ޖުލައި މަހުގެ އެ ހަވީރު، ރާޖަސްތާންގެ ޖައިޕޫރުގެ އުޑުމަތި އޮތީ ބަރުވެފަ އެވެ. ހޫނުމިން ހުރީ ސިމެންތި މަގުތަކުން ދުން އަރާހާ ހޫނުކޮށެވެ. ގަޑިން ހަވީރު 4:45 އެވެ. އުމުރުން 45 އަހަރުގެ ނީރަޖް ޝަރްމާ، އޭނާގެ ދަރިފުޅު ކޯޗިން ކްލާހަށް ލުމަށްފަހު ގެއަށް ދިއުމަށް ހިނގައިގަތީ އާދައިގެ މަތިން ހިތްހަމަޖެހިލައިގެން ހުރެ އެވެ. އޭނާއަކީ ދަށު ކޯޓެއްގެ ކާތިބެކެވެ. މީގެ އަހަރެއްހާ ދުވަސް ކުރިން ފިރިމީހާ ވަކިވެދިޔުމުން، ދިރިއުޅުމުގެ ބުރަ އުފުލަމުން އައީ އެކަނިވެރި މައެއްގެ ގޮތުގަ އެވެ.
ނަމަވެސް، އެ މަގުގެ ކަނަކުން ނުކުތް ކަޅުކުލައިގެ ސްކޯޕިއޯ އެސްޔޫވީއެއްގެ އިންޖީނުގެ އަޑު ގަދަވަމުންދިޔައީ އާދައިގެ ދުވެއްޔެއްގައެއް ނޫނެވެ. ގަޑިއަކު 130 ކިލޯމީޓަރުގެ ބާރުމިނުގައި، މަގުގެ ހުރިހާ އުސޫލެއް މުގުރާލަމުން އެ ކާރު މިސްރާބުޖެހީ ސީދާ ނީރަޖްއާ ދިމާލަށެވެ. މާސްކް އަޅައިގެން ތިބި ބައެއްގެ މޫނުތަކެއް ކާރުގެ ބިއްލޫރިގަނޑުގެ އެތެރެއިން ފެނިލި އެވެ.
މަދު ސިކުންތުކޮޅެކެވެ. ދަގަނޑާއި އިންސާނާގެ މަސްގަނޑު މުޑިއެރި ބާރު އަޑާއެކު، ނީރަޖް ވިއްސައިގެން ދިޔައީ 100 ފޫޓު ދުރަށެވެ. ކާރު މަޑުވެސް ނުކޮށް، ދުންޖަހާފައި މަންޒަރުން ނިވާވެއްޖެ އެވެ. މަގުމަތީގައި ބާކީ އޮތީ ހަމަހިމޭންކަމާއި، ލޭގެ ކޯރެއްގެ ތެރޭގައި އޮތް ނީރަޖްގެ ފުރާނަނެތް މަސްގަނޑެވެ.
ހީވީ އާދައިގެ އެކްސިޑެންޓެއް ހެންނެވެ. ނަމަވެސް އެއީ ކަޅު ވާހަކައެއްގެ ފެށުމެވެ. އެއީ މުދަލާއި ސަރުކާރު ވަޒީފާއެއްގެ ދަހިވެތިކަމުގައި، އަމިއްލަ ބަނޑުން އުފަންކުރި ދަރިއަކު ރޭވި ލޭއޮހޮރުވުމެކެވެ.
ފުލުހުންގެ ރަންޖީތާ ޝަރްމާ ސީސީޓީވީ ފުޓޭޖްތައް ބައްލަވަން އިންނެވިއިރު، އެކަމުގައި އާދައިގެ އެކްސިޑެންޓެއްގެ އެއްވެސް ނިޝާނެއް ނުފެނުނެވެ. ކާރު ދުއްވާފައި އައީ އެއްވެސް ބްރޭކެއް ޖެއްސުމެއް ނެތި، ސީދާ އަމާޒަށް ވާސިލްވުމަށެވެ. ތަހުގީގުގެ ހަގީގީ ކޮޅު ފެނުނީ ނީރަޖްގެ ބޭބެ، ރާކޭޝް ކުމާރު ދިން ބަޔާނަކުންނެވެ.
ނީރަޖް މަރުވުމުގެ ކުރިން ބޭބެ ގާތު ބުނެފައިވެ އެވެ: "އަހަރެންގެ ދަރިފުޅާއި، ފިރިމީހާގެ އާއިލާ މީހުން އަހަންނަށް މަރުގެ އިންޒާރު ދެނީ. އެމީހުން ބޭނުންވަނީ އަހަރެންގެ ފިރިމީހާގެ މުދަލާއި، އަހަރެންގެ ވަޒީފާ."އެވެ.
ނީރަޖްގެ ފިރިމީހާ މަރުވުމުން، ސަރުކާރުގެ އުސޫލުތަކުގެ ދަށުން އާއިލާގެ މީހަކު މަރުވުމުން ދޭ ސަރުކާރު ވަޒީފާ ލިބުނީ ނީރަޖް އަށެވެ. ނަމަވެސް، އޭނާގެ ޒުވާން ދަރިފުޅު އާޔުޝީ ޝަރްމާ ބޭނުންވީ އެ ސަރުކާރު ވަޒީފާ އަމިއްލަ ނަމަށް ބަދަލުކުރާށެވެ. މަންމަ އެކަމާ ދެކޮޅު ހެދި އެވެ. އޭގެ އިތުރުން، ވޭތުވެދިޔަ ތިން އަހަރު ދުވަހު މަންމައާއި ދަރިފުޅާ ދެމެދު އޮތީ ބޮޑު މުދާވެރިކަމާ ގުޅޭ ހަނގުރާމައެކެވެ.
