އަފްޣާނިސްތާނުގެ ޚާރިޖީ ވަޒީރު މައުލަވީ އާމީރު ޚާން މުއްތަޤީ އިންޑިއާއަށް ކުރެއްވި ޒިޔާރަތާ ގުޅިގެން، އިންޑިއާއިން ވަނީ އަފްޣާނިސްތާނަށް އިތުރު ޞިއްޙީ އެހީތެރިކަން ފޯރުކޮށްދޭން ނިންމާފައެވެ. މީގެ ތެރޭގައި ތެލަސީމިއާ ސެންޓަރެއް ހެދުމާއި ޒަމާނީ ޑައިގްނޯސްޓިކް ފެސިލިޓީއެއް ގާއިމް ކުރުމާއި އަދި ކާބުލްގެ ބަގްރާމް ސަރަޙައްދުގައި 30 އެނދުގެ ހޮސްޕިޓަލެއް އެޅުން ހިމެނެއެވެ.
މީގެ އިތުރުން، ޕަކްޓިކާ، ޚޯސްތު އަދި ޕަކްޓިއާ ޕްރޮވިންސްތަކުގައި 5 މެޓަރނިޓީ ކްލިނިކް ޤާއިމްކުރުމަށް ވަނީ ނިންމާފައެވެ. އަދި ހެޔޮ އެދުމުގެ ނިޝާނެއްގެ ގޮތުން އިންޑިއާއިން ވަނީ އަފްޣާނިސްތާނަށް 20 އެމްބިއުލާންސް ހަދިޔާ ކޮށްފައެވެ.
2021 އަށްފަހު ޠާލިބާނުންގެ އިސް ވަފުދެއް އިންޑިއާއަށް ކުރި ފުރަތަމަ ޒިޔާރަތުގައި، ދެ ޤައުމުގެ ވިޔަފާރީގެ ގުޅުން ވަރުގަދަ ކުރުމަށްޓަކައި ވިޔަފާރި ކޮމިޓީއެއް އުފެއްދުމަށާއި، އިންޑިއާ-އަފްޣާނިސްތާން އެއަރ ފްރެއިޓް ކޮރިޑޯ ހަރުދަނާކުރުމަށް ވަނީ އެއްބަސްވެފައެވެ.
