ރަޝިއާ އާއި ޔުކްރޭނުން އެއްގައުމުން އަނެއް ގައުމުގެ ސަރަހައްދުތަކަށް އަމާޒުކޮށް ރޭގަނޑުގެ ވަގުތެއްގައި ދިން ވަރުގަދަ ޑްރޯން އަދި މިސައިލް ހަމަލާތަކެއްގައި މަދުވެގެން 12 މީހުން މަރުވެ، އާންމުންގެ ގިނަ ވަސީލަތްތަކަކަށް ބޮޑެތި ގެއްލުންތަކެއް ލިބިއްޖެއެވެ. ދެ ގައުމުގެ ކުރިމަތިލުންތައް ކުރީން ފްރަންޓްލައިންތަކުގައި އޮތް ނަމަވެސް، ދުރު ރާސްތާގެ ހަމަލާތައް އިތުރުކުރުމުގެ ސަބަބުން އާންމުން މަރުވާ މިންވަރު ވަނީ އިތުރުވާން ފަށާފައެވެ.
ރަޝިއާގެ އޮފިޝަލުން މަޢުލޫމާތު ދެއްވާ ގޮތުގައި ޔުކްރޭނުން ފޮނުވާލި ސަތޭކައިން ގުނާލެވޭ ފަދަ ގިނަ ޑްރޯންތަކެއްގެ ހަމަލާތަކުގައި ރަޝިއާގެ ރޮސްޓޮވް ސަރަހައްދުން ފަސް މީހަކު މަރުވެފައިވާއިރު، މޮސްކޯ އާއި ބެލްގޮރޯޑް ސަރަހައްދުން ދެ މީހަކު ވަނީ މަރުވެފައެވެ. މޮސްކޯ ކައިރީގައިވާ އިލެކްޓްރޯނިކް ވިޔަފާރިކުރާ ކުންފުންޏެއްގެ ގުދަނެއްގައި އަލިފާން ރޯވެފައިވާއިރު، ރަޝިއާގެ ދިފާއީ ވުޒާރާއިން ބުނީ ރޭގަނޑުގެ ވަގުތުގައި 800 އަށްވުރެ ގިނަ ޑްރޯން ވައްޓާލާފައިވާ ކަމަށެވެ.
އަނެއްކޮޅުން، ރަޝިއާއިން ޔުކްރޭނަށް ދިން ހަމަލާތަކުގައި ކްރިވީ ރިހްގައި ހުންނަ ޔުކްރެއިންގެ އެންމެ ބޮޑު ދަގަނޑު އުފައްދާ ކާރުޚާނާއަށް ބޮޑެތި ގެއްލުންތަކެއް ދީ، ދެ މީހުން މަރުވެ 14 މީހަކު ވަނީ ޒަޚަމްވެފައެވެ. މީގެ އިތުރުން ޒަޕޮރީޒިއާ އާއި ސުމީ ސަރަހައްދުން އަދި ކީވްގެ އާންމު ތަންތަނަށް ދިން ހަމަލާތަކުގައިވެސް މީހުން މަރުވެ، ތާރީޚީ ފޮތް މާރުކޭޓެއް އަނދައިގެން ގޮސްފައިވެއެވެ.
ޔުކްރޭންގެ ރައީސް ވޮލޯޑިމީރް ޒެލެންސްކީ ވަނީ ރަޝިއާއިން އާންމުންގެ ވަސީލަތްތަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ދޭ ހަމަލާތައް ކުށްވެރިކުރައްވައި، ހުޅަނގުގެ ގައުމުތަކުން ވައިގެ ދިފާއީ ނިޒާމުތައް އިތުރަށް ފޯރުކޮށްދިނުމަށް އެދިވަޑައިގެންފައެވެ.
މި ހަމަލާތަކުގެ އަސަރު މުޅި ސަރަހައްދަށް ފެތުރެމުންދާއިރު، ރޫމޭނިއާގެ ވައިގެ ސަރަހައްދަށް ވަން ޑްރޯނެއް ނޭޓޯގެ އެފް-18 ޖެޓަކުން ވަނީ ވައްޓާލާފައެވެ.
