ޕާކިސްތާނާއި އަފްޣާނިސްތާން ގުޅޭ ބޯޑަރަކީ މިހާރު ބަރު ހަތިޔާރުގެ ހަމަލާތަކާއި ބިނާވެށި ހަލާކުކޮށްލުމުގެ ހަނގުރާމައިގެ މައިދާނެކެވެ. އާދިއްތަ ދުވަހު، ކުއްރަމް ސަރަހައްދުގެ ބޯޑަރު މަރުކަޒުތަކަށް އަފްޣާން ތާލިބާނުން އެއްވެސް އުދުވާނެއްނެތި ބަރު ހަތިޔާރާއި މޯޓަރު ބަޑިން ދިން ހަމަލާތަކާ ގުޅިގެން، ޕާކިސްތާނުގެ ސަލާމަތީ ބާރުތަކުން ވަނީ ފުރިހަމަ ރައްދު ހަމަލާތަކެއްދީ ބަދަލު ހޯދާފައެވެ. ސަލާމަތީ އިދާރާތަކުން ބުނާގޮތުގައި، ވަގުތުން ދިން މި ރައްދު ހަމަލާގައި ލުއި އަދި ބަރު ހަތިޔާރު ބޭނުންކޮށްގެން ތާލިބާނުންގެ ހަމަލާދޭ ތަންތަނަށާއި ދިފާއީ ޗެކްޕޮއިންޓްތަކަށް ނިޒާމީގޮތެއްގައި އަމާޒުކޮށްފައިވެއެވެ. މީގެ ސަބަބުން އަފްޣާނުގެ ގިނަ މަރުކަޒުތަކެއް ދޫކޮށްލަން އެމީހުންނަށް މަޖުބޫރުވިއެވެ.
ޕާކސިްތާނާއި އަފްޣާންގެ މި ފަހުގެ ކުރިމަތިލުމަކީ ހަމައެކަނި ބޯޑަރު ސަރަހައްދު މަތީގައި ހިނގި ވަކި ހާދިސާއެއް ނޫނެވެ. މިއީ ރަސްމީ ޑިޕްލޮމެޓިކް އެއްބަސްވުންތަކުގެ އެއްވެސް ބުރަދަނެއް ނެތްކަން ހާމަކޮށްދޭ، މަސްތަކަކަށް ދެމިގެންގޮސްފައިވާ ރޭވުންތެރި ކުރިއެރުވުމެކެވެ. ބޯޑަރު ހުރަސްކޮށް ދެމުންދިޔަ ހަމަލާތަކާ ގުޅިގެން، ފެބްރުއަރީ 26 ގައި ޕާކިސްތާނުން ވަނީ ހަނގުރާމަވެރިންގެ ހާލިތަކާއި ތާލިބާނުންގެ އޮނިގަނޑުތަކަށް އަމާޒުކޮށް އޮޕަރޭޝަން ޣަޟަބް ލިލްހައްގު ފަށާފައެވެ.
އަސްކަރީ އަދި ދައުލަތުގެ މައުލޫމާތުތަކުން އެއްކުރެވިފައިވާ ހިސާބުތަކުން މި ހަނގުރާމައިގެ ބޮޑުމިން ހާމަވެއެވެ.
-
މަރުވި އަދި ޒަހަމްވި މީހުން: އޮޕަރޭޝަން ފެށިފަހުން، ދައުލަތުގެ ހިސާބުތަކުން ދައްކާގޮތުގައި އަފްޣާން ތާލިބާނުންގެ 796 ހަނގުރާމަވެރިން މަރުވެ، 1,043 އަށްވުރެ ގިނަ މީހުން ވަނީ ޒަހަމްވެފައެވެ.
-
ޣުލާމް ޚާން އޮފެންސިވް: އޭޕްރީލް 2-3 ގައި ޣުލާމް ޚާން ސަރަހައްދުން ބޯޑަރު ހުރަސްކޮށް ދޭންއުޅުނު ބޮޑު ހަމަލާއެއް ނާކާމިޔާބުކޮށްލިއިރު، އެ ހަމަލާގައި އެކަނިވެސް 37 ހަނގުރާމަވެރިން މަރުވެ، 80 އަށްވުރެ ގިނަ މީހުން ޒަހަމްވިއެވެ.
-
އާންމުންނަށް ލިބޭ ގެއްލުން: ބޯޑަރުގެ ހަމަލާތަކުގެ ބޮޑު ގެއްލުމެއް ލިބެމުންދަނީ އެ ސަރަހައްދުގައި ދިރިއުޅޭ އާންމު ރައްޔިތުންނަށެވެ. އޭޕްރީލް މަހުގެ ފަހުކޮޅު، އަފްޣާނިސްތާނުން ދެކުނު ވަޒީރިސްތާނުގެ އަންގޫރު އަައްޑާ އަވަށަށް ފޮނުވާލި މޯޓަރު ޝެލްތަކުގެ ސަބަބުން އާންމުންގެ ފަސް މީހަކު ވަނީ ޒަހަމްވެފައެވެ. އޭގެ ތެރޭގައި ހަތަރު ކުޑަކުދިންނާއި އަންހެނަކު ހިމެނެއެވެ.
