އިންޑިއާއަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން، ލީޝްޓެންސްޓީންގެ ޕްރިންސް އެލޮއިސް އާއި އޭނާގެ އަނބިކަނބަލުން ޕްރިންސެސް ސޯފީ، އިންޑިއާގެ ބޮޑުވަޒީރު ނަރެންދުރަ މޯދީއާ ނިއުދިއްލީ ގެ ހައިދަރުއާބާދު ހައުސްގައި ބައްދަލުކުރައްވައިފިއެވެ. ދެ ގައުމުގެ މެދުގައި ބޭއްވި ރަސްމީ މަޝްވަރާތަކުގައި އިގްތިސާދީ، ވިޔަފާރި އަދި ޓެކްނޮލޮޖީގެ ދާއިރާއިން ގުޅުން ބަދަހިކުރުމާ މެދު ވަނީ ފުޅާ ދާއިރާއެއްގައި ވާހަކަދައްކަވާފައެވެ.
މިއީ ލީޝްޓެންސްޓީންގެ ދައުލަތުގެ ވެރިއަކު އިންޑިއާއަށް ކުރައްވާ ފުރަތަމަ ފުރަމާނަ ދަތުރުފުޅެވެ. މި ދަތުރުފުޅުގެ ތެރެއިން ރާޝްޓްރަޕަތީ ބަވަންގައި ބޭއްވި ޚާއްސަ އިސްތިގުބާލު ކުރުމުގެ ރަސްމިއްޔާތުގައި އިންޑިއާގެ ރައީސް ދުރޯޕަދީ މުރުމޫ އާއި ބޮޑުވަޒީރު މޯދީ ވަނީ މެހުމާނުންނަށް ހޫނު މަރުހަބާއެއް ދަންނަވާފައެވެ.
ޕްރިންސް އެލޮއިސް ފާހަގަކުރެއްވި ގޮތުގައި، މި ދަތުރުފުޅަކީ އިންޑިއާއާއެކު އޮތް ގުޅުމަށް ލީޝްޓެންސްޓީންއިން ދޭ މުހިންމުކަން ހާމަކޮށްދޭ ތާރީޚީ ދަނޑިވަޅެކެވެ. ޚާއްސަކޮށް، އިންޑިއާއާއި ޔޫރަޕިއަން ފްރީ ޓްރޭޑް އެސޯސިއޭޝަން (އީއެފްޓީއޭ) އާ ދެމެދު ވެވުނު "ޓްރޭޑް އެންޑް އިކޮނޮމިކް ޕާޓްނަރޝިޕް އެގްރީމަންޓް" (ޓީއީޕީއޭ) އަށް އަމަލުކުރަން ފެށިފަހުން ދެ ގައުމުގެ ވިޔަފާރިއަށް ބޮޑު ކުރިއެރުމެއް ލިބިފައިވާ ކަމަށް އޭނާ ވިދާޅުވިއެވެ. "އަޅުގަނޑުމެންގެ އަމާޒަކީ މި ސްޓްރެޓެޖީ ގެ ދަށުން އިންނޮވޭޝަން، އެޑްވާންސްޑް މެނުފެކްޗަރިންގ، މާލީ ޚިދުމަތްތައް، ތައުލީމު އަދި ޓެކްނޮލޮޖީގެ ދާއިރާއިން އިގްތިސާދީ ގުޅުންތައް އިތުރަށް ވަރުގަދަކުރުން،" ރާޝްޓްރަޕަތީ ބަވަންގައި ވާހަކަދައްކަވަމުން ޕްރިންސް އެލޮއިސް ވިދާޅުވިއެވެ.
މި ދަތުރުފުޅުގެ ތެރެއިން އިންޑިއާގެ ޚާރިޖީ ވަޒީރު އެސް ޖައިޝަންކަރުވެސް ވަނީ ޕްރިންސް އެލޮއިސްއާ ބައްދަލުކުރައްވާފައެވެ. މީސް މީޑިއާ އެކްސްގައި ކުރެއްވި ހާމަކުރުމެއްގައި ޖައިޝަންކަރު ވިދާޅުވީ، އީއެފްޓީއޭ-ޓީއީޕީއޭ އެއްބަސްވުމުގެ ސަބަބުން ދެ ގައުމުގެ މެދުގައި ތަފާތު ދާއިރާތަކުން ގުޅުން ބަދަހިވަމުންދާ ކަމަށާއި، ބޮޑުވަޒީރު މޯދީއާއެކު ބޭއްވެވި މަޝްވަރާތަކުން ދެ ގައުމުގެ މަސްލަހަތު ހިމެނޭ ކަންކަމުގައި އިތުރު ކުރިއެރުންތަކެއް ލިބިގެންދާނެ ކަމަށެވެ.
އިންޑިއާއާއި ލީޝްޓެންސްޓީންއާ ދެމެދު ސިޔާސީ ގުޅުން ގާއިމުކުރެވުނީ 1993 ވަނަ އަހަރުއެވެ. ފާއިތުވި އަހަރުތަކުގައި ދެ ގައުމުގެ މެދުގައި ޑިޕްލޮމެޓުން ގެ ދަތުރުފުޅުތައް އިތުރުވެފައިވާއިރު، ޕްރިންސް އެލޮއިސް ވަނީ މީގެ ކުރިން 2010، 2018 އަދި 2026 ވަނަ އަހަރުގެ ފެބްރުއަރީ މަހު ބޭއްވި އޭއައި އިމްޕެކްޓް ސަމިޓް ގައި ބައިވެރިވެވަޑައިގަތުމަށްވެސް އިންޑިއާއަށް ޒިޔާރަތްކުރައްވާފައެވެ.
މުމްބާއީ އާއި ވަޅޯދްރާއަށް ކުރެއްވި ދަތުރުފުޅަށްފަހު ނިއުދިއްލީ އަށް ވަޑައިގެންނެވި ލީޝްޓެންސްޓީންގެ ޚާއްސަ ވަފުދުގައި އެ ގައުމުގެ ވިޔަފާރިވެރިންނާއި އިސް މަސްއޫލުވެރިން ބައިވެރިވެވަޑައިގަންނަވައެވެ. މި ދަތުރުފުޅު ނިންމަވާލެއްވުމަށްފަހު ވަފުދު އެނބުރި ވަޑައިގަތުމަށް ހަމަޖެހިފައިވަނީ ބުދަ ދުވަހުއެވެ.
