހަލާ ބެލެހެއްޓުމަށް ޓްރަމްޕްގެ މޭސްތިރިކަމުގެ ދަށުން ކޮމިޓީއެއް އެކުލަވާލުމަށް ވަނީ ހުށަހަޅާފައެވެ. މި ކޮމިޓީގައި އިސްވެ ހުންނާނެ ކަމަށް މީޑިއާ ރިޕޯޓުތައް ބުނަނީ އިރާގް ސުންނާފަތިކޮށްލައި ހަނގުރާމައިގެ ޖަރީމާތައް ހިންގުމުގައި އެމެރިކާއާ އެކު ބައިވެރިވި އިނގިރޭސި ކުރީގެ ބޮޑު ވަޒީރު ޓޯނީ ބްލެޔަރ އެވެ. އޭނާއަށް ފާޑު ކިޔާފައިވާ ބައެއް ވަނީ އޭނާއަށް އެ މަގާމު ހަމަޖެހުނީ އިބްލީސް ޗުއްޓީގައި ހުރުމުން ކަމަށް ބުނެފައެވެ،.
ޓޯނީ ބްލެޔަރއަށް އަލުން މަގާމެއް ލިބެނީ އިބްލީސް ޗުއްޓީގައި ހުރުމުން: އާންމުން
