އިނގިރޭސިވިލާތުގައި އަންނަ އަހަރު ބޭއްވުމަށް ހަމަޖެހިފައިވާ ޖީ20 ސަމިޓަށް ރަޝިޔާ ގެ ރައީސް ވްލަދިމީރް ޕޫޓިން އަށް ދަޢުވަތު ނުދެއްވާނެ ކަމަށް އިނގިރޭސިވިލާތުގެ ބޮޑުވަޒީރު އެންޑީ ބަރންހަމް އިއުލާނު ކުރައްވައިފިއެވެ.
ދި އިކޮނޮމިސްޓް ނޫހަށް ދެއްވި ޚާއްސަ އިންޓަވިއުއެއްގައި، އިނގިރޭސިވިލާތުގައި އޮންނަ ސަމިޓުގައި ޕޫޓިން ބައިވެރިވެ ވަޑައިގަންނަވާނެތޯ ސުވާލުކުރުމުން ބޮޑުވަޒީރު ބަރންހަމް ވަނީ ސީދާކޮށް ނޫނެކޭ ވިދާޅުވެފައެވެ. އަންނަ އަހަރުގެ ނޮވެމްބަރު މަހު އިނގިރޭސިވިލާތުގެ މެންޗެސްޓާގައި ބޭއްވުމަށް ހަމަޖެހިފައިވާ މި ސަމިޓަކީ ބައިނަލްއަޤުވާމީ އިޤްތިޞާދީ އަދި ސިޔާސީ މަސްރަހު ގައި މުހިންމު ނިންމުންތަކެއް ނިންމާނެ ބައްދަލުވުމެކެވެ.
ޔުކްރޭން ހަނގުރާމައާ ގުޅިގެން ހުޅަނގުގެ ޤައުމުތަކުން ރަޝިޔާ އެކަހެރިކުރުމަށް މަސައްކަތްކުރަމުންދިޔަ ނަމަވެސް، ރަޝިޔާއަކީ އަދިވެސް ޖީ20 ގެ މެންބަރު ޤައުމެކެވެ. އާންމު އުޞޫލުން ސަމިޓް ބާއްވާ ޤައުމުގެ ވެރިޔާ އިއްތިހާދުގެ ހުރިހާ މެންބަރު ޤައުމުތަކުގެ ވެރިންނަށް ދަޢުވަތު އަރުވައެވެ. ނަމަވެސް އިނގިރޭސިވިލާތުގެ މި ނިންމުމަކީ ވިލާތުގެ އިއްތިހާދު އާއި ހުޅަނގުގެ ބާރުތަކުން ރަޝިޔާއާ ދެކޮޅަށް ގެންގުޅޭ ހަރުކަށި ސްޓްރެޓެޖީ އިތުރަށް ވަރުގަދަކުރުމުގެ ގޮތުން ނިންމެވި ނިންމެވުމެކެވެ.
މި ނިންމެވުން އައިސްފައިވަނީ އެމެރިކާގެ ޚާރިޖީ ވަޒީރު މާކޯ ރޫބިއޯ، ލަންޑަންގެ ސިޔާސަތާ ޚިލާފަށް، މިއަހަރުގެ ޑިސެމްބަރު މަހު މިއާމީގައި ބާއްވާ ޖީ20 ބައްދަލުވުމަށް ޕޫޓިންއަށް ދަޢުވަތު ދެއްވާފައިވާ ކަމަށް ވިދާޅުވެފައިވާ ދަނޑިވަޅެއްގައެވެ. ވޮޝިންގޓަންއިން ބުނެފައިވަނީ އެއީ ރައީސް ޑޮނަލްޑް ޓްރަމްޕް އާއި ދުނިޔޭގެ އެހެން ލީޑަރުންނާއެކު މަޝްވަރާކުރުމަށް ޕޫޓިންއަށް ލިބޭނެ ފުރުޞަތެއް ކަމަށެވެ.
