ޔޫކޭ ބޮޑުވަޒީރު ސަރ ކީރ ސްޓާމަރ ވަނީ ދެ ދުވަހުގެ ޑިޕްލޮމެޓިކް ދަތުރުފުޅެއްގައި މުންބާއީއަށް ވަޑައިގެންފައެވެ. މި ދަތުރުފުޅުގެ މަޤްޞަދަކީ ޔޫކޭ އާއި އިންޑިއާ އާ ދެމެދު އޮތް ޘަޤާފީ އަދި އިޤްތިޞާދީ ގުޅުން ބަދަހިކުރުމެވެ. މި ދަތުރުފުޅުގައި ސްޓާމަރ ވަނީ މަޝްހޫރު ޔަޝް ރާޖް ފިލްމްސް (ވައިއާރްއެފް) ސްޓޫޑިއޯއަށް ޒިޔާރަތްކުރައްވާ، ބޮލީވުޑްގެ ތަރި ރާނީ މުކަރްޖީ އަދި ވައިއާރްއެފްގެ ސީއީއޯ އަކްޝޭ ވިދާނީ އާ ބައްދަލުކުރައްވާފައެވެ.
މި ދަތުރުފުޅުގައި ސްޓާމަރަށް ވަނީ އިންޑިއާގެ އެންމެ ނުފޫޒުގަދަ ފިލްމު ޕްރޮޑަކްޝަން ހައުސްތަކުގެ ތެރެއިން އެއް ސްޓޫޑިއޯ ބައްލަވާ ލެއްވުމަށް ފުރުސަތު ލިބިވަޑައިގެންފައެވެ. ފިލްމީ ތަރި ރާނީ މުކަރްޖީ ވަނީ ސްޓޫޑިއޯ ޓުއަރގައި ބޮޑުވަޒީރާއެކު ވަޑައިގެން ފައެވެ. އަދި ސްޓާމަރ ވަނީ ބޮލީވުޑް ފިލްމެއްގެ ޕްރައިވެޓް ސްކްރީނިންގ އެއްވެސް ބައްލަވާލައްވާފައެވެ.
މި އަހަރުގެ ކުރީކޮޅު ލަންޑަނާއި ނިއު ދިއްލީ އާ ދެމެދު ސޮއިކުރެވުނު އެއްބަސްވުމަކާ ގުޅިގެން މި ދަތުރުފުޅު ކުރިއަށްދަނީ ދެ ގައުމުގެ ގުޅުމުގެ އައު ބާބެއް ފެށިގެންދާ ދަނޑިވަޅެއްގައެވެ. ސްޓާމަރގެ ދަތުރުފުޅުގެ ތެރޭގައި ވިޔަފާރީގެ އެއްބަސްވުން ކުރިއެރުވުމާއި، އުފެއްދުންތެރި ސިނާއަތްތަކާއި، ޓެކްނޮލޮޖީ އަދި ތަޢުލީމީ ދާއިރާގައި އެއްބާރުލުމުގެ ފުރުސަތުތައް ހޯދުމަށް އަމާޒުކުރެވިފައިވާ ބައްދަލުވުންތައް ހިމެނެއެވެ.
