ވޭތުވެދިޔަ 40 އަހަރު ތެރޭގައި ޕަންޖާބުގައި ދިމާވި އެންމެ ބޮޑު ފެންބޮޑުވުމުގެ ހާދިސާގައި މިހާތަނަށް 37 މީހުން މަރުވެއްޖެއެވެ. އަދި 350،000 އަށްވުރެ ގިނަ މީހުންނަށް ފެން ބޮޑުވުމުގެ އަސަރުކޮށްފައިވާ ކަމަށް އިންޑިއާގެެ ރަސްމީ ފަރާތްތަކުން މައުލޫމާތު ދެއެވެ. ގަދައަށް ވާރޭވެހި، ސުތުލެޖު ކޯރާއި، ބިއާސް އަދި ރާވީ ކޯރުތަކުން ފެންބޮޑުވުމުގެ ސަބަބުން 1،655 އަވަށް ވަނީ ފެނު އަޑީގައެވެ. ދަނޑުބިންތައް ވެސް ވަނީ މި ފެންބޮޑުވުމުން ދޮވެވިގެން ގޮސްފައެވެ. އަދި ގިނަ އަދަދެއްގެ އާއިލާތަކެއް ވަނީ ގެތަކުގެ ފުރާޅުމަތިން ހިމާޔަތް ހޯދަން މަޖުބޫރުވެފައިވެއެވެ.
މި ހާދިސާގައި 148،000 ހެކްޓަރުގެ ދަނޑުބިން ހަލާކުވެފައި ވެއެވެ. ގޭގެއަށް ބޮޑެތި ގެއްލުންތައް ލިބި، ގިނަ އަދަދެއްގެ ޖަނަވާރުތައް ވެސް ވަނީ މަރުވެފައެވެ. ގެއްލުން ލިބިފައިވާ އަވަށްތަކުގެ ތެރޭގައި ގުރުދާސްޕޫރު، ޕަޓާންކޯޓް އަދި ފިރޯޒްޕޫރު ފަދަ ސަރަހައްދުތަކުގައި ދަތުރުފަތުރު ކުރެވެނީ ހަމައެކަނި ބޮއްކުރާގައެވެ.
ޕަންޖާބްގެ ޗީފް މިނިސްޓަރ ބަގްވަންޓް މަން ވިދާޅުވީ ގެއްލުން ލިބުނު މިންވަރު ބެލުމަށް ހާއްސަ ސަރވޭއެއް ފަށައިފައިވާ ކަމަށެވެ. އަދި ގެއްލުން ލިބުނު އާއިލާތަކަށް ބަދަލު ދިނުމަށް ވެސް ނިންމާފައިވާ ކަމަށެވެ. "ޕަންޖާބު ސަރަހައްދުން އަބަދުވެސް ގައުމަށް އެހީތެރިވެފައިވޭ. މިހާރު ގައުމުން ޕަންޖާބަށް އެހީތެރިވާންޖެހޭ ވަގުތު މިއޮތީ އައިސްފައި،" ޗީފް މިނިސްޓަރ ވިދާޅުވިއެވެ.
ޕަންޖާބް ސަރުކާރުން ވަނީ ސެޕްޓެމްބަރ 7 އާ ހަމައަށް ހުރިހާ ތައުލީމީ މަރުކަޒުތަކެއް ބަންދުކޮށްފައިވާ ކަން އިއުލާން ކޮށްފައެވެ. އަދި ބަކްރާ ޑެމްގެ ފެން އެންމެ މަތީ މިންވަރަށް ކައިރިވެ ކޯރު ބަންޑުން ޖެހިދާނެ ކަމަށް ބަލައި އެ ސަރަހައްދުގެ ފެންހިންދުމުގެ މަސައްކަތް ގާތުން މޮނިޓަރ ކުރުމަށްވެސް ސަރުކާރުން ވަނީ ނިންމާފައެވެ.
