އެމެރިކާގެ މުސްލިމް މަދަނީ ޙައްޤުތަކުގެ އެންމެ ބޮޑު ޖަމްޢިއްޔާ ކެއަރއިން ވަނީ، މުސްލިމް ޖަމްޢިއްޔާތަކަށް ދެމުން އައި ސެކިއުރިޓީ ގްރާންޓްތައް ހުއްޓާލުމަށް ޑިޕާޓްމަންޓް އޮފް ހޯމްލޭންޑް ސެކިއުރިޓީ (ޑީއެޗްއެސް) އިން ނިންމި ނިންމުމަކީ އެމެރިކާގެ އަސާސްތަކާ ޚިލާފު، ޤާނޫނުއަސާސީއާ ފުށުއަރާ ނިންމުމެއް ކަމަށް ބުނެފައެވެ. މި ނިންމުން ނިންމާފައިވަނީ އެ ޖަމްޢިއްޔާތަކުގެ ދީނީ ހައިސިއްޔަތަށް ބަލައިގެން އިސްރާއީލުގެ އިންސާނީ ޙައްޤުތަކުގެ އަނިޔާވެރިކަމާމެދު ފާޅުކުރާ ޚިޔާލުތަކާ ހެދިއެވެ.
ސީއެންއެންގެ ރިޕޯޓެއްގައި ބުނެފައިވާ ގޮތުގައި، ހޯމް ލެންޑް ސެކިއުރިޓީން މުސްލިމް ޖަމްޢިއްޔާތަކަށް ޓާގެޓް ކޮށްފައިވަނީ އިސްލާމް ދީނާ ދެކޮޅު، އިސްރާއީލަށް ތާއީދުކުރާ އިސްލާމޯފޯބް ލިޔުންތަކާއި ރިޕޯޓް ތައްޔާރު ކުރާ މީހެއް ކަމަށްވާ ޑެނިއަލް ޕައިޕްސް ހިންގާ ޖަމާޢަތުން ނެރުނު ރިޕޯޓަކަށް ބިނާކޮށެވެ. ކުރިން ހޯމް ލެންޑް ސެކިއުރިޓީން ފައްޅިތަކާއި އެއްގޮތަށް މިސްކިތްތަކަށް ދޭ ސަލާމަތީ ފަންޑަކީ އެތަންތާނގެ ސަލާމަތީ ކަންކަން ބެލެހެއްޓުމަށް ކެމެރާ ފަދަ ވަސީލަތްތައް ބެހެއްޓުމަށް ބޭނުން ކުރަމުން އައި ސަލާމަތީ އެހީގެ ފައިސާއެވެ.
ކެއަރގެ ނެޝަނަލް ޑެޕިއުޓީ ޑިރެކްޓަރ އެޑްވާޑް އަހްމަދް މިޗެލް ވިދާޅުވީ، ޓްރަމްޕް ސަރުކާެރުގެ ނިންމުމަކީ އެމެރިކާގެ ޤާނޫނުއަސާސީން ލިބިދޭ ޙައްޤުތަކާ ޚިލާފު ކަމެއް ކަމަށާއި، މިކަމުގެ ސަބަބުން ހަމަލަތަކަށް ހުށަހެޅިފައިވާ މުޖުތަމަޢުތަކަށް ނުރައްކާވެގެންދާނެ ކަމަށެވެ. އަދި ހޯމްލޭންޑުން މި ނިންމުން ވަގުތުން ބަދަލުކޮށް، މުސްލިމް ޖަމްޢިއްޔާތަކަށް މާލީ އެހީ ލިބޭނެ މަގު ތަނަވަސްކޮށްދިނުމަށް ގޮވާލައްވާފައިވެއެވެ.
ކެއަރއިން ސީއެންއެންއަށް ދިން ބަޔާންގައި ބުނެފައިވަނީ، މިސްކިތްތަކަށްވެސް އެހެން ދީނީ މަރުކަޒުތަކެކޭ އެއްފަދައިން ފެޑެރަލް ގްރާންޓްތަކަށް އެދުމުގެ ޙައްޤު އޮންނަންވާނެ ކަމަށެވެ. އަދި ޣައްޒާގައި ހިނގަމުންދާ އަނިޔާވެރިކަމާމެދު ފާޅުކުރާ ޚިޔާލުތަކުގެ ސަބަބުން މުސްލިމް ޖަމްޢިއްޔާތަކަށް ގްރާންޓް ދިނުން މަނާކުރުމަކީ އެމެރިކާގެ މުސްލިމް މަރުކަޒުތަކަށް އިތުރު ނުރައްކަލެއް ކުރިމަތިކުރުވާނެ ކަމެއް ކަމަށްވެސް ބުނެފައިވެއެވެ.
