އެމެރިކާގެ ޖަސްޓިސް ޑިޕާޓްމަންޓުން ވަނީ ނިއުޖާރސީގައި ހުންނަ ޔަހޫދީ ފައްޅިއަކަށް ބިރުދެއްކުމުގެ ތުހުމަތުގައި ފަލަސްޠީނަށް ތާއީދުކުރާ ޖަމާއަތްތަކާއި އެފައްޅި ކައިރީގައި މުޒާހަރާކުރި ފަރާތްތަކާ ދެކޮޅަށް ގާނޫނީ ފިޔަވަޅު އަޅަން ފަށާފައެވެ. މި ފަރާތްތަކާ ދެކޮޅަށް ޖަސްޓިސް ޑިޕާޓްމަންޓުން ބޭނުން ކުރަނީ ދަރިވެއްޓުމަށް އެހީވެދޭ ކްލިނިކްތަކަށް ހަމަލަ ދޭ ފަރާތްތަކާ ދެކޮޅަށް ބޭނުން ކުރާ ގާނޫނެވެ.
ނިއުޖާރސީ ފެޑެރަލް ކޯޓުގައި ހޯމަ ދުވަހު ކޮށްފައިވާ ދައުވާގައި ބުނެފައިވާ ގޮތުގައި، ނިއުޖާރސީގެ ވެސްޓް އޯރެންޖް ސިޓީގައި ހުންނަ ޔަހޫދީ ފައްޅިއެއްގައި އޮތް ޔަހޫދީ އަޅުކަމާއި އަދި އެތާގައި ބާއްވާފައި އޮތް ހިފާފައިޥާ ފަލަސްޠީނުގެ ބިންތައް ވިއްކުމާ ބެހޭ މައުރަޒާ ދެކޮޅަށް ކުރި މުޒާހަރާތައް ހަމަނުޖެހުމަކަށް ބަދަލުވި އެވެ. އަދި އެކަން އަޅުވާފައި ވަނީ ފަލަސްޠީނުގައި ޔަހޫދީން ހިންގާ ޖެނޮސައިޑާ ދެކޮޅަށް އަޑު އުފުލާ މީހުންގެ ބޮލުގައެވެ.
މައްސަލައިގެ ތަފްސީލުތަކުގައިވާ ގޮތުން، މުޒާހަރާކުރި ފަރާތްތަކުން ވަނީ ބައެއް ޔަހޫދީންނަށް ޖިސްމާނީ ގޮތުން އަނިޔާކޮށް، އެމީހުންނާ ދިމާއަށް ހަޅޭއްލަވައި، އަދި ކަންފަތް ބުޑުގައި ދުންމާރި ފުމެ ހަދާފައެވެ.
މި ދައުވާ ހުށަހަޅާފައިވަނީ 1994 ވަނަ އަހަރު ފާސްކުރި "ކްލިނިކް އެންޓްރަންސް އެކްސެސް އެކްޓް" ނުވަތަ "ފޭސް" ޤާނޫނުގެ ދަށުންނެވެ. މި ޤާނޫނަކީ ދަރި ވައްޓަން އެހީވެދޭ މަރުކަޒުތަކަށް ނުވަތަ އެފަދަ ތަންތަނަށް ގަދަ ބާރުން ވަދެ ގަތުމާއި އެފަދަ ތަންނަށް ވަނުމަށް ހުރަސް އަޅާ ފަރާތްތަކާ ދެކޮޅަށް ބޭނުން ކުރާ ގާނޫނެވެ.
