އެމެރިކާއަށް އެތެރެ ކުރާ މުދަލަށް ނަގާ ޓެރިފް ބޮޑު ކުރުމަށް ފިޔަވަޅުތައް ތަޢާރަފުކުރަން ނިންމުމާ ގުޅިގެން، އިޤްތިޞާދީ ގޮތުން ކުރިއަރާފައިވާ ދެކުނު އޭޝިއާގެ ޤައުމުތަކުން ވިޔަފާރީގެ ބައިވެރިއެއްގެ ގޮތުގައި އިންޑިއާއަށް އަމާޒު ހިފަމުންދާ ކަމަށް ދިރާސާކުރާ ފަރާތްތަކުން ފާހަގަކުރަމުންދެއެވެ. މި ގޮތުން އާސިއާން-އިންޑިއާ ފްރީ ޓްރޭޑް އެގްރީމެންޓަކީ ބައިނަލްއަޤްވާމީ ވިޔަފާރީގެ މައިދާނުގައި މުހިންމު ބަދަލުތަކެއް ގެނެވިދާނެ އެއްބަސްވުމެއް ކަމަށް ބެލެވެއެވެ.
2025 ވަނަ އަހަރުގެ އޯގަސްޓް 1 އިން ފެށިގެން ތަންފީޒުކުރަން ނިންމާފައިވާ އެމެރިކާގެ އައު ޓެރިފް ރޭޓްތަކުގެ ދަށުން، ސިންގަޕޫރުގެ މުދަލަށް 10 ޕަސެންޓް އަދި މިޔަންމާރު އަދި ލާއޯސްގެ މުދަލަށް 40 ޕަސެންޓާ ހަމައަށް ޓެރިފް ކަނޑައަޅާފައިވެއެވެ. ވިއެޓްނާމް އަދި އިންޑޮނޭޝިއާ ފަދަ ބައެއް ޤައުމުތަކަށް ދެފަރާތުގެ އެއްބަސްވުންތަކުގެ ދަށުން ލުއިތަކެއް ލިބިފައިވީ ނަމަވެސް، ގިނަ ޤައުމުތަކުން މުދާ އެކްސްޕޯޓު ކޮށް މާކެޓް ތަނަވަސްކުރުމަށް މަސައްކަތްކުރަން ޖެހިފައިވެއެވެ.
ވޯލްޑް ބޭންކްގެ ވިޓްސް ޕްލެޓްފޯމުން ހަދާފައިވާ ސްމާޓް މޮޑެލް ސިމިއުލޭޝަނުން ދައްކާ ގޮތުގައި އެމެރިކާއިން އަޅާ ފިޔަވަޅުތަކުން ޗައިނާގެ އެކްސްޕޯޓަށް 53 ބިލިއަން ޑޮލަރަށްވުރެ ބޮޑު ގެއްލުމެއް ލިބޭނެއެވެ. އަދި އާސިއާން ޤައުމުތަކަށް އަޅާ ފިޔަވަޅުތަކުން މަޖުބުރު ވެގެން އެގައުމުތަކުގެ ވިޔަފާރި އެހެން ދިމަދިމާލަށް ފިރާލުމުން ފައިދާތަކެއް ލިބިގެންދާނެ ކަމަށް ލަފާކޮށްފައި ވެއެވެ.
އާސިއާންގެ ކުރީގެ އިންޑިއަން އެމްބެސެޑަރު ގުރުޖިތް ސިންގް ވިދާޅުވި ގޮތުގައި، މި ފައިދާތަކަކީ އިތުރަށް ލިބޭ ފައިދާތަކެއް ނޫނެވެ. ނަމަވެސް މުދާ އެހެން ބާޒާރަކުން އައު ބާޒާރަކަށް ބަދަލު ކުރުމުން ލިބޭ ފައިދާތަކެކެވެ. އަދި ޗައިނާގެ މުދަލުގެ އަގުތައް މައްޗަށް ދިއުމުގެ ސަބަބުން އާސިއާންގެ އެކްސްޕޯޓް ދާއިރާއަށްވެސް އޭގެ އަސަރު ކުރާނެ ކަމަށް އޭނާ ފާހަގަކުރެއްވިއެވެ.
މި ހާލަތުގައި އާސިއާން ޤައުމުތަކުން އިންޑިއާއާއެކު ގުޅުން ބަދަހިކުރާނެއެވެ. އަދި އެކަމަކީ، ހަމައެކަނި ޓެރިފްގެ ސަބަބުން ކުރިމަތިވާ ދަތިތަކުން އަރައިގަތުމަށް އެހީތެރިވާނެ ކަމެއް ނޫނެވެ. ނަމަވެސް އެއީ ސަރަޙައްދީ ތަރައްޤީއަށް މުހިންމު އަދި ދިގު މުއްދަތުގެ ގުޅުމެއް ކަމުގައިވެސް ބެލެވެއެވެ.
