ސައޫދީ އަރަބިއްޔާ އާއި މިސްރު ގުޅުވާލާ ހައިސްޕީޑް ރެއިލްވޭ އެޅުމުގެ މަޝްރޫއު ކުރިއަށް ގެންދިއުމަށް ރަސްމީކޮށް ނިންމައިފިއެވެ. މިއީ 2016 ވަނަ އަހަރު ސައޫދީ ސަލްމާން ބިން އަބްދުލްއަޒީޒް ރަސްގެފާނު ހުށަހެޅުއްވި ތަސައްވުރެއްގެ މުހިންމު ފިޔަވަޅެކެވެ.
މިސްރުގެ ޓްރާންސްޕޯޓް މިނިސްޓަރު ކަމާލް އަލްވަޒީރު ގާހިރާގައި ބޭއްވެވި އިގްތިސާދީ ކޮންފަރެންސެއްގައި ވިދާޅުވި ގޮތުގައި، ދެ ގައުމު ގުޅުވާލާ ބްރިޖެއް ނުވަތަ ޓަނަލެއް އެޅުމުގެ މަސައްކަތް ވަނީ ނިމި، މަޝްރޫއު ތަންފީޒު ކުރުމުގެ މަރުހަލާ ފެށުމަށް ތައްޔާރުވެފައެވެ. މި ރެއިލްވޭ އަކީ ސައޫދީ އަރަބިއްޔާގެ މުސްތަގުބަލުގެ ސިޓީ ނިއޯމްއާ ގުޅިފައިވާ މަޝްރޫއެކެވެ.
އަބީދޯސްގެ އާސާރީ ސަރަހައްދުން ރެއިލްވޭ ދަތުރުކުރާގޮތަށް އޮތް އަސްލު ޕްލޭން ބަދަލުކޮށް، އާސާރީ ތަންތަން ހިމާޔަތްކުރުމަށްޓަކައި މިހާރު ވަނީ އެ ސަރަހައްދުގެ މަތިން ދަތުރުކުރާގޮތަށް ބަދަލުކޮށްފައެވެ. މީގެ ސަބަބުން ޕިރަމިޑްތަކާ ކައިރިން ދަތުރުކުރާއިރު ފަސޭހައިން ފެންނާނެ ގޮތް ވެސް ވަނީ ހަމަޖެހިފައެވެ.
މި މަޝްރޫއަކީ މިސްރުގެ ހަތް ޓްރާންސްޕޯޓް ނާރެސް ހިމެނޭ ފުޅާ ރެއިލްވޭ ވިއުގައިގެ ބައެކެވެ. މި މަޝްރޫއުގެ ސަބަބުން ބޯޑަރު ހުރަސްކޮށް ދަތުރުކުރުން ފަސޭހަވެ، އެއަރޕޯޓުތަކުގެ ތޮއްޖެހުން ކުޑަވެގެންދާނެއެވެ. އަދި ދަތުރުވެރިންނަށް ސަހަރާގެ މުނިފޫހިފިލުވާ މަންޒަރުތައް ވެސް ފެންނާނެއެވެ.
މި މަޝްރޫއުގެ ސަބަބުން ސަރަހައްދީ ގުޅުން ބަދަހިވެ، ދަތުރުފަތުރުގެ ނިޒާމު ހަރުދަނާވެގެންދާނެ ކަމަށް ބެލެވެއެވެ. އަދި މިއީ ދެ ގައުމުގެ އިގްތިސާދީ ގުޅުން އިތުރަށް ވަރުގަދަވެގެންދާނެ މަޝްރޫއެއް ކަމަށްވެސް ލަފާކުރެވެއެވެ.
