އިންޑިއާގެ ބޮޑުވަޒީރު ނަރެންދްރަ މޯދީ، ވަނީ އެމެރިކާގެ އިސް ވަފުދަކާ ބައްދަލުކުރައްވައިފައެވެ. މި ބައްދަލުކުރެއްވުމުގައި ދެ ގައުމުގެ ސްޓްރެޓެޖިކް ގުޅުން އިތުރަށް ވަރުގަދަކުރުމުގެ މަޝްވަރާތައް ކުރިއަށް ގެންގޮސްފައިވެއެވެ.
އިންޑިއާ އާއި އެމެރިކާ އާ ދެމެދު ވިޔަފާރި އެއްބަސްވުމެއް އެކުލަވާލުމުގެ މަޝްވަރާތައް ކުރިއަށްދާ ދަނޑިވަޅެއްގައި މި ބައްދަލުވުން ބޭއްވުމަކީ އެމަސައްކަތް އަވަސް ކުރުމަށް ލިބޭ ބާރެއް ކަމަށް މުހައްލިލުން ދެކެއެވެ. އިންޑިއާގެ ވިޔަފާރި އަދި ސިނާއަތުގެ ވަޒީރު ޕިޔޫޝް ގޮޔަލް ވިދާޅުވި ގޮތުގައި މި މަޝްވަރާތައް ކުރިއަށްދަނީ ވަކި މުއްދަތެއް ކަނޑައެޅުމަކާ ނުލައެވެ. އަދި އެމެރިކާގެ ސަރުކާރުގައި ބަންދު އެޅުވުމުގެ ސަބަބުން މި މަޝްވަރާތަކަށް އަސަރުކުރުމަކީ އެކަށީގެންވާ ކަމެކެވެ. އެހެންވެ ކުރިން ލަފާ ކޮށްފައިވާ ގޮތަށް މަޝްވަރާތައް ނުދާނެ ކަމަށް އޭނާ ވިދާޅުވެއެވެ.
މީގެ އިތުރުން، ޔޫރަޕިއަން ޔޫނިއަނާއެކު މިނިވަން ވިޔަފާރި އެއްބަސްވުމެއް (އެފްޓީއޭ) އެކުލަވާލުމުގެ މަސައްކަތްވެސް ކުރިއަށްދާކަން ވެސް ގޮޔަލް ވަނީ ފާހަގަކުރައްވާފައެވެ. މި އެއްބަސްވުމާއެކު އިންޑިއާގެ ޒުވާން މަސައްކަތްތެރިންނާއި ޔޫރަޕިއަން ޔޫނިއަންގެ ޓެކްނޮލޮޖީގެ ހުނަރު އެއްކޮށްލެވޭނެ ކަމަށް އޭނާ ވިދާޅުވިއެވެ. މި މަޝްވަރާތައް އިތުރަށް ކުރިއަށް ގެންދިއުމަށް ވިޔަފާރި ސެކްރެޓަރީ ރާޖޭޝް އަގަރްވާލް މި ހަފްތާގެ ފަހުކޮޅު ބްރަސެލްސްއަށް ދަތުރުފުޅެއް ކުރައްވާނެއެވެ.
