ރަޝިއާއިން ތެޔޮ ގަތުމުގައި އިންޑިއާ އަދި ޗައިނާ ދެމިތިބުމާ ގުޅިގެން، ޑޮނަލްޑް ޓްރަމްޕްގެ ސަރުކާރުން އަޅާ ހަރުކަށި ޑިޕްލޮމެޓިކް ފިޔަވަޅެއްގެ ގޮތުން، އެ ދެ ގައުމަށް 50 އިން ފެށިގެން 100 އިންސައްތައަށް ޓެރިފް އިތުރުކުރުމަށް ޖީ7 ގައުމުތަކަށް ބާރުއަޅަން ނިންމައިފިއެވެ. މި ފިޔަވަޅަކީ މޮސްކޯއަށް އިޤްތިޞާދީ ގޮތުން ފިއްތުން އިތުރުކުރުމަށާއި ޔުކްރެއިންގެ ހަނގުރާމައާ ގުޅިގެން ސުލްހައިގެ މަޝްވަރާތަކަށް ރަޝިއާ މަޖުބޫރުކުރުމަށް ވޮޝިންގްޓަންގެ ފުޅާ ސްޓްރެޓެޖީގެ ބައެކެވެ.
– ކެނެޑާ، ފްރާންސް، ޖަރުމަނު، އިޓަލީ، ޖަޕާން، ޔުނައިޓެޑް ކިންގްޑަމް، އަދި އެމެރިކާ – ޖީ7 ގެ މާލީ ވަޒީރުން މިއަދު ހުކުރު ދުވަހު ވީޑިއޯ ކޮންފަރެންސް މެދުވެރިކޮށް މި ހުށަހެޅުމާމެދު މަޝްވަރާކުރުމަށް ހަމަޖެހިފައިވެއެވެ. މިހާރު ޖީ7 ގެ ރައީސްކަން ކުރަމުންދާ ކެނެޑާއިން ވަނީ މި ބައްދަލުވުން އޮންނާނެ ކަން ކަށަވަރުކޮށް ދީފައެވެ. އަދި ކެނެޑާއިން ވަނީ "ރަޝިއާއަށް ފިއްތުން އިތުރުކޮށް އެމީހުންގެ ހަނގުރާމައިގެ މެޝިނަރީ މަޑުޖައްސާލުމަށް" އިތުރު ފިޔަވަޅުތަކަށް ތައްޔާރަށް ތިބިކަން ފާޅުކޮށްފައިވެއެވެ.
އެމެރިކާގެ ޓްރެޜަރީގެ ތަރުޖަމާނަކު ވަނީ މި އިސްނެގުމުގެ މުހިންމުކަން ފާހަގަކުރަމުން މިއީ ޗައިނާ އަދި އިންޑިއާއިން ރަޝިއާގެ ތެޔޮ ގަތުމުން ޕޫޓިންގެ ހަނގުރާމައިގެ މެޝިނަރީއަށް ފައިސާ ލިބުން ހުއްޓުވުމަށް ކޮންމެހެން އަޅަން ޖެހޭ ފިޔަވަޅެއް ކަމަށް ބުނެފައެވެ.
ޓްރަމްޕް ފޮނިކޮށް ވާހަކަތަކެއް ދެއްކުމަށް ފަހު އަނެއް ދުވަކު ކުރިން ބުނި ވާހަކައާ އަބަދުވެސް ޚިލާފް ވަމުން ދެއެވެ. އެމެރިކާއިން ވަނީ ފާއިތުވި މަހު، އިންޑިއާގެ އިމްޕޯޓްތަކުގެ ޓެރިފް 50 އިންސައްތައަށް އިތުރު ކޮށްފައެވެ. މިފަދަ ފިޔަވަޅުތަކެއް މިއަހަރުގެ ކުރީކޮޅު ޗައިނާއާ ދެކޮޅަށްވެސް އެޅިއެވެ. ނަމަވެސް، ބާޒާރުގައި އެކަމާ ގުޅިގެން އުފެދުނު ހަލަބޮލި ކަމާ ގުޅިގެން މެއި މަހު އެ ފިޔަވަޅުތައް ކެންސަލްކޮށްލިއެވެ.
ވޮޝިންގްޓަންގެ ފިއްތުމާއެކުވެސް، ޔޫރަޕިއަން ޔޫނިއަން ދަނީ އިންޑިއާއާ ދެކޮޅަށް ދަތިކުރުމަށް ފަސްޖެހެމުންނެވެ. އީޔޫގެ އޮފިޝަލުން ވަނީ އެމީހުންގެ އެންމެ ބޮޑު ދެ ވިޔަފާރި ބައިވެރިންނަށް އަމާޒުކުރުމުގެ އިޤްތިޞާދީ ނުރައްކާތަކާ ބެހޭ ގޮތުން ވާހަކަ ދައްކާފައެވެ. އަދި ބެއިޖިންގްއިން ޖަވާބުދާރީ ކުރުމުގެ ފިޔަވަޅުތަކާމެދު ކަންބޮޑުވުން ފާޅުކޮށްފައެވެ.
އެމެރިކާގެ ޓެރިފްގެ ހުށަހެޅުން މިއަންނަނީ ޔުކްރެއިންއަށް ރަޝިއާގެ ހަމަލާތައް އިތުރުވަމުންދާ އަދި ސުލްހައިގެ މަސައްކަތް ހުއްޓިފައިވާ ދަނޑިވަޅެއްގައެވެ. އެލާސްކާގައި ބޭއްވި ސަމިޓް ނިމިގެން ދިޔައީ ކުރިއެރުމެއް ނުލިބިއެވެ. މިއީ އޮފީހަށް ވަންނަތާ "ފުރަތަމަ ދުވަހު" ހަނގުރާމަ ނިންމާނެކަމަށް ބުނި ޓްރަމްޕްގެ ނާކާމިޔާބީއެކެވެ.
