ރާއްޖޭގައި އެޗްއައިވީ ނުވަތަ އެއިޑްސް ޖެހޭ މީހުންގެ އަދަދު މަދުވުމުގެ ބަދަލުގައި، އަހަރުން އަހަރަށް އިތުރުވަމުންދާކަން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކައިފިއެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދުވަހު ނޫހަކުން ހޯދި މައުލޫމާތުތަކުން އެނގޭ ގޮތުގައި، ފާއިތުވި ދެ އަހަރު ތެރޭގައި އެކަނިވެސް 11 ދިވެއްސަކަށް ވަނީ މި ބަލި ޖެހިފައެވެ. އޭގެ ތެރެއިން 2024 ވަނަ އަހަރު 6 މީހަކަށް އަދި މިދިޔަ އަހަރު 5 މީހަކަށް މި ބަލި ޖެހިފައިވެއެވެ. މިއީ އޭގެ ކުރީ އަހަރު 2023 ގައި ތިން މީހަކަށް މި ބަލި ޖެހުމަށްފަހު، ފެންނަމުންދާ ކަންބޮޑުވާންޖެހޭފަދަ ކުރިއެރުމެކެވެ.
ރާއްޖެއިން ފުރަތަމަ އެޗްއައިވީގެ ކޭހެއް ފެނުނުތާ 35 އަހަރު ފާއިތުވެފައިވާއިރު، މިހާތަނަށް މި ބަލި ޖެހުނު ދިވެހިންގެ ޖުމްލަ އަދަދު 54 އަށް ވަނީ އަރާފައެވެ. އެޗްޕީއޭގެ ތަފާސް ހިސާބުތަކުން ދައްކާގޮތުން، މި ބަލީގެ އަސަރު އެންމެ ބޮޑަށް ފެންނަނީ ފިރިހެނުންގެ ތެރެއިންނެވެ؛ އޭގެ ތެރޭގައި 43 ފިރިހެނުންނާއި 7 އަންހެނުން ހިމެނެއެވެ.
ބަލިޖެހޭ މީހުންގެ އެވެރެޖް އުމުރަކީ 33 އަހަރު ކަމަށްވާއިރު، މިއީ ގައުމުގެ މަސައްކަތްކުރާ އާބާދީއަށް މި ބަލީގެ ނުރައްކާ އޮތް މިންވަރު ހާމަކޮށްދޭ އަދަދެކެވެ. މިހާތަނަށް މި ބަލީގައި ރާއްޖެއިން 16 މީހަކު ވަނީ ދުނިޔެ ދޫކޮށްފައެވެ.
އެޗްއައިވީ ފެތުރޭ މައިގަނޑު ގޮތްތަކުގެ ތެރޭގައި ރައްކާތެރިކަމެއް ނެތި ޖިންސީ ގުޅުން ހިންގުމާއި، މަސްތުވާތަކެތި ބޭނުންކުރުމަށްފަހު ކަށި ނުވަތަ ސިރިންޖު ހިއްސާކުރުމާއި، ބަލިޖެހިފައިވާ މަންމަގެ ފަރާތުން ދަރިފުޅަށް އަދި ވައިރަސް ހުރި ލޭ އެޅުން ފަދަ ކަންކަން ހިމެނެއެވެ.
ސިއްހީ މާހިރުން ފާހަގަކުރާ ގޮތުގައި، މި ބައްޔަށް ފަރުވާ ދިނުމަށް އެންޓިރެޓްރޯ ވައިރަލް ޓްރީޓްމަންޓް 2004 ވަނަ އަހަރުން ފެށިގެން ރާއްޖޭގައި ހިލޭ ދެމުންދެއެވެ. މީގެ އިތުރުން، ބަލިން ރައްކާތެރިވުމަށްޓަކައި ދެވޭ 'ޕްރެޕް' ފަރުވާވެސް މިހާރު ރާއްޖެއިން ލިބެން ހުރި ނަމަވެސް، އަދަދުތައް ދަށަށް ނުގޮސް މަތިވަމުން ދިއުމަކީ އާންމު ސިއްހަތުގެ ގޮތުން ސަމާލުކަން ދޭންޖެހޭ ބޮޑު މައްސަލައެއްކަން ތަފާސް ހިސާބުތަކުން ސާބިތުވެއެވެ.
