އެމެރިކާއަށް އެތެރެކުރާ ޖެނެރިކް ބޭސްތަކުން ނަގާ ޓެރިފް ބޮޑުކުރުމަށް އެމެރިކާގެ ރައީސް ޓްރަމްޕް ނިންމަވައިފިއެވެ. މި ފިޔަވަޅުގެ ސަބަބުން އެމެރިކާއަށް އެންމެ ގިނައިން ޖެނެރިކް ބޭސް އެކްސްޕޯޓްކުރާ އިންޑިއާއަށް ބޮޑެތި ގޮންޖެހުންތަކަކާ ކުރިމަތިލާންޖެހޭނެ ކަމަށް ބެލެވެއެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް "ޓްރޫތު ސޯޝަލް" ގައި އިއުލާން ކުރެއްވި ގޮތުގައި، މަރުހަލާތަކަކަށް ބަހާލައިގެން ތަންފީޒުކުރާ މި ޓެރިފް ޕްލޭން ފެށޭނީ 2026 ވަނަ އަހަރުގެ އޮގަސްޓް 1 އިންނެވެ.
ޓެރިފް ބޮޑުކުރާނެ މަރުހަލާތައް:
- ފުރަތަމަ 2 އަހަރު: އެމެރިކާއަށް އެތެރެކުރާ އެއްވެސް ޖެނެރިކް ބޭހަކުން ޓެރިފެއް ނުނަގާނެއެވެ.
- ތިންވަނަ އަހަރު: ޓެރިފްގެ މިންވަރު 100 އިންސައްތައަށް މަތިކުރެވޭނެއެވެ.
- އޭގެ ފަހުން: ޓެރިފް 200 އިންސައްތައަށް ބޮޑުކުރެވޭނެއެވެ.
ޓްރަމްޕް ވިދާޅުވި ގޮތުގައި މި ނިންމެވުމުގެ މައިގަނޑު ބޭނުމަކީ އެމެރިކާގެ ރައްޔިތުންގެ ރައްކާތެރިކަން ކަށަވަރުކުރުމާއި، ބޭސް އުފައްދާ ކުންފުނިތަކުން އެމެރިކާގައި ފެކްޓަރީތައް ބިނާކޮށް އެމެރިކާގެ އެތެރޭގައި ބޭސް އުފެއްދުން އިތުރުކުރުމަށް ބާރުއެޅުމެވެ. އަދި ކަނޑައެޅިފައިވާ މުއްދަތުގައި އެމެރިކާގައި އިންވެސްޓް ނުކުރާ ކުންފުނިތަކަށް މިއީ ދެވޭ އަދަބެއް ކަމަށްވެސް އޭނާ ވިދާޅުވިއެވެ.
އިންޑިއާއަށް ކުރާނެ އަސަރު:
ދުނިޔޭގެ "ފާމަސީ" ގެ ގޮތުގައި މަޝްހޫރުވެފައިވާ އިންޑިއާއަކީ ދުނިޔޭގެ އެކި ކަންކޮޅުތަކަށް ބޮޑު އިންސައްތައެއްގެ ޖެނެރިކް ބޭސް ފޯރުކޮށްދޭ ގައުމެވެ. އެމެރިކާގައި ބޭނުންކުރާ ޖެނެރިކް ބޭހުގެ ގާތްގަނޑަކަށް 40 އިންސައްތައަކީ އިންޑިއާއިން އެތެރެކުރާ ބޭހެވެ. 2024-2025 މާލީ އަހަރު އިންޑިއާއިން ވަނީ 9.7 ބިލިއަން އެމެރިކާ ޑޮލަރުގެ ބޭސް އެމެރިކާއަށް އެކްސްޕޯޓްކޮށްފައެވެ.
އިންޑިއާއިން އެމެރިކާއަށް އެކްސްޕޯޓްކުރާ ބޭސްތަކުގެ ތެރޭގައި ބްލަޑް ޕްރެޝަރު ބޭސް، ހަކުރުބަލި، ކެންސަރު އަދި ނަފްސާނީ ބަލިތަކަށް ބޭނުންކުރާ މުހިންމު ބޭސްތައް ހިމެނެއެވެ. މީގެ އިތުރުން އެމެރިކާގައި ބޭނުންކުރާ އާއިލާ ރޭވުމުގެ ބާތު ކޮންޓްރޯލް ބޭހުގެ 65 އިންސައްތައަކީ އިންޑިއާގެ ދެ ކުންފުންޏަކުން އުފައްދާ ބޭހެވެ.
މި ފިޔަވަޅުގެ ސަބަބުން އިންޑިއާގެ ބޭސް އުފައްދާ ކުންފުނިތަކަށް ބޮޑު ނޭދެވޭ އަސަރެއް ކުރާނެ ކަމަށް ބެލެވުނު ނަމަވެސް، މިއަހަރުގެ ފެބްރުއަރީ މަހު އިންޑިއާއާއި އެމެރިކާއާ ދެމެދު ވެވިފައިވާ ވިޔަފާރީގެ އެއްބަސްވުމުގެ ދަށުން ޖެނެރިކް ބޭހާ ގުޅޭގޮތުން މަޝްވަރާކޮށްގެން ހައްލުތަކެއް ހޯދުމުގެ ފުރުސަތު އޮތްކަން ރިޕޯޓްތަކުގައި ފާހަގަކޮށްފައިވެއެވެ.