އާޔުޝީގެ ހިތުގައި އުފެދުނު ނަފުރަތު، ގޭގެ ފާރުތަކުން ބޭރަށް ހިނގައްޖެ އެވެ. އޭނާ އެހީއަށް އެދުނީ އޭނާގެ ބޮޑުބޭބެ މޯހަން ސުވަރޫޕް އަދި ބެލްރާމް ރަވީ ކިޔާ ދެބެއިންގެ ދެދަރި ކުއްޖެއްގެ ކިބައިންނެވެ. އެމީހުންގެ ނިންމުމަކަށްވީ: ނީރަޖް ދުނިޔެއިން ނައްތާލުން!
މަރުގެ ކޮންޓްރެކްޓް: 7 ލައްކަ ރުޕީސް އަދި ނާކާމިޔާބު "ތާރް"
މިއީ ކުއްލިއަކަށް ހިނގި ޖަޒުބާތީ ކަމެއް ނޫނެވެ. މިއީ މަސްތަކެއްގެ ރޭވުމެކެވެ. އާޔުޝީ އާއި އޭނާގެ ބައިވެރިން ބާރަތުޕޫރަށް ނިސްބަތްވާ ހޭމަންތު ޝަރްމާ ނަމަކަށް ކިޔާ މީހަކަށް 7 ލައްކަ ރުޕީސްގެ މަރުގެ ކޮންޓްރެކްޓެއް ހުށަހެޅި އެވެ.
ފުރަތަމަ އެމީހުން ކުއްޔަށް ހިފީ މަހިންދުރާ ތާރް އެސްޔޫވީއެކެވެ. ދުވަސްތަކެއް ވަންދެން ނީރަޖްގެ ބޯކޮޅު ބަލައި، އޭނާ އުޅޭނޫޅޭ ގޮތް މޮނިޓަރު ކުރި އެވެ. ނަމަވެސް އެ ފުރަތަމަ ރޭވުން ނާކާމިޔާބުވި އެވެ. އެކަމަކު އެމީހުން އުންމީދު ކަނޑައެއް ނުލަ އެވެ. ދެވަނަ ފަހަރަށް، މުޅިން އާ ކަޅު ސްކޯޕިއޯ އެއް ހޯދައި، އެއް މަސް ދުވަސް ވަންދެން ނީރަޖްގެ ހިޔަނި ފަދައިން ފާރަލަމުން ދިޔަ އެވެ.
އެންމެ ފަހު ދުވަސް:
ޖުލައި 3 ވަނަ ދުވަހު، މި ގާތިލުންގެ މުޅި ނެޓްވޯކް އޮތީ ޖައިޕޫރުގެ މަގުތަކަށް ފެތުރިފަ އެވެ.
- މޯހިތު ޝަރްމާ: ނީރަޖްގެ ފަހަތުން ހިނގަމުން، އޭނާ ހުރި ތަނުގެ "ލައިވް ލޮކޭޝަން" ގުރޫޕަށް ފޮނުވަމުންދިޔަ އެވެ.
- ރޯހިތު ޖާޓަވް: ސައިކްލެއްގައި މަގުގެ އަނެއްކޮޅުން ފާރަލަމުންދިޔަ އެވެ.
- އާކާޝް ޝަރްމާ އަދި އަރްވިންދު: ސްކޯޕިއޯގެ ހުންގާނުގައި، އެކްސެލަރޭޓަރަށް ފައިން ފިއްތާލައިގެން ތިއްބެވެ.
ނީރަޖް މަގުގެ އެކަނިވެރި ހިސާބަކަށް ފޯރުމާއެކު، އާކާޝް ކާރުގެ ދުވެލި ހައިވޭއެއްގެ މިސްރާބަށް ބަދަލުކޮށްލި އެވެ. އަދި ނީރަޖްގެ ގައިގައި ޖައްސައި، އޭނާގެ ފުރާނަ ދުއްވާލި އެވެ. އެއަށްފަހު، ކާރު ދޫކޮށްލުމަށްފަހު ސައިކުލެއްގައި އެންމެން ފިލި އެވެ.
ފުލުހުން މިހާރު ވަނީ އަމިއްލަ މަންމަ މަރާލަން ރޭވި ލޭބޮއި އާޔުޝީ ޝަރްމާއާއެކު 7 މީހަކު ހައްޔަރުކޮށްފަ އެވެ. މި މައްސަލައިގެ މައިގަނޑު އެއް މޭސްތިރި ކަމަށްވާ ބެލްރާމް ރަވީ އަދިވެސް އުޅެނީ ފިލައިގެންނެވެ.
ކުށުގެ އިއުތިރާފް ބަޔާނުގައި އާޔުޝީގެ މޫނުމަތިން އެއްވެސް ދެރަވުމެއް ނެތެވެ. އޭނާ ބޭނުންވީ ހަމައެކަނި ސަރުކާރުގެ ގޮނޑިއަކާއި، މަންމަގެ ނަމުގައި ހުރި ބިމެކެވެ. ޖައިޕޫރުގެ ކޯޓު ކާތިބު ނީރަޖް ޝަރްމާގެ ހަށިގަނޑު ވަޅުލެވިއްޖެ އެވެ. ނަމަވެސް، އޭނާ ބޮޑުކުރި ދަރިފުޅުގެ ހިތުގެ ކަޅުކަމާއި، ދަހިވެތިކަމުގެ މި ބިރުވެރި ވާހަކަ ޖައިޕޫރުގެ މަގުތަކުން ދުވަހަކުވެސް ފިލައިގެންނެއް ނުދާނެ އެވެ.
