ޕާކިސްތާނުން އަފްޣާނިސްތާންގައި ހަނގުރާމައިގެ ޖަރީމާ ހިންގާފައިވޭ: އެމްނެސްޓީ

މި އަހަރުގެ ކުރީކޮޅު އަފްޣާނިސްތާނުގެ މަސްތުވާތަކެތީގެ ފަރުވާދޭ މަރުކަޒަކަށް ޕާކިސްތާނުން ދިން ހަމަލާއަކީ ހަނގުރާމައިގެ ކުށަކަށްވެދާނެ ކަމަށް ބަލައި ތަހުގީގުކުރަންޖެހޭ ކަމަށް އެމްނެސްޓީ އިންޓަރނޭޝަނަލް އިން ބުނެފިއެވެ.

ޕާކިސްތާނާއި އަފްޣާނިސްތާނާ ދެމެދު ހިނގަމުންދިޔަ ހަމަނުޖެހުންތައް ހޫނުވެފައިވަނިކޮށް، މާރިޗު 16 ވަނަ ދުވަހު ދިން ކަމަށް ބުނާ މިސައިލް ހަމަލާއެއްގައި ކާބުލްގައި ހުންނަ 'އޮމިޑް ރިހެބިލިޓޭޝަން އެންޑް ޓްރީޓްމެންޓް ސެންޓަރު' ވަނީ ބިމާ ހަމަވެފަ އެވެ.

މި ހަމަލާގައި 269 މީހުން މަރުވެ، ސަތޭކައަށްވުރެ ގިނަ މީހުންނަށް އަނިޔާވެފައިވެ އެވެ. އޭގެ ތެރޭގައި ގިނައީ މަސްތުވާތަކެތީގެ ނުރައްކަލުން ސަލާމަތްވުމަށް ފަރުވާ ހޯދަމުންދިޔަ ބަލި މީހުންނެވެ.

މި ހޮސްޕިޓަލަށް ހަމަލާދިންކަމަށް ޕާކިސްތާނުން އިންކާރުކޮށް، ބުނެފައިވަނީ އެމީހުން އަމާޒުކުރި ތަން އޭގެ އެތައް މޭލެއް ދުރުގައިވާ ކަމަށެވެ. ޕާކިސްތާނުގެ ދިފައީ ވުޒާރާއިން ބުނީ އެ ގައުމުގެ ސިފައިން ހަމަލާދިނީ 'ކޭމްޕް ފީނިކްސް' ކިޔާ " އަސްކަރީ ޓެރަރިސްޓް އާލަތްތައް ރައްކާކޮށްފައިވާ ތަނަކަށް" ކަމަށެވެ.

ނަމަވެސް، އެމްނެސްޓީން ބުނީ އެމީހުންގެ ތަހުގީގަށް ޕާކިސްތާނުން ބުނާފަދަ އަސްކަރީ މަރުކަޒަކަށް އަމާޒުކުރިކަމުގެ އެއްވެސް ހެއްކެއް ފެނިފައިނުވާ ކަމަށެވެ. އަދި ހަނގުރާމައިގެ ދުވަސްވަރު އާންމުން ރައްކާތެރިކުރުމަށް ސިއްހީ މަރުކަޒުތަކަށް ދެވިފައިވާ ބައިނަލްއަގުވާމީ އިންސާނީ ގާނޫނުގެ ހުރުމަތް އިސްލާމްއާބާދުން ކަނޑާލާފައިވާ ކަމަށް އެ ޖަމްއިއްޔާއިން ތުހުމތުކުރެ އެވެ.

ހަމަލާގެ މައިގަނޑު ކަންކަން:

• ގެއްލުން: 269 މީހުން މަރުވެ، ސަތޭކައަށްވުރެ ގިނަ މީހުންނަށް އަނިޔާވި.

• އަމާޒު: 2,000 އެނދުގެ ޖާގަ ހިމެނޭ 'އޮމިޑް ރިހެބިލިޓޭޝަން ސެންޓަރު'.

• އެމްނެސްޓީގެ ބަސް: މިއީ އަސްކަރީ ތަނެއް ނޫން ކަމަށާއި، މިއީ ހަނގުރާމައިގެ ކުށަކަށްވެދާނެ ކަމަށް ބަލައި ތަހުގީގުކުރަންޖެހޭ.

• ޕާކިސްތާނުގެ ބަސް: ހަމަލާދިނީ އަސްކަރީ ސްޓޯރޭޖް ސައިޓަކަށް ކަމަށް ބުނޭ.

މި މަރުކަޒަކީ އަފްޣާނިސްތާނުގެ ތާލިބާން ސަރުކާރުން މަސްތުވާތަކެއްދާ ދެކޮޅަށް ހިންގާ ކެމްޕޭނުގެ މުހިންމު މަރުކަޒެކެވެ. މިއީ ކުރިން ނޭޓޯގެ ބޭހެއްގެ ގޮތުގައި ބޭނުންކުރި ކޭމްޕް ފީނިކްސްއާ ކައިރީގައި ހުރި ތަނެކެވެ.

ހަމަލާއަށްފަހު ސެޓެލައިޓް ފޮޓޯތަކާއި، 60 އަށްވުރެ ގިނަ ފޮޓޯއާއި ވީޑިއޯ ބަލައި، އަދި އެ ސެންޓަރުގެ މުވައްޒަފުންނާ ވާހަކަދައްކައިގެން މިއީ ސިއްހީ ހިދުމަތްދޭ ތަނެއްކަން ކަށަވަރުކޮށްދީފައިވާ ކަމަށް އެމްނެސްޓީން ބުންޏެވެ. އަދި ގިނަ މީހުން މަރުވެފައިވަނީ ކައިރީގައި ހުރި ކެއިންބުއިމުގެ ހޯލާއި ބަދިގެއިން ކަމަށްވާތީ، ހަމަލާދީފައިވަނީ ބަލިމީހުން ކާން އެއްވެ ތިބި ވަގުތެއްގައިކަން ހާމަވެ އެވެ.

އެމްނެސްޓީގެ ދެކުނު އޭޝިއާގެ އެކްޓިން ރީޖަނަލް ޑިރެކްޓަރު އިޒަބެލް ލަސޭ ވިދާޅުވީ، ޕާކިސްތާނުން އަމާޒުކުރަނީ އަސްކަރީ ތަނެއްތޯ ބެލުމަށް އެކަށީގެންވާ މަސައްކަތްކޮށްފައިނުވާ ކަމަށާއި، މި ހަމަލާއަކީ ބައިނަލްއަގުވާމީ އިންސާނީ ގާނޫނާ ހިލާފަށް ދިން ބޮޑު ޖަރީމާއެއް ކަމަށެވެ. އަދި މިކަމާ ގުޅޭގޮތުން މިނިވަން ތަހުގީގެއް ހިންގައި، ޒިންމާވާ ފަރާތްތައް އިންސާފުގެ ކުރިމައްޗަށް ގެނައުމަށް އޭނާ ގޮވާލެއްވި އެވެ.