އިންޑިއާގެ ޖައްވީ ދިރާސާތަކާ ބެހޭ އިދާރާ (އިސްރޯ) އިން އެ ޤައުމުގެ އެންމެ ބަރު ކޮމިއުނިކޭޝަން ސެޓެލައިޓް ކަމަށްވާ ސީއެމްއެސް-03 ޖައްވަށް ފޮނުވުމަށް ތައްޔާރު ކޮށްފިއެވެ. 4,400 ކިލޯގެ މި ސެޓެލައިޓް ޖައްވަށް ފޮނުވުމަށް ހަމަޖެހިފައިވަނީ އެލްވީއެމް-3 ރޮކެޓެއް ބޭނުންކޮށްގެން، 2025 ވަނަ އަހަރުގެ ނޮވެމްބަރު މަހުގެ 2 ވަނަ ދުވަހު އެވެ. އިންޑިއާގެ ސްރީހަރިކޯޓާގައި ހުންނަ ސަތީޝް ދަވަން ސްޕޭސް ސެންޓަރުން މި ސެޓެލައިޓް ޖައްވަށް ފޮނުވުމަށް ހަމަޖެހިފައިވަނީ ޖިއޯސިންކްރޮނަސް ޓްރާންސްފަރ އޯބިޓަށެވެ.
ސީއެމްއެސް-03، ނުވަތަ ޖީސެޓް-7އާރް ގެ ނަމުން މަޝްހޫރު މި ސެޓެލައިޓް ޑިޒައިންކޮށްފައިވަނީ އިންޑިއާއާއި އިންޑިއާ ކަނޑުގެ ސަރަހައްދުގައި މަތީ ފެންވަރުގައި އަޑާއި، ޑޭޓާ އަދި ވީޑިއޯ ލިންކްތައް ފޯރުކޮށްދިނުމަށެވެ. މި ސެޓެލައިޓުން މަލްޓި ބޭންޑް ކަވަރޭޖް ފޯރުކޮށްދޭނެއެވެ. އެއީ، ސީ، އެކްސްޓެންޑެޑް ސީ، އަދި ކޭޔޫ ބޭންޑްސްގައެވެ. މި ސެޓެލައިޓަކީ އިންޑިއާގެ ކަނޑުގެ ސިފައިންގެ ކަނޑު މަތީ މުވާސަލާތީ ނިޒާމަށް ބޮޑު އިންގިލާބެއް ގެންނާނެ ވަސީލަތެއް ކަމަށް ބެލެވެއެވެ. ޚާއްސަކޮށް އިންޑިއާގެ ނޭވީއަށް، އުޅަނދުފަހަރާއި، މަތިންދާބޯޓާއި އަދި ސަބްމެރީންތަކާ ދެމެދު ރައްކާތެރި ކަމާއެކު މުވާސަލާތީ ގުޅުންތައް ޤާއިމުކުރުމަށް މި ސެޓެލައިޓް މުހިންމު ވާނެއެވެ.
އެލްވީއެމް-3 ރޮކެޓް ބޭނުންކޮށްގެން ކުރާ މި ލޯންޗަކީ އެލްވީއެމް 3 ގެ ފަސްވަނަ އޮޕަރޭޝަނަލް ދަތުރެވެ. މި ރޮކެޓް މީގެ ކުރިން ބޭނުންކޮށްފައިވަނީ ޗަންދުރަޔާން-3 ހަނދުގެ މިޝަންގައި ފޮނުވާލުމަށެވެ. މި ސެޓެލައިޓްގެ ސަބަބުން ދުނިޔޭގެ ސެޓެލައިޓް ކޮމިއުނިކޭޝަންގެ ދާއިރާގައި އިންޑިއާގެ މަޤާމު އިތުރަށް ހަރުދަނާވެ، އެ ޤައުމުގެ ޖައްވީ ދަތުރުފަތުރާއި އިންސާނުން ޖައްވަށް ފޮނުވުމުގެ މަޤްސަދުތަކަށް ބާރު ލިބިގެންދާނެއެވެ.
މި ސެޓެލައިޓްގެ ސަބަބުން އިންޑިއާ ކަނޑުގެ ގައުމުތަކަށް ކުއްލި ހާލަތްތަކުގައި އެހީތެރިކަން ފޯރުކޮށްދިނުމުގެ މަސައްކަތްތައް ހަރުދަނާވެ، އެ ސަރަހައްދުގައި ކަނޑުގެ ބެލެހެއްޓުމާއި ފާރަވެރިކަން އިތުރަށް ހަރުދަނާވާނެ ކަމަށް ބުނެއެވެ.
