ޕާކިސްތާނުން އެމެރިކާ އަށް ފުރަތަމަ ފަހަރަށް ނާދިރު މައުދަނުގެ ޝިޕްމެންޓެއް ފޮނުވާއިފިއެވެ. މިކަމާ ގުޅިގެން އެ މުޢާމަލާތުގެ ސިއްރުވެރިކަމާއި، ގައުމީ މިނިވަންކަމަށް ކުރާނެ ދުރުރާސްތާގެ އަސަރުތަކާ މެދު ގައުމީ ފެންވަރުގައި ފާޑުކިޔުންތައް އަމާޒުވެއްޖެއެވެ. ޕާކސްތާނަކީ ޗައިނާގެ ގާތް ރަޙުމަތްތެރިއަކަށް ވާއިރު ޕާކިސްތާނުން އެމެރިކާއާ ގާތް ވާން އުޅުމުން ބެއިޖިންގ އިން ނުތަނަވަސްކަން ފާޅުކޮށްފައިޥާ ކަމަށްވެސް ރިޕޯޓުތައް ބުނެއެވެ. އަސްކަރީ ގޮތުން ޕާކިސްތާނާއި ޗައިޏާއަކީ ގުޅިފައިވާ ދެ ގައުމެވެ.
އިލެކްޓްރޯނިކްސް އަދި ދިފާއީ ޓެކްނޮލޮޖީގައި ބޭނުންކުރާ ނާދިރު މައުދަނުތައް ހިމެނޭ އެމެރިކާއަށް ސަޕްލައި ކޮށްފައިވާ މި ޝިޕްމަންޓަކީ، އަދި ހާމަކޮށްފައިނުވާ ޑީލެއްގެ ދަށުން ދެގައުމުގެ ދެމެދުގައި ވެފައިވާ އެއްބަސްވުމަކުން ފޮނުވާލެވުނު އެއްޗެއް ކަމަށް ވެއެވެ. ޕާކިސްތާން ސަރުކާރުގެ އިސްވެރިން ވަނީ ގައުމީ ސަލާމަތަށްޓަކައި މި މުޢާމަލާތުގެ ތަފްސީލުތައް ހާމަކުރުމަށް އިންކާރުކޮށްފައެވެ.
މި ކަމަކީ ޕާކިސްތާންގެ ވެރިޔާ ފީލްޑް މާޝަލް އާސިމް މުނީރާއި ޕާކިސްތާންގެ ބޮޑު ވަޒީރު ޝެހްބާޒް ޝަރީފް ވޮޝިންޓަނުގައި ޓްރަމްޕް ރުއްސަން ނިންމެވި ޑީލެކެވެ.
މި މުޢާމަލާތުގައި ޕާލިމަންޓްގެ ބެލެހެއްޓުން ނެތްކަމަށް އިދިކޮޅު ފަރާތްތަކާއި މަދަނީ ޖަމްޢިއްޔާތަކުން ދަނީ ބުނަމުންނެވެ. އަދި މިފަދަ މުޢާމަލާތްތަކުގެ ސަބަބުން ޕާކިސްތާންގެ މުޖުތަމަޢު ފަގީރުވެ، ތިމާވެށި ހަލާކުވެގެން ދިޔަ ތާރީޚީ ނަމޫނާތައް ތަކުރާރުވެދާނެކަމުގެ އިންޒާރު ވެސް ދީފައިވެއެވެ.
މި މުޢާމަލާތަކީ އެމެރިކާގެ ސަޕްލައި ޗެއިން ޗައިނާގެ ނުފޫޒުން މިނިވަންކުރުމަށް ކުރެވޭ މަސައްކަތުގެ ބައެއްކަމަށް ތަޙުލީލުކުރާ ފަރާތްތަކުން ލަފާކުރެއެވެ. އަދި ޕާކިސްތާނުގެ އުތުރު ސަރަޙައްދުތަކުގައި މައުދަނު ނެގުމުގެ މަސައްކަތުން ނާޒުކު ތިމާވެށްޓަށާއި އެހިސާބުތަކުގެ މުޖުތަމަޢުތަކަށް ކުރާނެ އަސަރާމެދު ތިމާވެށީގެ ޖަމްޢިއްޔާތަކުން ވަނީ ކަންބޮޑުވުން ފާޅުކޮށްފައެވެ.
