ޖީއެމްއާރުން ހިންގާ ދިއްލީގެ އިންދިރާ ގާނދީ އިންޓަނޭޝަނަލް އެއާޕޯޓުގައި މިއަދު ހުކުރު ދުވަހު ޓެކްނިކަލް މައްސަލަތަކެއް ދިމާވެ، އެތެރޭގެ އަދި ބައިނަލްއަގްވާމީ 100 އަށް ވުރެ ގިނަ ފްލައިޓް ލަސްވެފައި ވެއެވެ.
އެއާލައިންތަކުން ވަނީ އަދާހަމަކޮށްފައިވާ ތާވަލްތަކަށް ފަސިންޖަރުން ރިއާޔަތް ކުރުމަށާއި އެއާޕޯޓުގައި އިތުރު ވަގުތު ހޭދަވާނެ ކަމަށް ބެލުމަށް ފަސިންޖަރުންނަށް އިލްތިމާސްކޮށް އިރުޝާދުތަކެއް ނެރެފަ އެވެ. މި ފަންނީ މައްސަލާގެ ސަބަބުން ޗެކިން ކުރުމާއި ބޯޑު ކުރާ ނިޒާމްތަކަށް އަސަރުކޮށް، އެއާޕޯޓުގައި ސަފު ދަމާލާފައި ވެއެވެ. އަދި ހިންގުމަށް ހުރަސް އެޅި ނިޒާމަށް މައްސަލަތައް ދިމާވެފައި ވެއެވެ.
ކަމާބެހޭ ފަރާތްތަކުން ބުނަނީ މައްސަލަ ހައްލުކުރުމަށް ފަންނީ ޓީމްތައް އެކުލަވާފައިވާ ކަމަށެވެ. އަދި އެއާލައިންތަކުން ވެސް ފަސިންޖަރުންނަށް ދިމާވާ ދަތިތައް ހައްލު ކޮށްދިނުމަށް އެހީވަމުންދާ ކަމަށެވެ.
މިމައްސަލަ ދިމާވެފައި ވަނީ ދަތުރުފަތުރަށް ބާރުބޮޑު ވެފައިވާ ދަނޑިވަޅެއްގައެވެ.
އޮފިޝަލުން ކަށަވަރުކޮށްދިން ގޮތުގައި ފްލައިޓްތަކުގެ ސަލާމަތަށް ނުރައްކަލެއް ނެތެވެ. މައްސަލައަކީ އެއާޓްރެފިކް ކޮންޓްރޯލަށް ދިމާވި މައްސަލައެކެވެ.
