ސަޢޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާންގެ ވިޝަން 2030ގެ އެޖެންޑާގެ ދަށުން، އުބަރގެ ބާނީ ޓްރެވިސް ކަލަނިކް އަދި ރެޑް ސީ ގްލޯބަލްގެ ސީއީއޯ ޖޯން ޕަގާނޯއަށް ސަޢޫދީ ރައްޔިތުކަން ދީފިއެވެ. މިއީ އިޤްތިޞާދު ތަނަވަސްކޮށް، ދުނިޔޭގެ ހުނަރުވެރިން ސައޫދީއަށް ގެނައުމަށް އަމާޒުކޮށްގެން ކުރެވޭ މަސައްކަތެކެވެ.
ކަލަނިކްއަކީ 2009 ގައި އުބަރ އުފެއްދި، އަދި 2017 އާ ހަމައަށް ކުންފުނީގެ ސީއީއޯގެ މަޤާމު ފުރުއްވި ފަރާތެވެ. މިހާރު އޭނާ ހިންގަމުންދަނީ ކްލައުޑްކިޗަންސް ކުންފުނިއެވެ. މި ކުންފުނިން މެދުއިރުމަތީގެ ސަރަޙައްދުގައި ކިޗަންޕާކްގެ ނަމުގައި ވިޔަފާރި ހިންގަމުންދެއެވެ. އަދި މި ސަރަޙައްދުގައި ވިޔަފާރި ފުޅާކުރުމަށް 1.25 ބިލިއަން ޑޮލަރުގެ އިންވެސްޓްމަންޓެއް ހޯދާފައިވެއެވެ.
ޕަގާނޯއަކީ 2018 އިން ފެށިގެން ރެޑް ސީ ގްލޯބަލްގެ ސީއީއޯގެ މަޤާމު ފުރަމުންދާ ފަރާތެކެވެ. އޭނާ މިހާރު ބަލަހައްޓަމުންދަނީ ރެޑް ސީ އަދި އަމާލާ ޓޫރިޒަމް މަޝްރޫޢުތަކެވެ. ފޯބްސް މިޑްލް އީސްޓުން ވަނީ އޭނާ 2024 ވަނަ އަހަރުގެ "ޓްރެވަލް އެންޑް ޓޫރިޒަމް ލީޑަރސް" ގެ ތެރޭގައި ހިމަނާފައެވެ.
މި ފިޔަވަޅަކީ ސަޢޫދީ އަރަބިއްޔާއިން ވިޔަފާރީގެ ހުނަރުވެރިންނަށް ފުރުޞަތު ހޯދައިދިނުމަށް އަޅަމުންދާ ފިޔަވަޅުތަކުގެ ތެރެއިން އެއް ފިޔަވަޅެވެ. އިމާރާތާއި އަދި ޤަޠަރުވެސް ވަނީ އިންވެސްޓަރުންނާއި ވިޔަފާރިވެރިންނަށް ދިގު މުއްދަތުގެ ރެސިޑެންސީ އަދި ރައްޔިތުކަން ދިނުމުގެ ޕްރޮގްރާމްތައް ތަޢާރަފުކޮށްފައެވެ.
