އިންޑިއާއަކީ ދުނިޔޭގެ އެންމެ ހަލުވިކޮށް ކުރިއަރަމުންދާ އިޤްތިޞާދުގެ ގޮތުގައި ދެމިހުންނާނެ ޤައުމެއްކަމަށް ވޯލްޑް ބޭންކުގެ އެންމެ ފަހުގެ ސައުތު އޭޝިއާ ޑިވެލޮޕްމަންޓް އަޕްޑޭޓުގައި ވަނީ ލަފާކޮށްފައެވެ. މިކަމުގެ މައިގަނޑު ސަބަބުތަކެއްގެ ގޮތުގައި ފާހަގަ ކޮށްފައިވަނީ އެތެރޭގައި ވަރުގަދައަށް ރައްޔިތުން ޚަރަދުކުރުމާއި، ދަނޑުވެރިކަމުގެ އުފެއްދުންތެރިކަން އިތުރުވުމާއި، އަދި ރަށްފުށުގެ ސަރަޙައްދުތަކުގެ މުސާރަ މަތިވަމުން ދިއުމެވެ.
2025 ވަނަ އަހަރު ދެކުނު އޭޝިއާގެ އިޤްތިޞާދީ ދުވެލި 6.6 އިންސައްތައިގައި ގައި ހުންނާނެކަމަށް ލަފާކުރެވޭއިރު، 2026 ގައި މި މިންވަރު 5.8 އިންސައްތައަށް ދަށްވާނެކަމަށް ބެލެވެއެވެ. ނަމަވެސް މި ސަރަޙައްދު ކުރިމަތިލާންޖެހޭ ގޮންޖެހުންތަކުގެ ތެރޭގައި ވިޔަފާރީގެ ސިޔާސަތުތަކަށް އަންނަ ބަދަލުތަކާއި، ޖިއޯޕޮލިޓިކަލް ގުޅުންތަކުގެ ކަންބޮޑުވުންތަކާއި، އާޓިފިޝަލް އިންޓެލިޖެންސް ފަދަ އާ ޓެކްނޮލޮޖީތަކުގެ ސަބަބުން އަންނަ ބަދަލުތައް ހިމެނެއެވެ.
ދެކުނު އޭޝިއާއަކީ ބައިނަލްއަޤްވާމީ ވިޔަފާރިއާއި މާލީ ދާއިރާއަށް އެންމެ ހުޅުވިފައިވާ ސަރަޙައްދުތަކުގެ ތެރެއިން ސަރަހައްދެއް ނޫންކަން ރިޕޯޓުގައި ފާހަގަކޮށްފައިވެއެވެ. މީގެ އިތުރުން، ޗެޓްޖީޕީޓީ ތަޢާރަފުވުމަށްފަހު، އޭއައި އިން އެންމެ ބޮޑު އަސަރެއްކުރާނެ ވަޒީފާތަކުގެ ވާހަކަ ވެސް ހިމަނާފައި ވެއެވެ. އެގޮތުން އިޝްތިހާރުތައް 20 އިންސައްތައަށް ދަށްވެފައިވާ ކަމަށް ބުނެފައިވާ އިރު، އޭއައި އާ ގުޅުންހުރި ހުނަރުތަކަށް އޮތް ޑިމާންޑް އިތުރުވެ، އެހެން ޕްރޮފެޝަނަލް މަޤާމުތަކާ އަޅާބަލާއިރު 30 އިންސައްތައަށް މުސާރަ ބޮޑު ވެފައިވާ ކަން ފާހަގަކޮށްފައިވެއެވެ.
