ދުނިޔޭގެ ދެވަނައަށް އެންމެ ބޮޑު އިގްތިސާދު ކަމަށްވާ ޗައިނާއިން، އެގައުމުގެ ތާރީހުގައި ފުރަތަމަ ފަހަރަށް އާންމުންގެ ހޭދަ އިތުރުކުރުމަށް ޚާއްސަ ފަސް އަހަރުގެ މާސްޓަރ ޕްލޭނެއް އިފްތިތާހުކޮށްފިއެވެ.
ނެޝަނަލް ޑިވެލޮޕްމަންޓް އެންޑް ރިފޯމް ކޮމިޝަން އެންޑީއާރްސީ އާއި މިނިސްޓްރީ އޮފް ކޮމާސް ގުޅިގެން ނެރުނު މި ޕްލޭނުގެ މައިގަނޑު އަމާޒަކީ 2030 ވަނަ އަހަރާ ހަމައަށްދާއިރު، ގައުމުގެ ރީޓެއިލް ވިޔަފާރި 60 ޓްރިލިއަން ޔުއާން (ގާތްގަނޑަކަށް 8.85 ޓްރިލިއަން އެމެރިކާ ޑޮލަރު) އަށް މަތިކުރުމެވެ. މިއީ 2025 ވަނަ އަހަރާ އަޅާބަލާއިރު 20 އިންސައްތައިގެ ކުރިއެރުމެކެވެ.
މިސްރާބު ބަދަލުކުރަން ޖެހުނު ސަބަބު: ބޭރުގެ ބާޒާރުތަކަށް ބަރޯސާވުން ކުޑަކުރުން
ޗައިނާގެ އިގްތިސާދު މިހާތަނަށް ބިނާވެފައި އޮތީ ބޮޑެތި ފެކްޓްރީތަކާއި، އިންފްރާސްޓްރަކްޗާ އިންވެސްޓްމަންޓްތަކުގެ އިތުރުން ބޭރު ގައުމުތަކަށް މުދާ އެކްސްޕޯޓް ކުރުމުގެ މައްޗަށެވެ. ނަމަވެސް، ދުނިޔޭގެ ބާޒާރުގައި އުފެދިފައިވާ ނުތަނަވަސްކަމާއި، އެގައުމުގެ އެތެރޭގެ ރިއަލް އެސްޓޭޓް މާކެޓް ހީނަރުވުމުގެ ސަބަބުން އިގްތިސާދީ ދުވެލި ވަނީ މަޑުޖެހެން ފަށާފައެވެ.
މި އާ ޕްލޭނުގެ ދަށުން ޗައިނާ ސަރުކާރުން ބޭނުންވަނީ ގައުމުގެ ދިރިއުޅޭ ރައްޔިތުން ކުރާ ޚަރަދުތައް އިތުރުކޮށް، އެތެރޭގެ ބާޒާރުގެ ބާރުން އިގްތިސާދު ކުރިއެރުވުމަށެވެ. މިގޮތުން ހާއްސަ އިސްކަމެއް ދިނުމަށް ހަމަޖެހިފައިވާ ދާއިރާތަކަކީ:
- ހިދުމަތްތަކުގެ ދާއިރާ: އުމުރުން ދުވަސްވީ މީހުންނަށް އަޅާލުމުގެ ހިދުމަތް، ކުޑަކުދިން ބެލެހެއްޓުން)، ސިއްހީ ދާއިރާ، ތައުލީމު، އަދި ކުޅިވަރުގެ ދާއިރާ.
- ފަތުރުވެރިކަން: ބޭރުގެ އިތުރު ގައުމުތަކަށް ވިސާއާ ނުލައި އެތެރެވޭނެ މަގު ފަހިކޮށްދިނުމާއި، ޔޫރަޕް އަދި އެމެރިކާއަށް ބާއްވާ ސީދާ ފްލައިޓްތައް އިތުރުކުރުން.
- އާ ޒަމާނީ ވިޔަފާރި: ޑިޖިޓަލް ވިޔަފާރިއާއި، އާޓިފިޝަލް އިންޓެލިޖެންސް ބޭނުންކޮށްގެން ކުރާ ވިޔަފާރިތަކަށް ހިތްވަރުދިނުން.
އިގްތިސާދީ މާހިރުން ފާހަގަކުރާ ގޮތުގައި، މި ޕްލޭން ކާމިޔާބުވާނީ ހަމައެކަނި ވިޔަފާރިތައް ގާއިމުކޮށްގެންނެއް ނޫނެވެ. ޗައިނާގެ އާންމު ރައްޔިތުންގެ އާމްދަނީ އިތުރުވެ، މުސްތަގުބަލާ މެދު އޮންނަ އިތުބާރު ބޮޑުވެގެންނެވެ.
މިހާރު ޗައިނާގެ ޖީޑީޕީގެ ތެރެއިން އާންމު ދިރިއުޅުމުގެ ހަރަދުތަކަށް ހިއްސާކުރަނީ އެންމެ 38 އިންސައްތައެވެ. މިއީ ދުނިޔޭގެ އެވްރެޖް (57 އިންސައްތަ) އަށްވުރެ މާ ދަށް އަދަދެކެވެ. މީގެ މައިގަނޑު ސަބަބަކީ ގައުމުގެ އިޖުތިމާއީ ރައްކާތެރިކަމުގެ ނިޒާމު ބަލިކަށިވުމުން، މުސްތަގުބަލުގައި ބަލިމަޑުކަމެއް ނުވަތަ ކަމެއް ދިމާވެދާނެތީ އާންމުން ފައިސާ ހަރަދުނުކޮށް ބޭންކުތަކުގައި ރައްކާކުރާ މިންވަރު އިތުރުވުމެވެ.
ސަރުކާރުން ބުނެފައިވަނީ، އާންމުންގެ ހަރަދުކުރުމުގެ ބާރު އިތުރުކުރުމަށްޓަކައި، ވަޒީފާގެ ފުރުސަތުތައް އިތުރުކޮށް، މުސާރަ ބޮޑުކޮށް، އަދި ސޯޝަލް ސެކިއުރިޓީ ނިޒާމު އިތުރަށް ހަރުދަނާ ކުރާނެ ކަމަށެވެ. އަދި ކާރު ގަތުމާއި ގެދޮރު ގަތުމުގައި ހުރި ބައެއް ހަރުކަށި ގަވާއިދުތަކަށް ލުއިދޭން ވެސް ޕްލޭނުގައިވެއެވެ.
މި ޕްލޭނަކީ ޗައިނާގެ އިގްތިސާދީ އޮނިގަނޑަށް ގެންނަ ބޮޑު ބަދަލެކެވެ. ނަމަވެސް، އިންވެސްޓަރުންނާއި މާހިރުން ބަލަމުންދާނީ ކުރިއަށް އޮތް އަހަރުތަކުގައި ރީޓެއިލް ސޭލްސްގެ އަދަދުތަކަށާއި ވަޒީފާގެ ބާޒާރަށް އަންނަ ބަދަލުތަކަށެވެ. އާންމުންގެ ޖީބަށް ވަންނަ ފައިސާ އިތުރުނުވެ، މި ބޮޑު އަމާޒަށް ވާސިލުވުމަކީ ޗައިނާއަށް ކުރިމަތިވާނެ އެންމެ ބޮޑު އިމްތިހާނެވެ.
