އަހަރަކީ 2012 އެވެ. ސަބީރު ބާތިއާ ހުރީ އޭނާގެ ހަޔާތުގެ އެންމެ ކާމިޔާބު އެއް ޒަމާނުގައެވެ. އޭނާއަކީ މަޝްހޫރު އީމެއިލް ޚިދުމަތް ކަމަށްވާ "ހޮޓްމެއިލް" އުފެއްދި ކާމިޔާބު އެންޓްރަޕްރިނަރ، އޭނާގެ އަމިއްލަ ގައުމު އިންޑިއާއިން އުއްމީދީ މުސްތަގުބަލެއް ދުށް މީހެކެވެ. އެގޮތުން އޭނާ ނިންމީ އިންޑިއާއިން "އަލްޓްރާ ލަގްޒަރީ" އެޕާޓްމަންޓެއް ގަތުމަށެވެ. އެއީ އޭނާގެ ޒުވާން އުމުރުގައި އިންޑިއާގައި ބިނާކުރަން ބޭނުންވި ފުރިހަމަ ދިރިއުޅުމުގެ ރަމްޒެކެވެ.
ނަމަވެސް، 14 އަހަރު ފަހުން، މިއަދު އުމުރުން ދުވަސްވަމުންދާއިރު، ބާތިއާއަށް ލިބުނު ހަގީގީ ހަދިޔާއަކީ އޭނާ ގަތް އެޕާޓްމަންޓުގެ ތަޅުދަނޑިއެއް ނޫނެވެ. އޭނާއަށް ލިބުނީ އިތުރު 6 އަހަރުގެ އިންތިޒާރެކެވެ. އެޕާޓްމަންޓް ހަވާލުކުރެވޭނެ ކަމަށް މިހާރު އަންގާފައިވަނީ 2032 ވަނަ އަހަރެވެ. ފުރިހަމަ 20 އަހަރުގެ އިންތިޒާރެކެވެ.
"އަހަރެން މި އެޕާޓްމަންޓް ގަތީ ޒުވާން އުމުރުގައި، އިންޑިއާގައި ފުރިހަމަ ދިރިއުޅުމެއް ގާއިމުކުރުމުގެ އުއްމީދުގައި. ނަމަވެސް އެ ތަން އަހަރެނަށް ލިބޭއިރު އަހަރެން ހުންނާނީ މުސްކުޅިވެފައި،" ބާތިއާ އޭނާގެ އެކްސް އެކައުންޓްގައި ރިއަލް އެސްޓޭޓް ނިޒާމުގެ މައްސަލަތަކަށް އަލިއަޅުވާލަމުން ލިޔެފައިވެއެވެ.
މިއީ ހަމައެކަނި މަޝްހޫރު މީހެއްގެ ނުވަތަ މިލިއަނަރެއްގެ ޝަކުވާއެއް ނޫނެވެ. މިއީ އިންޑިއާގެ މެދުފަންތީގެ މިލިއަނުން އެތައް ބަޔަކު ކޮންމެ ދުވަހަކު ތަހައްމަލުކުރަމުންދާ، އަދި އެއްވެސް ބަޔަކަށް ޒިންމާނުުނެގޭ ގޮތަށް ގާނޫނީ އަދި އިދާރީ މަކަރުވެރިކަމުގެ ތެރޭގައި އޮތް ބޮޑު މައްސަލައެއްގެ ކުޑަ މިންވަރެކެވެ.
"ފުނޑިގެން ގޮސްފައިވާ ނިޒާމެއް"
ބާތިއާގެ ވާހަކައިގައި އޭނާ ވަނީ ވަކި ކުންފުންޏެއް ނުވަތަ ސިޔާސީ ޕާޓީއެއް ކުށްވެރިކުރުމުގެ ބަދަލުގައި، މުޅި ނިޒާމަށް ފާޑުކިޔާފައެވެ.
"އަހަރެން ބޭނުމެއް ނޫން ވަކި މީހަކު ކުށްވެރިކުރާކަށް. އަހަރެން ކުރިންވެސް ބުނި ފަދައިން، މުޅި ނިޒާމު ވަނީ ފުނޑިގެން ގޮސްފައި. ތައުލީމީ ވަޒީރު ބަދަލުކުރުމުން މައްސަލަތައް ހައްލުވާނެ ކަމަށް މީހުން ހީކުރި ނަމަވެސް އެއީ ވާނެ ކަމެއް ނޫން. ހައްލުކުރަންޖެހެނީ މުޅި ނިޒާމު،" ބާތިއާ ލިޔެފައިވެއެވެ.
އާންމުންގެ ރައްދު: ތާޖު މަހައްލު ބިނާކުރަންވެސް ނެގީ 22 އަހަރު
ބާތިއާގެ މި ޕޯސްޓާއެކު އިންޓަނެޓުގައި ބޮޑު ބަހުސެއް ވަނީ އުފެދިފައެވެ. އެތައް ހާސް އާންމުންނެއް ވަނީ އިންޑިއާގެ ރިއަލް އެސްޓޭޓް އިމާރާތްކުރާ ކުންފުނިތަކުގެ ސަބަބުން އަހަރުތަކެއް ވަންދެން ގޭގޭގެ ކުއްޔާއި، އިމާރާތް ނުނިމޭ ގޭގޭގެ އިންސްޓޯލްމަންޓް ދައްކަންޖެހި، ހާލުގައި ޖެހިފައިވާ ގޮތުގެ ވާހަކަތައް ހިއްސާކޮށްފައެވެ.
އާންމު ބައެއް މީހުން ވަނީ މިކަމަށް މަޖާޒީ ގޮތަކަށް ރައްދުވެސް ދީފައެވެ. އެގޮތުން އެކަކު ލިޔެފައިވަނީ "ތާޖު މަހައްލު ބިނާކުރަންވެސް 22 އަހަރު ނެގި. އިންޑިއާގެ ބިލްޑަރުންގެ ގާބިލުކަން ކުޑަކަމަށް ނުވިސްނާ!" މިހެންނެވެ.
މި ހުރިހާ މާޔޫސްކަމެއްގެ ތެރެއިންވެސް، ބާތިއާ ވަނީ އިންޑިއާގެ މުސްތަގުބަލާމެދު އޮތް އުއްމީދު އެއްކޮށް ދޫކޮށް ނުލާފައެވެ.
"އާނއެކެވެ، އިންޑިއާއަކީ ދުނިޔޭގައި ބޭނުން ނުކުރެވި އޮތް އެންމެ ބޮޑު ގާބިލުކަން އޮތް ގައުމު. އަހަރެމެންގެ ވިސްނުން ތެދުވެރިކަމަށް ބަދަލުކުރެވިއްޖެނަމަ، އިންޑިއާ ވެގެންދާނީ ދުނިޔޭގައި ދިރިއުޅެން އެންމެ ރަނގަޅު 10 ގައުމުގެ ތެރެއިން އެއް ގައުމަށް،" އޭނާގެ ވާހަކަ ނިންމާލަމުން ލިޔެފައިވެއެވެ.
